Kum 1912, June 1 chhuak Vênnainsâng chuan: “Kan thu leh hla chhuah chhiartu tam tak chuan mitdelte chungchâng chu an hre ngei ang a. Anni chuan a thlâwnin chhiar tûr an nei thei. . . . Mitdelte tâna siam, chu thu leh hla chhuah chu mitdelte chhiar theih tûra hawrawp pâwnga tihchhuah a ni,” tiin a târ lang a. Vênnainsâng chuan: “Mitdel tam tak chuan he khawvêla lo thleng tûr malsâwmna ni ropui chungchâng thuchah chu an ngaihlu hle a ni,” tiin a sawi belh a ni.

 Chûng thute ziah a nih lai chuan, tûna khawvêl pum huapa hman mêk Sâpṭawng mitdel hawrawp hi siam chhuah a la ni lo. Mahse, Jehova Thuhretute chuan mitdelte’n Bible thutak an hriat theih nâna kutzungṭang hmanga an chhiar theihna tur “hawrâwp pâwng” chu an siam chhuak dêr tawh a. Kan la siam belh zêl bawk! Tûnah phei chuan, mitdelte tâna kan thu leh hla chhuahte chu ṭawng 50 chuanga hmuh theih a ni tawh a ni. Chu chu engtia siam nge a nih?

 Mitdel hawrawp siam dân hmasa ber chu a thute mitdel hawrawpa ziak chhâwn hi a ni a. New York, Patterson Text Processing Services-a thawk Michael Millen-a chuan, “Tûn hma chuan, mitdel hawrawpte chu pâwn lamah kan lei ṭhîn a; mahse, ka mamawh ṭawng zawng zawng atân a hman theih loh a ni. Tûnah erawh chuan, Watchtower Translation System kan hmang tawh a, chu chuan mitdel hawrawp zawng zawng deuhthaw hi a ziak thei tawh a ni. He tiang hi khawiah mah hmuh theih a ni lo tih ka chiang,” tiin a sawi.

 Mitdel lehkhaah hian thu leh hla chhuaha thute mai bâkah milem hrilhfiahnate pawh a tel a. Entîr nân, Chatuanin I Hlim Thei! tih lehkhabu kâwma milem chu mitdel edition-ah chuan heti hian târ lan a ni: “Pa pakhat chu hnim hringte leh tlâng leh mualte hual vêl kawng nuam takah a kal.” Kohhranho rawngbâwltu leh pioneer ni bawk mitdel Jamshed-a chuan, “Hêng milem hrilhfiahnate hi ka tân chuan hlu tak a ni,” tiin a sawi.

 Ziak chhâwn a nih hnu chuan file-te chu mitdel thu leh hla chhuaha ker tûrin branch office-ahte thawn chhuah a ni ṭhîn. Hawrawpte ker huna lehkha puan a pawh loh nân leh vawi tam tak hman a nih hnu pawha hawrawpte a chhiat mai loh nân lehkha chhah tak hman a ni a. A dawtah, phêkte chu remkhâwmin, an thilkhâwma, kohhran thu leh hla chhuah thawnnaah emaw, a nih loh leh “mitdelte tân” tih lehkha belin an thawn chhuak a. A ṭûl chuan branch-te chuan mitdel, a nih loh leh khua hmu fiah thei lo unaute’n kohhran inkhâwma hman tûr thu leh hla chhuahte an neih theih nâna a rang thei ang bera thawn chhuak tûrin ruahmanna an siam bawk a ni.

 Chûng zawng zawng tân chuan hun leh sum tam tak mamawh a ni a. Wallkill, New York-a kan printery-ah hian mitdel hawrawpa Bible bu hnih tihchhuah nâna hun hman zât chu Bible bu pângngai 50,000 chhutchhuah nâna hun hman zât nên a inang a ni. Sâpṭawng mitdel Bible hi volume 25-a tihchhuah a ni a, hemi tichhuak tûr hian Bible pângngai pakhat tihchhuah nâna sênso zât lêt 123 aia tam sên a ni. Chûng volume 25-te tâna a kâwm siam man ringawt pawh dollar 150 (U.S.) lai a ni.

 Engtin nge mitdel thu leh hla chhuah siam chhuahnaa telte chuan an hnathawh chu an ngaih? South Africa branch-a rawngbâwl Nadia-i chuan heti hian a sawi: “Mitdel, a nih loh leh khua hmu fiah lo kan unaute nun hi a awl lo hle a; chuvângin, hetianga ka pui thei hi malsâwmnaah ka ngai. Jehova’n a hmangaihzia a lan chhuahtîrna a ni bawk,” tiin.

 Mahse, mitdel tu emawin mitdel lehkha chhiar thiam lo ta se engtin nge ni ang? Kum rei vak lo kal ta khân, Mitdel Lehkha Chhiar Zir Rawh tih lehkhabu chu tihchhuah a ni a, chutah chuan mitdel hawrawp leh hawrawp pângngai dah kawp a ni. Hei hi khua hmu theite leh mitdelte hman kawp tûra duan a ni a. Brochure rualin mitdel lehkha ziakna phêk leh a ziakna fung a tel a ni. Mitdel lehkha zirte chuan hêng hmanruate hi mitdel hawrawpte ker nân an hmang a. Hêng a ker zirna hian hawrawp tinte chu zirlaite a hriatrengtîr lehzualin an dap hunah pawh hre thiam tûrin a ṭanpui a ni.

 Engtin nge mitdelte leh khua hmu fiah lo unaute’n hêng thu leh hla chhuahte hi an hlâwkpui? Haiti rama awm Ernst-a chu mitdel thu leh hla chhuah pakhat mah a nei lovin inkhâwmahte a tel ṭhîn a. Chuvângin, school chanvoa a thusawi tûrte leh a chhânna pêk tûrte chu a by-heart a ngai ṭhîn a. Ani chuan: “Tûnah chuan, ka duh hun hunah bân pharin chhânna ka pe thei tawh a. Kan zain thlarau lam chaw thuhmun kan dawn vek avângin, unau inlungrual takte zînga tel ve tak tak ni hian ka inhre ta!” tiin a sawi a ni.

 “Kan mitdel thu leh hla chhuahte hi ka chhiar tawh thu leh hla chuah dangte aiin a fiah zâwk a. Entîr nân, phêk number-te a awm a, footnote-te a hmuh theih nghâl bâkah ṭha taka milem hrilhfiahna a tel bawk,” tiin Vênnainsâng leh Kohhrana Bible Zirna kaihruaitu Austria rama khaw hmu fiah lo kohhran upa Jan-a chuan a sawi.

 South Korea rama pioneer unaunu Seon-ok-i chu mitdel leh bengngawng a ni a. Tûn hma chuan inkhâwmah mi dangte kut vuanin, an zaizir chu a rinchhan a; mahse, tûnah chuan mitdel thu leh hla chhuahte chu a chhiar thei tawh a ni. Ani chuan: “Mitdel thu leh hla chhuah dangah chuan hawrawp ker hmaih te, a tlar kawi te, a nih loh leh a lehkha a pan êm avângtein hriatthiam a hrasa ṭhîn a. Mahse, Jehova Thuhretute’n lehkha puan ṭha zâwk an hman avângin chhun hante chu a fiah lehzual a, chu chuan chhiar a tiawlsam lehzual a ni. Bâkah, tûn hma chuan Bible ṭanchhan thu leh hla chhuahte chu mi dangte ṭanpuina tel lo chuan ka chhiar thei ngai lo va. Tûnah chuan mahniin ka chhiar thei tawh. Chu chuan chawlhkâr chhûng inkhâwmte atâna inbuatsaih theih tûr leh chhânnate pe thei tûra min ṭanpui avângin min tihlim tak zet. Kan mitdel thu leh hla chhuah zawng zawng chu ka chhiar vek a. Ka ‘âtchilh’ tawp a ni ber mai,” tiin a sawi.

 Kan thu leh hla chhuah dangte ang bawkin kan mitdel thu leh hla chhuahah pawh hei hi târ lan a ni: “He thu leh hla chhuah hi hralh a tân a ni lo. Khawvêl pum huap Bible zirtîr rawngbâwlna pêng pakhat a ni a, thawhlâwm hmanga chhawmdâwl a ni.” Donate.pr418.com aṭanga thawhlâwmte in thawh ṭhîn avângin kan lâwm e. Phal taka in pêk thawhlâwmte chuan mitdelte leh khaw hmu fiah lote pawh tiamin, mi zawng zawng chu thlarau lam chaw dawng thei tûrin a ṭanpui a ni.