“Kum tam a liam hmain thlarau lam chaw digital format-a hmuh chu ngaih pawh kan ngaihruat thiam lo vang.” Hêng thute hi in pawm em? 2020 Governing Body Hnên Aṭanga Chanchin Thar #6-naa unau Geoffrey Jackson-a mi tichak thei tak thusawi zînga mi a ni. Ani chuan tihian a sawi zawm a: “Mahse, tûnah chuan JW Library tel lovin engtin nge he hripui hi kan paltlang theih ang, tiin kan ngaihtuah mai thei. Jehova chuan kum kaltate chhûng khân hetiang thil atân hian min lo buatsaih a ni,” tiin.

 Engtin nge Jehova’n min buatsaih? JW Library app siam chhuahnaah eng nge tel a, a enkawl nân leh tihphuisui nân eng nge ngai?

 Kum 2013 May thla khân Governing Body chuan world headquarters-a MEPS Programming department chu revised New World Translation tel theihna app siam tûrin a ti a. MEPS Programming-a thawk Paul Willies-a chuan heti hian a sawi a ni: “Chumi hma zawng chuan, app stores khawi aṭang mahin mobile app engmah kan la tlângzarh ngai lo. Mahse, team kan din a, hnathawh lai ṭhenkhat kan chawlh lai lâwktîr a, department dangte nên app leh a chhûnga awm tûrte duanna leh siamnaah kan thawkho a ni. Kan ṭawngṭai ngun hle a, Jehova ṭanpuinain app chu thla nga hnu lek, annual meeting-ah kan tlângzarh thei ta!” tiin.

 Harsatna awm leh chu library tak tak hmêlhmang nei tûra thu leh hla chhuah tam zâwk leh ṭawng tam zâwka hmuh theih tûra siam hi a ni a. Kum 2015 January thla khân tûna Sâpṭawnga kan thu leh hla chhuah tam zâwkte chu app-ah hmuh theih a ni tawh a, thla ruk hnu lekah a hmangtute chuan thu leh hla chhuahte chu ṭawng chi hrang hrang a za têlin an download thei tawh a ni.

 Chumi hnu aṭangin kan unaute chuan app chu kawng chi hrang hrangin an tiphuisui a; chûngah chuan video telh te, kohhran inkhâwm nâna hman thu leh hla chhuah zawng zawng leh video-te hmun khata dah khâwm te bâkah, a hmangtute chu Bible chângte aṭanga Zir Bingna Hmanrua direct-a pawhtîr theihte a tel a ni.

 JW Library hi nî tin phone leh tablet maktaduai 8-ah hman a ni a, thla tin maktaduai 15 chuangah hman a ni bawk! Chûng phone leh tablet-tea ṭha taka hman theih ni tûr chuan eng nge ngai? Unau Willies-a chuan heti hian a sawi a ni: “Mobile app siam hi a zawh tak tak theih loh. Hmêlhmang thar dah belh tûr leh hman awlsam zâwk ni tûrin kan thawk reng a. Sumdâwnna atâna hman phone leh tablet operating system-te hi an tihthar (update) ngun êm avângin, chûngte mil tûra app hi kan lo siamrem zêl a ngai a ni. Chu bâkah, JW Library-a thu leh hla chhuah leh aw thunsate a rawn awm belh zêl avângin, a software pawh kan upgrade reng a ngai a ni,” tiin. Ṭawng zawng zawng belh khâwmin tûnah hian JW Library-ah thu leh hla chhuah 200,000 vêl leh aw thunsa leh video 600,000 chuang a awm!

 He app enkawl zêl tûr hian computer hardware ringawt a tâwk lo. Software license chi hrang hrang pawh lei a ngai bawk. License pakhat tân ringawtah pawh kum khatah $1,500 (U.S.) hman a ni a. Chu bâkah, MEPS programming chuan he app hi computer, tablet, leh phone tharahte ṭha taka hman theih a ni tih an chian theih nân kum tin $10,000 (U.S.) vêl a sêng ṭhîn a ni.

 JW Library hian lehkha chhutna te, a kâwm siamna te, leh a thawn chhuahnate atâna sênso sum tam tak a hum a. Entîr nân, Nî Tina Pathian Lehkha Thu Belh Chianna bu hi lo ngaihtuah ta ila. Kum 2013 Pathian Lehkha Thu Belh Chianna bu hi bu maktaduai 12 deuhthaw kan chhu chhuak a. Mahse, kum 2020 atân khawvêl pumah thuchhuahtu 700,000 vêla kan pun belh chung pawhin, bu maktaduai nga vêl chauh kan chhu chhuak a ni. Engvângin nge chhut chhuah a tlêm? Tûnah kan unau tam takte chuan JW Library aṭanga an chhiar vâng a ni. a

 JW Library hian kawng tam takin a hmangtute a ṭanpui a. Canada rama awm Geneviève-i chuan JW Library app-in inzirna nei ziah tûrin a ṭanpui niin a hria a. Ani chuan heti hian a sawi: “Zêp lovah chuan inzirna nei tûra ka lehkhabu mamawhte lâkkhâwm a ngai a nih chuan, tûk tin inzirna ka neih peih ka ring lo. Mahse, app a awm zârah, ka tablet-ah ka mamawh zawng zawng a awm vek a. Hetianga inzirna ka neih ziahna hian ka rinna a tihngheh bâkah, Jehova min hnaihtîr lehzual,” tiin.

 A bîk takin JW Library app hi COVID-19 hripui lên chhûng hian a ṭangkai lehzual tih a chiang. United States-a Charlyn-i chuan heti hian a sawi: “Khawvêl puma COVID-19 a lên avângin, kan thu leh hla chhuah tharte a bu-a ka hmuh lohna kum khat a chuang tawh. Mahse, JW Library hian thlarau lamah min châwm ṭha hle a, he thilpêk duhawm tak avâng hian Jehova hnênah lâwmthu ka sawi ṭhîn,” tiin.

 Philippines rama awm Faye-i hian mi tam takte rilru put dân chu heti hian a sawi a ni: “Ka thlarau lam nun leh hun duan zawng zawng chu he app thiltithei takah hian a infinkhâwm a. Zînga ka chhiar hmasak ber a ni a. In chhûng sekrek khawih pahin ka ngaihthla ṭhîn bawk. Inkhâwm inbuatsaihna atân ka hmang a. Bible zirpui tûra inbuatsaih nân pawh ka hmang bawk a. Hun âwl ka neih châng apiangin video en nân ka hmang a. Thil nghah ka neih laite hian thuziakte, a nih loh leh Bible chhiar nân ka hmang ṭhîn. Hei hi thil hlu tak a ni,” tiin.

 JW Library app hi rawngbâwlnaah pawh a ṭangkai hle. Entîr nân, Cameroon rama unaunu chuan chawlhkâr kalta rei vak lova unaunu pakhatin Bible châng a hman chu rawngbâwlnaah hman ve a duh a. Mahse, chu Bible châng chu a hre chhuak thei tawh lo. Ani chuan heti hian a sawi: “Chumi chânga thu hlâwm khat ka la hria chu a lâwmawm hle. App ka hawng a, Bible-ah ka lût a, a zawnna aṭangin chu thu hlâwm chu ka zawng a. Bible châng chu ka hmu ta nghâl a. He app hmang hian ka hriat chhuah mai theih loh Bible châng tam tak ka zawng hmu thei a ni,” tiin.

 Kan website donate.pr418.com-a thawhlâwm thawh theih dân târ lan kawngte hmanga phal taka in pêk in thawhlâwmte hian khawvêl puma kan unaute tân JW Library app hi siam chhuak tûr te, enkawl tûr te, leh tiphuisui zêl tûrtein min ṭanpui a ni. In thilphalna avângin in chungah kan lâwm hle.

1. October 2013—revised New World Translation telna app tlângzarh

2. January 2015—Sâpṭawnga thu leh hla chhuah dangte hmuh theih a ni a, ṭawng dang a za têlin a zui bawk

3. November 2015—Rawnga chhinchhiahna telh belh

4. May 2016—Meetings tab dah belh

5. May 2017—Note lâkna dah belh

6. December 2017—Study Bible ṭanpuitu dah belh

7. March 2019—Aw thunsa download thei tûr te, stream video en thei tûr te, leh Zir Bingna Hmanrua pawh thei tûrtea siam

8. January 2021—Chatuanin I Hlim Thei! lehkhabu hmêlhmangte lang thei tûra belh