Tûn hnai mai khân, khawvêl hruaitu te, scientist-te, leh khâwl lama mi thiamte chuan khâwl thluak nei (AI) thiltihtheihzia chu an fak a. A ṭhatzia an sawi rualin, hman sual theih a nih avânga an hlauhthâwn thu pawh an sawi bawk a ni.

•   “AI hi tûn laia khâwl lam thiamna nei zînga thiltithei ber a ni a, hei hian mihringte nun pawh a tihmasâwn hle thei bawk. . . Chutih rualin, AI hian mihringte râlmuanna leh himna chu nasa taka a tihderthâwn theih bâkah, mi tin neih dikna leh awm fâl duhna pawh a bawhchhiain, democracy rama mipui vântlâng rinna pawh a ei chhe bawk a ni.”—Kamala Harris, vice president of the United States, May 4, 2023.

•   “He khâwl thluak nei (AI) hian hrisêlna lamah kawng ṭhenkhata a tihhmasâwn theih rualin, kawng dangin kan tisa lam leh rilru lamah harsatna min thlen thei bawk,” tiin international group of doctors and health-care lama mi thiam Dr. Frederik Federspiel-a chuan May 9, 2023-a tihchhuah BMJ Global Health a tih lehkhabua thuziak pakhatah a ziak a ni.

•   “AI hi mite’n chanchin dik lo thehdarhna hmanrua atân an hmang dêr tawh a. Hei hian hna min la chântîr thuai thei bawk. Tûn lai thiamna hmanga hnathawktu ṭhenkhat chuan AI hian mihringte hi dinhmun hlauhawmah a la dah thuai ang tih an hlauthâwng hle a ni.”—The New York Times, May 1, 2023.

 AI hi thil ṭha atân nge thil ṭha lo atâna hman a ni dâwn tih chu hunin a la hril ang. A nih chuan, Bible-in eng nge a sawi?

 Bible-in mihringte hian khâwl lama an thiamnate’n ṭhatna chauh a thlen ang tih an tiam theih loh chhan a sawi a.

1.  1. Mite hian thiltum ṭha tak nei mah se, an thiltihin sawhkhâwk ṭha lo a neih dâwn leh dâwn loh an hre lâwk thei lo.

   •   “Mi ngaiha kawng dik ni âwm taka lang, a tâwp chu thihna kawng ni si a awm.”—Thufingte 14:12.

2.  2. Miin a hnathawhna atâna a hman—a nih loh leh hman sual—dân tûr chu mi dangin an thunun thei lo.

   •   “Ka hnua lo awm tûr atân chuan [ka hnathawh hi] ka hnutchhiah tûr a ni mai si a; mi fing a nih leh mi â a nih pawh tu nge hria ang? Mahse, ka thawhrimna zawng zawnga ka thiltihte chungah leh ni hnuaia finna hmanga ka thawhrim rah zawng zawng neitu a ni mai dâwn si a.”—Thuhriltu 2:18, 19.

 Chûng lungkhamnate chuan min Siamtu hnên aṭanga lo kal kaihhruaina kan mamawhzia a târ lang a ni.

 Min Siamtu chuan mihring atu amah, a nih loh leh mihringte siam chhuah khâwl lam thiamna a enga mah hian kan chênna leilung leh mihringte hi a tihchhiat a phal ngai lo vang.

•   “Lei hi erawh chu a awm reng mai.”—Thuhriltu 1:4.

•   “Mi felte chuan ram hi an luah ang a, a chhûngah hian kumkhuain an awm ang.”—Sâm 37:29.

 Min Siamtu chuan Bible aṭangin remna leh muannaa khat hma lam hun min neihtîr theitu kaihhruaina min pe a. Chumi chungchânga Bible sawite hriat belh nân, hêng thuziakte hi chhiar ang che “Nakin Hun Muanawm Tak Nei Tûrin Kaihruaitu Rin Tlâk A Awm Em?” tih leh “Nakin Hun Ṭha Zâwk Beiseina Dik Tak” tih hi.