Kum 2022 chhûng khân, indona te, sumdâwnna tlâk chhiatna te, leh kan chhehvêla chhiatna hrang hrang thlengte chuan chanchin tharte chu a luah khat hneh hle a. Chûngte a thlen chhan dik tak chu Bible chauhvin a hrilhfiah thei a ni.

Kum 2022 chhûnga thilthlengte a thlen chhan dik tak

 Kumin chhûnga thilthlengte hian Bible-in ‘ni hnuhnûng’ tia a sawi hunah kan awm tawh tih chiang takin a nemnghet a. (2 Timothea 3:1) Chu hun chu kum 1914 aṭangin a inṭan a ni. Tûn hnaia thilthlengte leh Bible-in kan tûn lai huna thilthleng tûr a sawi lâwkte a inmil dân hi lo chhinchhiah ang che:

 “Indo.”—Matthaia 24:6.

•   “Kum 2022-ah Europe Khawmualin Indona Sawhkhâwk Râpthlâk Tak A Hmachhawn Leh.” a

 “Ṭâmte.”—Matthaia 24:7.

•   “2022: Ṭâm Nasa Tak A Tlâk Kum.” b

 “Hrite.”—Luka 21:11.

•   “Polio hri a lêng leh a, Monkeypox pawh buaipui tham khawpin a lêng a, COVID-19 pawhin chhiatna nasa tak a la thlen reng bawk. Hêngte hian inkai chhâwn theih hrite a hlauhawmzia leh mihringte’n tihtheih kan neih tlêmzia chiang takin a târ lang a ni.” c

 “Thil hlauhawmte.”—Luka 21:11.

•   “Sik leh sa nasa taka lum chhohna te, khawkhêng te, ram kâng te, leh tuiliante. Kum 2022 nipui kha, sik leh sa nasa taka inthlâkin a thlen chhiatna avâng te, mi tam takin an nun an chân avâng te, leh mi maktaduai têlin an in leh lo an chân avângtein hriat a ni reng tawh ang.” d

 ‘Buaina.’—Luka 21:9.

•   “Ei leh bâra harsatna; a bîk takin, thil man a kai chhoh êm avânga mipuite thinrimna chu a so sâng hle a, chu chuan kum 2022 chhûng khân tûn hma zawng aia nasain sawrkâr laka lungawi lohna a thlen a ni.” e

Nakumah eng nge thleng dâwn?

 Kum 2023-a thil thleng tûrte chu tu man kan hre lo. Chutih rualin, kan hma lawkah Pathian Ram, a nih loh leh vân sawrkâr chuan he leiah hian inthlâk danglamna nasa tak a rawn thlen ang tih erawh kan hria a ni. (Daniela 2:44) Chu sawrkâr chuan mihringte hrehawm tawrhna thlentu zawng zawng a rawn nuai bo vek ang a, he leiah hian Pathian duh zâwng a thlentîr ang.—Matthaia 6:9, 10.

 Khawvêla thilthlengte’n Bible hrilh lâwknate a thlen famkimtîr dân “ngaihven reng” tûra Isua thupêk chu zâwm tûrin kan fuih a che. (Marka 13:37, Baptist Mid-Missions’ Translation) Bible-in tûna a ṭanpui theih dân che leh i chhûngte nêna nakin hun ṭha zâwk beiseina a pêk theih dân che u hre tûrin min rawn be pawh ang che.