Kum 2020 khân leilung chhiatna tam tak a thleng a, khawvêl pum huapa COVID-19 hripui a lên ṭan kum a ni bawk. Engtin nge Jehova Thuhretute chuan chûng chhiat tâwkte chu an ṭanpui?

 Kum 2020 rawngbâwl kum chhûng khân, a Governing Body-a Coordinators’ Committee chuan chhiat tâwkte chhawmdâwl nân, dollar b maktaduai 28 hman a remti a. Hei hian COVID-19 hripui pawh tiamin, ram luma cyclone thlipui te, Africa rama tuilian te, Venezuela rama ṭâm tla te, leh Zimbabwe rama khawkhêng tuarte chhawmdâwlna a pe thei a ni. Thawhlâwmte chuan ei tûr te, tui te, awmna tûr in te, thawmhnaw te, leh damdawi lama inenkawlnate bâkah, mamawh zualpui in leh a vêl tihthianghlimna, siamṭhatna, leh thawm ṭhatnaahte a ṭanpui a. Chhawmdâwlna hnathawh tlêm azâwng lo ngaihtuah ta ila.

 COVID-19. Khawvêl puma lêng hripui chuan kan unaute chu tisa lam, rilru lam, leh eizawnna lamah a nghawng a. Amahni ṭanpui nân khawvêl pumah Disaster Relief Committees (DRCs) 800 chuang din a ni. Hêng committee-te hian, kan unaute mamawh chu an hria a, chûng an chanchin hriatte rang taka Coordinators’ Committee an hriattîrna chuan chhawmdâwlna atâna kaihhruaina pêk dân ṭha ber hre tûrin a ṭanpui a ni.

 Kum tluanin DRCs chuan ei tûr te, tui te, intihthianghlimna atâna thil ṭûl te, leh damdawi mamawh zualpuite nei tûrin mi tam tak a ṭanpui a. Hmun ṭhenkhatah chuan, DRCs chuan tualchhûng upate nêna thawkhovin sawrkâr aṭanga ṭanpuina dawng thei tûrin unaute chu an ṭanpui a ni.

 Thuhretu ni lote chuan kan chhawmdâwlna hnathawh chu an hria a. Entîr nân, Zambia rama Nakonde district commissioner, Field Simwinga-a chuan kan unaute hnênah tihian a hrilh a ni: “Chhiat tâwk chhûngkuate a hun taka nasa taka in rawn ṭanpuina avângin, in chungah bâ tam tak kan nei,” tiin.

 Angola Rama Ei leh Bâr Harsatna. COVID-19 hripui lêng avângin Angola ramah ei leh in a vâng hle a, thil man a to hle bawk. Kan unau tam tak chuan ei leh in lei an harsat chho tawlh tawlh a ni.

 Brazil branch chu Angola rama kan unaute tâna ei leh inte a bag-a thawn tûra tih a ni a. Chhawmdâwlna atâna thawhlâwmte a ṭha thei ang bera hman a nih theih nân, unaute chuan ei tûr lei dân tûr leh thawn dân tûr chungchâng chu ngun takin an ngaihtuah a ni. Chuvângin, buhfai te, bean te, têl te awmna ei tûr bag khat zêl kg 20-a (44 lb) rit chu, a leina leh a thawnna manah $22 vêl hman a ni a. Ei tûr bag 33,544 thawn a ni a—a vaiin metric ton 654-a (U.S. ton 721) rit a ni. Tualchhûnga ei tûr awmsate leh hêng an thawnte hian mi 50,000 chuangte ei tûr a phuhru!

 Kan unaute chuan he chhawmdâwlna hi engtin nge an ngaih? Angola rama hmun kil khâwra awm Alexandre-a chuan: “Hei hi Jehova min hmangaihna leh ka mal lo a ni tih finfiahtu angin ka hmu a. Jehova inâwpna pâwl hian min va ngai hlu tak êm!” tiin a sawi a ni. Hmeithai Mariza-i chuan heti hian a sawi bawk: “Jehova chuan ka ṭawngṭaina aw a hria a. Amah leh a inawpna pâwl chungah ka lâwm tak zet a ni!” tiin.

 Zimbabwe Rama Khawkhêng. Kum 2020 rawngbâwl kum chhûng khân, Zimbabwe ram chuan khawkhêng nasa tak an tawrh avângin, mi maktaduai tam tak rilṭâmin an awm a. Thuhretu mi sâng têlte pawhin ei tûr kham khawp an nei lo.

 Kan unaute hnêna ei tûr pêkna lama ṭanpui tûrin DRCs panga din a ni a. Thuchhuahtu a za têlte chuan ei tûr fûnnaah te, thawn chhuahnaahte an ṭanpui a, a nih loh leh an lîrthei te an hmantîr a ni. c Kum 2020 rawngbâwl kum chhûng khân, mi 22,700 chuangte ei leh in tûr lei nân $691,561 an hmang!

 Dinhmun ṭhenkhatah chuan, kan unaute ei leh in neihsate chu chhawmdâwlna an dawn rualin a zo va. Ei tûrte a lo thlen chuan anni chuan Jehova an fak a. Ṭhenkhat chuan Lalram hlate an sa hial a ni.

 Hmun pakhatah chuan, Thuhretu hmeithai pahnihte chu NGO pâwl pakhatin ei tûr an pêk tûr chungchâng sawihona tualchhûng inkhâwmah an tel a. Mahse, an inkhâwma thusawite chuan politics lam a hawi avângin unaunute chuan ei tûr dawng tûra an thil phûtte chu an pawm thei ta lo va. Inkhâwm an chhuahsan avângin mite chuan deusawh takin, “Kan hnênah ei tûr zawngin lo kal suh u!” tiin an hrilh a. Mahse, chawlhkâr hnih lek a liam hnuah—NGO te chawmdâwlna rawn thlen hmain—chumi hmunah chuan chawmdâwlna atâna ei tûr keng kan unaute an rawn thleng a, unuaute chu ei tûr an pe a ni.

 Zimbabwe rama chhawmdâwlna chuan thu hrilhna ṭha tak a thlen bawk a. Entîr nân, khawtê pakhata awm Prisca-i thiltawn hi han ngaihtuah ta i la. Khawkhên avânga harsatna tam tak a tâwk chung pawhin, Prisca-i chu leileh hun chhûngah pawh Nilainî leh Zirtâwpnî apiangin rawngbâwlnaah a tel ziah a. An khuaa mite chuan an nuihzata: “I thu hrilhna avângin i chhûngte chu an ṭâm dâwn,” an ti a. Prisca-i chuan: “Jehova’n a chhiahhlawhte chu a thlahthlam ngai lo,” tiin a chhâng a ni. Chumi hnu rei vak lovah, kan inawpna pâwl hnên aṭangin chhawmdâwlna a dawng ta a. Chu chuan a vêngte zînga mi ṭhenkhatte rilru a khawih êm avângin: “Pathian chuan a thlahthlam ngai lo che a, chuvângin a chungchâng tam lehzuala hriat kan duh,” tiin an sawi a ni. Tûnah, chûng zînga mi pasarih chuan radio aṭanga pêk chhuah inkhâwmte chu an ngaithla ve a ni.

 Tâwpna kan hnaih zêl rual hian, leilung chhiatna kan hmachhawn zêl dâwn a. (Matthaia 24:3, 7) Kan website-a donate.pr418.com-a thawhlâwm thawh dân hrang hrangte hmanga phal taka i thawhlâwm thawhte avângin kan lâwm hle a. Chûngte chu chhawmdâwlna atân a hun takah ṭha taka hman a ni.