Kum 2022, May 19 khân, United Nations Security Council chuan “COVID-19 hripui leh boruak inthlâk danglamnain a thlen khawvêl pumhuap ei leh in harsatna chu Ukraine indona avângin a zual nasa hle a, khawvêl hmun ṭhenkhatah ṭâmna a thlen thu,” thuneihna sâng tak chelhtu mi 75 chuangte hnên aṭangin chanchin a dawng a ni. Chumi hnu rei vak lovah, The Economist magazine pawhin, “buainaa khat he khawvêl hian indona avângin mi tam tak chungah ṭâmna a thlen,” tiin a sawi bawk. Bible chuan tûn kan hunah hian ei leh in harsatna a thlen tûr thu a sawi lâwk a; mahse, chûngte hmachhawn thei tûra ṭanpuina pawh a târ lang bawk.

•   Isua chuan: “Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah ṭâmte a tla ang,” tiin a sawi lâwk a ni.—Matthaia 24:7.

•   Bible-a Thu Puan bu chuan entîrnei sakawr chungchuang pali chungchâng a sawi a. Chûng sakawr chungchuang zînga pakhat chuan indona a entîr a. A dawtah chuan ei leh inte a to êm avânga harsatna a awm hun, ṭâmnain a entîr sakawr dangin a rawn zui a ni. “Sakawr dum ka hmu a. A chunga chuang chuan a kutin bûkna a keng a. . . . aw ka hria a, ‘Ni khat hlawhin buhpui kg. khat, ni khat hlawhin barli kg. thum,’” tih hi.—Thu Puan 6:5, 6, C.L. Re-edited.

 Ei leh in harsatna chungchânga hêng Bible hrilh lâwknate hi Bible-in ‘ni hnuhnûngte,’ tia a sawi tûn kan hunah hian a thleng famkim mêk a ni. (2 Timothea 3:1) ‘Ni hnuhnûngte,’ chungchâng leh Thu Puan bua sakawr chungchuang palite chungchâng hriat belh nân, Kum 1914 Aṭangin Khawvêl A Inthlâk Danglam tih video chu en la, “Sakawr Chungchuang Palite Tute Nge An Nih?” tih thuziak chu chhiar rawh.

•   Bible-ah hian ei leh in man sânna, a nih loh leh ṭâmna pawh tiamin, dinhmun khirh takte hmachhawn thei tûra min ṭanpuitu thurâwn ṭangkai takte a awm a. “Sum Tlêm Zâwk Neia Nun Dân,” tih thuziaka entîrna ṭhenkhat chu chhiar rawh.

•   Chu bâkah, Bible chuan dinhmunte a rawn ṭha dâwn tih beiseina min pe bawk. ‘Leiah buh tam tak a awm ang,’ tih leh mi tinin ei tûr tam tak an nei tawh ang tih min tiam a ni. (Sâm 72:16) Nakin hun atâna Bible thutiam beiseina leh chu thutiam kan rin theih chhan chungchâng hriat belh nân “Nakin Hun Ṭha Zâwk Beiseina Dik Tak,” tih thuziak chu chhiar rawh.