NGAIHVEN RENG RAWH U!
Engvângin Nge Inhuatna A Hluar Em Em?—Bible-in Eng Nge A Sawi?
Inânkhumna te, inpâwng huatna te, hnam leh hnam inpâwng nuaina te leh, indonate chuan chanchin a luah khat vek a ni.
“Israel leh Gaza inkâr buaina avânga inhuatna so sâng zêl leh mi firfiakte avângin inânkhumnate chuan social media-ah hmun a luah khat.”—The New York Times, November 15, 2023.
“October 7 aṭangin, khawvêl chu inpâwng huatna avângin tûn hma zawng aiin inânkhumna leh tharum thawhna hlîrin a khat.”—Dennis Francis, president of the United Nations General Assembly, November 3, 2023.
Inânkhumna te, tharum thawhna te leh, indonate chu thil thar a ni lo va. Dik tak chuan, Bible-in ‘thal anga thu khâ-tea [intin]’ ṭhîn mite, indo hrât tak te leh, mi nunrâwng takte chungchâng a târ lang a. (Sâm 64:3; 120:7; 140:1) Mahse, Bible chuan tûn laia kan hmuh inhuatna hian awmze pawimawh tak a neih thu min hrilh a ni.
Inhuatna—Kan tûn hun chhinchhiahna
Bible chuan tûn laia inhuatna a hluar êm êm chhan pahnih a târ lang a.
1. Chu chuan ‘mi tam zâwkte hmangaihna a daih’ tûr hun a sawi lâwk a ni. (Matthaia 24:12) Hmangaihna lantîr aiin, mite chuan inhuat tawnna an neihzia târ langtu rilru put hmangte chu an lantîr zâwk ang.—2 Timothea 3:1-5.
2. Tûn laia inhuatna hluar tak chuan Diabol Setana’n mite tihchhiat leh thunun a tum nasatzia a târ lang a. Bible chuan “khawvêl pumhlûm hi mi sual thu thuin a awm,” tih a sawi.—1 Johana 5:19; Thu Puan 12:9, 12.
Mahse, Bible chuan Pathianin inhuatna lo chhuahna hnâr chu a zung chawpa a nuai bo tûr thu pawh a sawi bawk. Chu mai bâkah, inhuatna avânga lo awm hrehawm tawrhna zawng zawng pawh a nuai bo bawk ang. Bible chuan heti hian min tiam a ni:
Pathianin “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin a sawi.—Thu Puan 21:4.