“Boruak chhiatna kan la hmachhawn thuai ang. Khawpui lian tak takte chu tuiin a chim pil ang. Tûn hmaa la awm ngai lo khaw lum tak pawh kan tuar ang. Thlipui râpthlâk takte kan tâwk ang. Hmun tinah tuite chu a vâng hle ang. Thing leh mau leh nungcha maktaduai hrang tam takte chu mang vek thei dinhmunah an awm a ni. Hei hi thawnthu leh sawiuarna mai a ni lo. Khawvêl sawrkârte’n an chakna hman dân an thlâk danglam loh chuan, a rahchhuah tûr a ni.”—Kum 2022, April 4-a tihchhuah Intergovernmental Panel on Climate Change chungchânga United Nations-a secretary-general António Guterres-a thusawi.

 “Scientist-te chuan kum lo awm tûrahte hian boruak inthlâk danglamnain [United States ram chhûnga] national park 423 zawng zawng deuhthaw chu, a bîk takin, khaw lum chho zêl avângin tihchhiatin a awm theih thu an vaukhân a. Thil ṭha lo, lo thleng theite chu Bible-a kan chhiar ṭhin chhiatnate nên a inang khawp mai: kâng mei leh tui lian te, tui khal lian tak tak a tui ral te, tuifinriat tui sâng chho zêl te, leh thli lum lutukte hi.”—“Flooding Chaos in Yellowstone, a Sign of Crises to Come,” The New York Times, June 15, 2022.

 Leilung chhehvêl boruak chhia chu siam ṭhat theih a ni ang em? Siam ṭhat theih a nih chuan, tuin nge siam ṭha ang? Bible-in chiang taka a sawite hi han ngaihtuah teh.

 Bible chuan Pathianin “lei tichhetute chu a tichhe ve thung” ang tih a sawi a. (Thu Puan 11:18) He Bible châng hian thil pathum min zirtîr a ni:

1.  1. Mihringte thiltih hian leilung a tichhe nasa hle ang.

2.  2. Leilung tihchhiatna chu a la tâwp ang.

3.  3. Mihringte ni lovin, Pathianin leilung chhehvêl boruak chhia chu a siam ṭha ang.

 Bible chuan “lei hi erawh chu a awm reng mai” tiin a sawi. (Thuhriltu 1:4) A chhûngah chuan mi chêng an awm reng ang.

•   “Mi felte chuan ram [“lei,” NWT] hi an luah ang a, a chhûngah hian kumkhuain an awm ang.”—Sâm 37:29.

 Kan chênna leilung chu ṭha famkima siam ṭhat leh a ni ang.

•   “Thlalêr leh ram pilril chu a lâwm ang a; ram ro chu a hlimin phûl pangpâr angin a pâr ang.”—Isaia 35:1.