Latin America rama awm mi maktakduai tam takte zîngah, mahni tualchhûng ṭawng leh hnam dân hrang nei maktaduai tam tak an awm a. Hêng ram leilung fate zînga tam tak hi an hnam dânte ngaihlutu, thlarau lama kan unaute an ni. Mite thlarau lama ṭanpui nân, Jehova Thuhretute thu leh hla chhuahte chu Latin America-a ram leilung fate ṭawng hman 130 chuanga letlingin, an sem chhuak bawk. a Mahse, an zînga ṭhenkhat chuan Jehova chhiahhlawh nih an thlan avâng leh Bible nêna inmil lo an tualchhûnga lâr tak hnam dânte an zui ve loh avângin dodâlnate an tâwk a. Engtin nge i thawhlâwmte chu anmahni ṭanpui nâna hman a nih?

 Mexico rama Jalisco State tlângrama Huichol mite zînga awm unaute chuan an chhia leh ṭha hriatnain a phal loh avângin sakhaw thiltihtea tel chu zahthiam takin an hnâwl a. b Mahse, hei hian an khawtlânga mi ṭhenkhatte a tithinur hle. Kum 2017 December ni 4 khân, Jehova Thuhretute leh an zînga awm mi ṭhenkhatte chu mipui thinurin an bei a. Mipuite chuan khua aṭangin an hnawtchhuak a, an thil neihte an tihchhiatsak bâkah, an rawn lêt leh a nih chuan thahah an vau a ni.

 A bul hnai khuaa awm Thuhretute chuan kan unaute chu an ṭanpui nghâl a. Mahse, ina an haw leh theih nân eng thilte nge tih ngai? “Ukil ruai tûrin sum kan nei lo va, dân lama thurâwn min petu tûr pawh hriat kan nei lo,” tiin unau Agustín-a chuan a sawi.

 Kan unaute’n zalên taka Pathian an biakna beih a nih aṭangin Central America branch chuan rang takin hma a la nghâl a. A hmasain, tualchhûnga thuneitute chu hêng dân bawhchhiatnate chhui chiang tûr hian an ngên a. A dawtah, Jehova Thuhretute Governing Body-a Coordinators’ Committee hnên aṭangin world headquaters-a Legal Department nêna thawkho tûr leh Huichol unaute tâna thubuai theh lût tûra phalna an dawng a ni. Thu buai chu zawi zawiin Mexico-a court sâng ber, Supreme Court of Justice of the Nation-ah a thleng ta a.

 International team-a ukilte chu ram leilung fate hnam dân hi mi dangin an zah ngei a ngai ang bawkin, tualchhûnga mite pawhin an mi leh sate zalênna chu an zahin an humhim tûr a ni tih fiah taka hrilh turin an inbuatsaih a ni. Mihring dikna chanvo hian ramri a nei lo.

 Kum 2020 July ni 8 khân, Supreme Court of Justice chuan Jehova Thuhretute chu hnehna an chantîr a. Khua aṭanga an hnawh chhuah zawng zawngte chu lêt leh phalsak tûrin an tualchhûnga mite chu thu a pe bawk a ni. A hmaa kan sawi tâk, Agustín-a chuan amah leh mi dangte lâwmzia heti hian sawi: “Unaute’n kan tâna min tihsakte avângin kan lâwm tak zet a. Min ṭanpui lo se chuan, engmah kan ti thei lo vang,” tiin.

 Chutih lai chuan, Ecuador rama Otavalo ram leilung fa tam takte chênna Phairuama awm, San Juan de Ilumán khuaa unaute pawhin chutiang chiah harsatna chu an tâwk a. Kum 2014 khân Kingdom Hall sa tûra phalna neih ngai zawng zawng an neih hnuah an sa ṭan a. Mahse, puithiam pakhatin mi 100 chuang vêl rawn hruaiin an hnathawh chu an tâwptîr a. A hnuah, tualchhûnga mite chuan Jehova Thuhretute chu inkhâwm tawh lo tûrin thu an pe bawk.

 Ecuador branch leh world headquarters-a legal department-te chu he biakna atâna zalênna rahbehsakte humhim tûr hian an thawk dûn a. Kan unaute chuan chu thu buai chu court-ah an thlen a. He hmalâkna hian tualchhûnga mite chu unaute dodâl tawh lo tûr leh kohhran inkhâwmte neih leh phalsaka, Kingdom Hall pawh sak chhunzawm a phalsak a ni. Mahse, hma lam huna kan unaute vênhim nân, kan aiawhtute chuan court hnênah zawhna pawimawh tak: Ram leilung fate’n international human rights dânte an zah tûr a ni em? tih hi an zâwt a ni.

 Kum 2020 July ni 16 khân, chu rama court sâng ber Constitutional Court of Ecuador chuan thu buai chu a ngaihtuah a. Ecuador rama ukil kan unaute chu kohhran tân an ding a ni. Chu bâkah, khawvêl puma hetiang lama tawn hriat nei unaupa palite pawhin court-ah an dinpui bawk. COVID-19 khuahkhirhnate avângin, ram hrang hrang aṭangin videoconference hmangin thu an sawi a ni. Hei hi court-in khawvêl puma Jehova Thuhretute aiawhtu legal team-te hetianga thusawi a phalsakna hmasa ber a ni bawk. c Team chuan international legal authorities chu lehkha thawnin mi chu ram leilung fate zînga a chên avang maiin, a mi mal dikna chanvo rahbehsak theih a nih lohzia tih tichiang tûrin a ngên a ni.

 Otavalo Phairuama awm kan unaute chuan Constitutional Court thu tlûkna chhuah hun chu an nghâkhlel hle. Chutih rualin, ṭanpuina an dawnte avângin an hlim hle bawk. Ilumán Quichua Kohhrana upa César-a chuan heti hian a sawi: “Jehova chauhvin a inawpna pâwl kal tlangin, mi tlêmte tan thil tam tak a tithei,” tiin.

 Thu buai ngaihtuahnaa tel ukilte chu Jehova Thuhretute vek an ni a, dân lama an thiamnate chu phût lêt nei lovin hlim takin an hmang a ni. Mahse, hêng thu buai theh lût tûr te, lo inbuatsaih tûr te, leh court-a sawi tûrtein hun leh sum tam tak sên a ngai a. Kan ukilte leh unau dangte chuan dân lam thila lehkha pawimawhte lo inbuatsaih nân dârkâr 380 chuang an hmang a, chûng lehkha pawimawhte chu Mexico rama hman tûra lehlin nân dârkâr 240 dang an hmang bawk a ni. Khawvêl puma ukil 40 dâwn laite chuan Ecuador rama thu buai atân dârkâr a za têl an hmang bawk. Kan unaute humhimna atâna sênso chu engtin nge kan phuhhrûk theih ang? Kan website donate.pr418.com-a hrilhfiahna angin kawng hrang hranga in thawhlâwm thawhte chuan a phuhru a ni. In thilphalna avângin kan lâwm e.