Jehova chuan a mite zirtîr chu nuam a ti a. Chuvângin, a inawpna pâwl chuan school tam tak dinin zirlaite chu an mawhphurhnate hlen tûrin a ṭanpui a ni. Chûng school zînga pakhat chu Lalram Chanchin Ṭha Puangtute School (SKE) hi a ni a. Kum rei vak lo aṭang khân, Pathian inawpna pâwl chuan zir tûr thute chauh ni lovin, theocratic school-te neihna tûr inte lam pawh a ṭha thei ang berin a buatsaih a. A tum ber chu zirlaite leh zirtîrtute’n nuam taka zirna an neih theih nân a ni. Chutiang ni thei tûrin, i thawhlâwm thawhte chuan engtin nge min ṭanpui?

 Kum tam tak chhûngin, theocratic school-te chu Kingdom Hall and Assembly Hall-ah te neih a ni ṭhîn a. Mahse, engvângin nge tûn hnaiah theocratic school neihna tûr inte sak leh thawm ṭhat zêl a nih? Chhan pathum a awm a ni.

 Mamawh zualna. Jehova Thuhretute Governing Body Service Committee ṭanpuitu unau Christopher Mavor-a chuan:“Branch office-te chuan rawngbâwlna bialah mamawhna a nasat zia an sawi a. Entîr nân, kum 2019 khân, Brazil branch bialah chuan SKE school zir chhuak mi 7,600 vêl mamawh belh a nih thu chanchin kan dawng,” tiin a sawi. United States branch chuan khawpui liana a bîk taka huaihawt vântlâng hmaa thu hrilhnaah te, lawng chawlh hmuna thuhrilhnaah te leh, tân ina thuhrilhnaahte rawngbâwl thei tûra mi dangte zirtîrna pe thei pioneer tling takte mamawh an nih thu a sawi bawk. Local Design/Construction Department leh Hospital Liaison Committee-te nêna rawngbâwlho thei tûr unaupate pawh mamawh a ni a. SKE zir chhuakte chuan chûng mamawhna chi hrang hrangahte chuan an ṭanpui thei a ni.

 Zirlai tam lehzual. Branch tam tak chuan zirlai tam takte hnên aṭangin school-in a pawm theih zât aia tam dîlna lehkha an dawng a ni. Entîr nân, Brazil ramah branch chuan kum khat chhûngin SKE kal dîlna lehkha 2,500 vêl a dawng a ni. Mahse, school neihna tûr hmun indaih tâwk a awm loh avângin, branch chuan zirlai 950 chauh a la thei a ni.

 Awmna tûr ṭha. School chu Kingdom Hall-ah emaw, Assembly Hall-ah emaw neih a nih chuan, zirlaite chu tualchhûng unaute inah an thleng ṭhîn a. School neih zin lohna ramahte chuan, chu chu ruahmanna ṭha tak a ni a. Mahse, school neih zin a nihna hmunahte erawh chuan zirlaite tân thla tam tak chhûng tualchhûng unaute ina thlen chu a rem lo thei a. Chuvângin, school neihna tûr hmun nêna inhnaihah zirlaite awmna tûr inte buatsaihsak a ni.

 School neihna tûr classroom pakhat, zirtîrtute leh zirlai mi 30 bâwr vêlte awmna tûr in leh, an mamawh thil dangte buatsaih nân a ram leh mamawh dân azirin (U.S.) dollar maktaduai tam tak a ngai thei a ni.

 School-te chu khawpui pâwn lam hmun reh leh vântlâng lîrthei tamna hmun hnaihahte neih a ni tlângpui a. School ṭha taka a kal tluan theih nân leh a hmun leh hmanruate thawm ṭhatna lama ṭanpui thei thuchhuahtu tam tak awmna hmunahte neih chu duh thusâm a ni.

 School neihna hmunahte chuan library-te, lehkha enna hmunte, computer-te, printer-te leh, hmanraw dangte dah a ni a. A tlângpuiin zirlaite leh zirtîrtute chaw an kilhona tûr hmun pawh a awm ṭhîn a. Taksa lama insawizawina leh intihhlimna tûr hmun zau ṭha tak pawh siam a ni bawk.

 Classroom pawh ṭha taka buatsaih a ni a. “Zirlaite hahdam tak leh sâwt taka an zir theih nâna hmun nuam tak siam tûrin Theocratic Schools Department hnên aṭangin thurâwnte kan la,” tiin Warwick, New York Worldwide Design/Construction Department-a thawk unau Troy-a’n a sawi a ni. “Chuta thawk unaute chuan classroom zau lamte leh inrêlbâwl dânte bâkah mei êng leh audio-video hmanraw pawimawh tûrte chungchângah pawh kaihhruaina min pe a.” Audio hmanraw chungchângah, Hungary rama SKE zirtîrtu unau Zoltán-a chuan: “Tûn hma chuan, microphone kan neih loh avângin, zirlaite chu ṭawng ring tûra kan hrilh nawn fo a ngai ṭhîn a. Mahse, tûnah chuan dawhkân tinahte microphone pakhat ṭheuh dah a nih tawh avângin chutiang buaina chu a awm tawh lo!” tiin a sawi.

 Chutianga zirna hmun leh hmanruate ṭha lehzuala buatsaihna chuan zirtîrtute leh zirlaite chungah eng nghawng nge a neih? “Zirna hmun a nuamin a hahdam khawp mai,” tiin Palm Coast, Florida, U.S.A-a SKE zir chhuak unaunu Angela-i chuan a sawi a. “Classroom-te leh kan chênna hmunte pawh tiamin engkim mai hi fel taka ruahman a nih avângin zirnaah ṭha takin rilru kan pe thei a ni,” tiin a sawi belh bawk. Hungary rama zirtîrtu unau Csaba-a chuan a zirlaite nêna chaw kîlho theihna hun remchâng a neih chu a hlutzia heti hian a sawi a: “Zirlaite chuan an rilrua awmte leh an thiltawnte chu inhawng takin min hrilh ṭhîn a. Chu chuan, zirlaite min hriat chiantîr lehzual a. Chuvângin, zir tûr thute chu an mamawhte mila ṭangkai taka hman dân kan hriat phah fo a ni,” tiin.

 Zirlaite leh zirtîrtute chuan zirna hmun leh hmanraw ṭha zâwk an neih chu kan “Zirtîrtu Ropui Ber” Jehova hnên aṭanga lo kal malsâwmna angin an thlîr a. (Isaia 30:20, 21) SKE school atâna an siam thar hmuna zir chhuak Philippines rama unaunu pakhat chuan: “Zirna hmun nuam tak chuan zirlai mai ni lovin, Jehova mikhual hlu takte kan nihzia min hriat nawntîr a. A Thu chipchiar taka zirna chu nuam ti tûrin min duh,” tiin a sawi.

 I thawhlâwm thawhte avângin school zirna hmunte chu kan sa theiin, kan thuam ṭhain leh, kan vawng tha thei a; thawhlâwm a tam zâwk chu donate.pr418.com aṭanga thawh a ni. In thilphalna avângin kan lâwm lutuk e.