“Hei hi kum 19 chhûng lai ka lo nghâk tawh!” Kan Kristian unaupa chuan eng nge a nghah? New World Translation Kristian Grik Pathian Lehkha Thu anmahni ṭawng, Bengali ṭawnga neih hun a nghâk a ni. Mi tam tak pawhin New World Translation an ṭawnga tlângzarh a nih hian chutiang tho chuan an sawi ṭhîn. Mahse, chûng Bible lehlinna leh tihchhuahnaa tel thil ṭûlte chu i ngaihtuah ngai em?

 A hmasa berin, Governing Body-a Writing Committee kaihhruaina hnuaiah ṭawng letlingtu team chu chanvo pêk an ni a. Team chuan Bible lehlin nân engtia rei nge hun a hman? New York, Warwick Translation Services-a thawk Nicholas Ahladis-a chuan heti hian a sawi: “Thil tam tak a awm a, chûngah chuan project tân ṭawng letlingtu engzât nge awm tih te, a ṭawng hman har zâwng te, chhiartute’n Bible hun laia nun engtiang takin nge an hriatthiam tih te, leh a hmun azirin ṭawng hman a danglam em tihte a tel a ni. Chawhrualin, Kristian Grik Pathian Lehkha Thu chauh lehlin nân team chuan kum khat aṭanga kum thum vêl hun a hmang a, Bible bu pum letling tûr chuan a tlângpuiin kum li emaw, a aia tam emaw a ngai thung. Sign language tân chuan chu aiin hun a duh rei zâwk bawk,” tiin.

 Bible letling tûrin ṭawng letlingtu team chauh mamawh a ni lo va. Ṭo bul hrang hrang nei—a châng chuan ram danga awm—pâwn lam aṭanga chhiartute chuan ṭawng lehlin chu hlawh nei lovin an ennawn a ni. An rawtna pêkte chuan Bible dik, fiah, leh awmze nei tak tichhuak tûrin a ṭanpui a ni. Chu bâkah, South Africa rama Bible lehlinnaa zirtîrna petu chuan heti hian a sawi bawk, “ṭawng lettute chuan Jehova leh a Thu chhiartute chungah mawhphurhna rit tak nei niin an inhria,” tiin.

 Ṭawng lehlin zawh fel a nih hnuah, Bible-te chu chhut chhuaha ṭhui khâwm tûr a ni a. Chutianga ti thei tûr chuan lehkha chhutna khâwlte chuan a lo berah thil chi sâwm “inchawhpawlh” a hmang a: lehkha puan, lehkhatui, a kâwm, a chârna, a kâwm liner-te, silver rawng, a phêk chhinchhiahna puan them, a hrên behna, a phêk inchâr khâwmna, leh Bible ṭhui khâwm theihna tûra ṭanpuitu capping material te a ni. Kum 2019 khân, Bible tihchhuah nâna chûng thil ṭûl man atân ringawt pawh (U.S.) dollar maktaduai 20 chuang hman a ni a. Chumi kum vêk chuan kan Lehkah chhutnaa thawkte chuan Bible tihchhuah nân leh thawn chhuah nân dârkâr 300,000 aia tam an hmang a ni.

 Chûng hna atân chuan engvângin nge hun leh sum tam tak sên a nih? International Printing Department-a thawk Joel Blue-a chuan, “Bible hi kan tihchhuah azawnga lehkhabu pawimawh ber a ni a. Chuvângin, a lan dânin kan biak Pathian leh kan thuchah hrilh a chawimawi kan duh a ni,” tiin a sawi.

 New World Translation standard edition mai bâkah, mamawh zual bîk nei chhiartute tân edition dang pawh kan tichhuak bawk. Entîr nân, New World Translation chu mitdel hawrawpin ṭawng chi sâwma hmuh theih a ni a. Mitdel hawrawp Bible pakhat phuahkhawm puitling tûr chuan dârkâr riat lai a ngai thei a, a volume tam tak awmte chuan lehkhabu dahnaah, a lo berah meter 2.3 (7.5 ft)-a sei hmun a luah a ngai a ni. Chu bâkah, a bîk taka siam Bible a kâwma lehkha puan chauh hman theih, tân ina tângte tâna hman tûr pawh kan tichhuak bawk.

 New World Translation chuan a chhiartute nun a khawih hle a. Democratic Republic of the Congo-a awm Tombe tia koh Kiluba ṭawng hmang kohhran chungchâng hi ngaihtuah ta ila. Tombe hi an ram khawpui ber aṭangin kawng pângngaiah kilometer 1,700 (1,000 mi) chuang a ni a. Chuta awm Thuhretute chuan Bible pakhat chauh an nei a, chu chu Kiluba ṭawng Bible hlui tak a ni. Chu Bible pakhat chu inkhâwm tâna inbuatsaih nân unaute’n an inkawl chhâwk ṭhîn a. Mahse, kum 2018 August thla aṭang khân, New World Translation a bu pum leh tûn lai ṭawnga ziak chu Kiluba ṭawngin kohhrana unau zawng zawngte neih theih a ni ta a ni.

 German ṭawng hmang unaunu chuan an ṭawnga New World Translation siam ṭhat chungchângah heti hian a sawi: “Bible ka chhiar a ngai tiin ka sawi tawh lo. Chu aiin, ‘Tam lehzualin engtikah nge ka chhiar theih ang?’ tiin ka inzâwt zâwk a ni,” tiin. Tân ina tâng pa pakhat chuan heti hian a sawi ve bawk: “New World Translation Bible bu khat ka dawng a, chu chuan ka nun a thlâk a ni. He Bible lehlin ka chhiar aṭanga Pathian Thu ka hriatthiam ang hian, tun hmain ka la hre thiam ngai lo. Jehova Thuhretute chungchâng leh Thuhretu nih theih dân chungchâng hriat belh ka duh,” tiin.

 New World Translation Bible chhiartu zawng zawngte chuan tihchhuah a nih theih nâna thawhlâwm thawhte avângin an lâwm hle a. Khawvêl pum huap rawngbâwlna atâna hêng thawhlâwmte hi donate.pr418.com-a târ lan thawhlâwm thawh theih dân hrang hrangtea thawh a ni. In thilphalna avângin kan lâwm e.