“Ngaihtheihna chu remna awm theih nâna mize pawimawh tak a ni.”—UNESCO Declaration of Principles on Tolerance, 1995.

 Kawng leh lamah chuan, ngaihtheih lohna chuan inzah lohna leh inhuatna hial a thlen thei a. Mite’n chutiang rilru put hmang an neih chuan inhuatna thute sawiin mi dangte an en hrang a, tharum thawhna hial pawh a thleng ṭhîn.

 Mahse, mite’n ngaihtheihna awmzia an hriat dân erawh a inang lo va. Mi ṭhenkhat chuan thil ngaithei takte chuan thil chîn leh nungchang eng pawh chu an pawm tûr a ni tih ngaih dân an nei a. Mi dangte erawh chuan Bible sawi chu thlâwpin, thil ngaithei takte chuan pawm loh chin nei mah se, mite’n nungchang leh rinna chungchânga mi mal zalênna an neih chu an zahsak a ni.

 Bible-in tûn laia mite chu thil ngaithei tak ni tûrin a ṭanpui thei em?

Bible-in ngaithei tûra min hrilh chhan

 Bible chuan thil ngaithei tak ni tûrin min zirtîr a. “In dawhtheihzia mi zawng zawng hriat ni rawh se,” tiin a sawi. (Philippi 4:5) Bible chuan mi dangte hmakhua ngai tûrte, hawihhâwm tûrte leh, dik taka thil ti tûrtein min fuih a ni. Chu fuihna nunpuitute chuan mi dangte ngaihhlut zâwngte chu ṭâwmpuiin pawmpui lo mah se, an duh thlanna siam chu an zahsak a ni.

 Chutih rualin, Bible chuan Pathianin mihringte tân nungchang lama tehnate a siam tih a târ lang a. “Aw mihring, [Pathianin] thil ṭha chu a entîr tawh che a ni lâwm ni?” tiin a sawi a ni. (Mika 6:8, C.L Re-edited.) Mite’n nun ṭha ber an chen theih nân Pathian kaihhruaina chu a târ lang a ni.—Isaia 48:17, 18.

 Pathianin mi dangte sawisêl tûrin thuneihna min pe lo va. “Dân petu leh rorêltu pakhat chauh a awm . . . Nang ṭhenawmte sawisêltu chu tu nge maw i nih le?” tiin Bible chuan a sawi. (Jakoba 4:12) Pathianin zalên taka duhthlan theihna min pe ṭheuh va; mahse, a mawh chu kan phur ṭheuh dâwn a ni.—Deuteronomy 30:19.

Mi dangte zahna chungchânga Bible sawite

 Bible chuan “mi zawng zawng zah” tûrin min hrilh a. (1 Petera 2:17, C.L Re-edited.) Bible tehna nunpuitute chuan mite rinna leh nun dân chu eng pawh ni se, mi zawng zawng zah takin an cheibâwl a ni. (Luka 6:31) Chutih rualin, Bible thu zâwmtute chuan mite rin dân leh ngaih dân zawng zawng chu pawmpuiin an thu tlûkna siam apiangte chu an thlâwp dâwn tihna a ni lo. Chu aiin, mite chu zah lo taka chebâwl lovin, Isua’n mite a cheibâwl dân chu entawn tûrin theih tâwp an chhuah zâwk a ni.

 Entîr nân, ṭum khat chu Isua’n sakhaw dang betu hmeichhe pakhat a tâwk a. Chu hmeichhia chuan a pasal ni lo mipa pakhat a chênpui a—chu chu Isua duh loh zâwng nun dân a ni a. Chuti chung chuan, ani chu zah takin a bia a ni.—Johana 4:9, 17-24.

 Isua angin Kristiante chu an thurin hre duhtute hnêna hrilhfiah tûrin an inpeih reng a; chutianga an hrilhfiah hunah “zah takin” an hrilh a ni. (1 Petera 3:15, Mizo King James Bible.) Bible-in Kristiante chu an rin dân mite pawm tûra tilui lo tûrin a zirtîr a. Krista hnungzuitu chuan rinna hran neite pawh telin tu mah ‘a do tûr a ni lo va, mi zawng zawng chungah a zaidam’ tûr a ni tih a sawi a ni.—2 Timothea 2:24.

Inhuatna chungchânga Bible sawite

 Bible chuan “mi zawng zawng nêna inremna . . . ûm” tûrin min hrilh a. (Hebrai 12:14) Remna ûmtu chuan inhuatna a hnâwl a. A ngaihhlut zâwngte kalha awm chuang si lovin, mi dangte nêna inrem taka awm tûrin theih tawp a chhuah a ni. (Matthaia 5:9) Dik tak chuan, Bible-in Kristiante chu anmahni ṭha lo taka cheibâwltute chunga ngilneihna lantîrna hmanga an hmêlmate hmangaih tûrin a fuih bawk a ni.—Matthaia 5:44.

 Ni e, Bible chuan mi dangte hming tihliauva, anmahni tina thei thiltihte chu Pathianin a ‘hua,’ a nih loh leh a ‘ten’ tih a sawi a. (Thufingte 6:16-19) He Bible chânga ‘hua’ tih ṭawngkam hian thiltih ṭha lote nasa taka duh lohna a kâwk a ni. Bible chuan Pathianin a tehnate mila an nun dân thlâk danglam duhtute chu a ngaidamin ṭanpui a inhuam tih a târ lang.—Isaia 55:7.

Ngaihtheihna leh mi dangte zahna nêna inkûngkaih Bible chângte

 Tita 3:1, 2: ‘Mi zawng zawng lakah thuhnuairawlhna tinrêng tilangin nunnêm rawh u.’

 Matthaia 7:12: “Thil engkim miin in chunga an tiha in duh tûr ang apiang chu, mi chungah pawh ti ve rawh u.”

 Josua 24:15: “Vawiinah hian tu rawng nge in bâwl dâwn thlang mai rawh u.”

 Tirhkohte 10:34: “Pathianin mi duhsak bîk a nei lo.”

 Habakuka 1:12, 13: ‘[Pathianin] thil sual a hmu thei lo.’

 Rom 12:19: “Pathian thinurna kian zâwk rawh u, ‘Phuba rêng rêng keima lâk tûr a ni, keiman ka thungrûl ang,’ Lalpain a ti.”

 Pathian Jehova chuan phuba la tûrin tu mah phalna a pe lo va. A hun ruatah rorêlna dik a kengkawh dâwn a ni. Hriat belh nân, “Will the Cry for Justice Be Heard?” tih thuziak chu chhiar ang che.