NGAIHVEN RENG RAWH U!
Kum 2023 Beisei Chhan Tûrte—Bible-in Eng Nge A Sawi?
Kum 2023 a inṭan rualin, kan za hian mahni tân leh kan chhûngte tân thil ṭha ber a rawn her chhuah kan beisei ṭheuh va. Engvângin nge hma lam hun hi a êng zâwnga kan thlîr theih?
Bible-in beiseina min pe
Bible chuan tûna kan hmachhawn mêk buainate hi rei lote chhûng chauh a niin, tihtâwp a ni thuai ang tih chanchin ṭha min hrilh a. Dik tak chuan, Bible chu ‘Pathian Lehkha Thua thlamuanna hmua beiseina kan neih theihna tûra keimahni min zirtîrna turin ziak a ni.’—Rom 15:4.
Bible thutiamte chungchâng hriat belh nân, “Nakin Hun Ṭha Zâwk Beiseina Dik Tak,” tih thuziak chu chhiar rawh.
Tûna ṭanpui theitu che beiseina
Bible pêk beiseina chu ‘nunna thîrchakai’ ang a ni thei a. (Hebrai 6:19) Chu beiseina chuan min tichak thei a ni. Kan tawh mêk buaina hmachhawn thei tûr te, rilru put hmang dik nei tûr te, leh hlimna tluantling hmu thei tûrtein min ṭanpui thei a ni. Entîr nân:
Bible pêk beiseinain ruihhlo ngai mi pakhat a ṭanpui dân hi en rawh. Ka Nun Dân Ka Ning, tih video chu en rawh.
Bible pêk beiseinain thihnaa kan hmangaih tak kan chân huna min ṭanpui theih dân chu hmu rawh. Lusûnte Thlamuanna, tih video chu en rawh.
I beiseina tinghet rawh
Mi tam tak chuan thil ṭhate lo thleng tûrin an beisei a; mahse, an beisei anga thil a thlen dâwn leh dâwn loh chu an hre chiang lo. Bible thutiamte erawh a danglam a ni. Engvângin nge? Bible thutiamte chu ‘dâwt sawi thei lo’ Pathian Jehova a hnên aṭanga lo kal a nih vâng a ni. (Tita 1:1, 2) Pathian Jehova chauhvin a thutiam zawng zawng thlen famkimtîr tûrin thiltihtheihna a nei a; ani chuan “a duh apiang chu a ti” thei a ni.—Sâm 135:5, 6.
Rinchhan tlâk Bible pêk beiseina hlâwkpui tûrin hawihhâwm takin kan sâwm a che. ‘Pathian Lehkha Thu’ Bible bih chianna hmangin i beiseina chu i tinghet thei a ni. (Tirh. 17:11) Man chawi ngai lova kaihruaitu nêna Bible Sawihona chu nangmah ngeiin neih tum rawh. Kum 2023 chu beiseina nên thlîr rawh!
a Jehova chu Pathian hming bil a ni.—Sâm 83:18.