Kum tin hian, Isua thupêk angin, Jehova Thuhretute leh khawvêl puma an mi sâwm mi maktaduai tam takte chu a thihna Hriatrengna hmang tûrin an kalkhâwm a. (Luka 22:19) He Hriatrengna hian Isua’n mihringte tâna a nun pea min tih sakte hlutna hre thiam tûrin min ṭanpui a ni. A inpêkna chuan—tûnah leh hma lam hun atân—kan tâna awmzia a neih dânte a târ lang bawk a ni.—Johana 3:16.

 Kumin Hriatrengna chu i hmang emaw, hmang lo emaw pawh ni se, inthawina atâna Isua thihna chu engtin nge i hlâwkpui theih ang? Isua chuan kan tih ngai thil pawimawh pahnih min zirtîr a:

1.  1. Pathian leh Isua chungchâng zir rawh. A Pa vâna mi hnêna a ṭawngṭai khân, Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a sawi a ni.—Johana 17:3.

2.  2. I thu hriatte chu nunpui rawh. Isua chuan a zirtîrnate chu a taka kan nunpui a pawimawhzia a sawi uar a. Entîr nân, Tlâng Chunga Thusawi hmingthang tak chu “[a] thu hriaa zâwm apiang” fakin a titâwp a ni. (Luka 6:46-48) Chutiang bawkin, ṭum dangah pawh: “Chûng thil chu in hriat chuan ti ula in eng a thâwl ang,” tiin a sawi a bawk.—Johana 13:17.

 Pathian leh Isua chungchâng chu zir belh i duh em? I thil zirte nunpui thei tûra ṭanpuitu thurâwn ṭangkai tak takte chu hriat i duh em?

 A thlâwna Bible sawihona phûrawm tak chuan mi tam tak chu Bible zir chiang a, a taka nunpui tûrin a ṭanpui tawh a ni.

•   Hemi sawihona chungchâng hriat belh nân Kaihruaitu Nêna Bible Zirhona phêk chu en rawh.

•   Jehova Thuhretute nêna Bible zirhona chu eng ang nge tih hriat nân Bible Sawihona Nuam Tak Nei Ang Che tih video chu en ang che.

 Jehova Thuhretute chu Kingdom Hall tia koh biakna hmunah chawlhkâr tin vawi hnih an inhmukhâwm ṭhîn a. Hêng inkhâwmahte hian Bible leh a zirtîrnate kan nunpui theih dân sawiho a ni.

 Hêng inkhâwmahte hian tu pawh tel theih a ni a; Thuhretu i nih kher a ngai lo. I awmna vêng chhûng dinhmun azirin inkhâwmna hmunah lo kalin emaw, videoconference hmangin emaw i tel thei a ni.

•   Hêng inkhâwmahte hian eng nge i beisei theih tih thlîr lâwk nân Kingdom Hall-ah Eng Nge Thleng Ṭhîn? tih video chu en ang che.

•   Inkhâwmna hmun hnai ber zawn nân Jehova Thuhretute Kohhran Inkhâwm tih phêk chu en ang che.

 Hemi website-a thuziak leh video-te hian Isua zirtîrna chungchângte leh inthawina atâna a thihna hlutna chungchângte zir belh tûrin a ṭanpui thei che a ni.

 Entîr nân, mi pakhat thihna chu mi maktaduai tam takin an hlâwkpui theih dân hre turin, “Isua’n Min Chhandam—Engtin Nge?” tih leh “Engvângin Nge Isua Hrehawm Tuara A Thih?” tih thuziakte chu i chhiar thei a, Engvângin Nge Isua A Thih? tih video chu i en thei bawk.