Firfiaka chêtna a thlen hnu lawkah, heti hian i inzawt mai thei: ‘Pathianin a ngaihven em? Engvângin nge hêng thilte hi a thlen? Firfiaka chêtna a hi a tâwp ngai ang em? Engtin nge hlauhna nei chunga ka nun reng theih ang?’ tiin. Bible-in hêng zawhnate chhânna lungawithlâk tak hi a pe a ni.

 Pathian chuan tharum thawhna leh firfiaka chêtna chu a hua a. (Sâm 11:5; Thufingte 6:16, 17) Pathian aiawhtu Isua pawhin a zirtîrte’n tharum an thawh khân a zilh a ni. (Matthaia 26:50-52) Mi ṭhenkhatin Pathian hminga tharum thawhin insawi mah se, chutianga ti tûr chuan Pathianin a ti lo. A nihna takah chuan, chutiang mite ṭawngṭaina chu a ngaihthlâksak lo.—Isaia 1:15.

 Pathian chuan firfiaka chêtna tuartute pawh tiamin, hrehawm tuartu zawng zawngte chu a ngaihsak a. (Sâm 31:7; 1 Petera 5:7) Bible chuan Pathianin tharum thawhna zawng zawng a titâwp ang tih a târ lang bawk.—Isaia 60:18.

 Bible-in firfiaka chêtna thlen chhan ber chu heti hian a târ lang: “Mi, mi dang chungah pawi khawpin a intilal ṭhîn,” tiin. (Thuhriltu 8:9) Mihring chanchin pum puiah, mi thiltithei takte chu mi dangte hnehchhiah nân firfiak takin an che ṭhîn a. Hnehchhiaha awm mite chuan firfiaka chêtna hmangin chu chu an chhâng lêt ta ṭhîn a ni.—Thuhriltu 7:7.

 Pathianin hlauhna leh tharum thawhna tihbo leh leia remna awmtîr a tiam a ni. (Isaia 32:18; Mika 4:3, 4) Ani chuan:

•   Firfiaka chêtna thlentu bul ber a nuai bo vang. Pathianin khawvêl pum huap a sawkâr hmangin mihringte sawrkâr a thlâk ang. He sawrkâra Rorêltu, Isua Krista chuan mite chu fel takin ro a rêlsak ang a, hnehchhiahna leh tharum thawhna pawh a nuai bo vang. (Sâm 72:2, 14) Chutih hunah chuan, tumah firfiakin an che tawh lo vang a. Mite chu “remna chênin an hmuingîl ang.”—Sâm 37:10, 11.

•   Firfiaka chêtna sawhkhâwk zawng zawng a sût lêt ang. Pathianin firfiaka chêtna tuartute’n taksa lam, a nih loh leh rilru lama harsatna an neihte chu a tihdamsak ang. (Isaia 65:17; Thu Puan 21:3, 4) Ani chuan mitthite kai thovin, remna khawvêla an nun leh tûr thu pawh a tiam a ni.—Johana 5:28, 29.

 Chu chu Pathianin a rawn thlentîr thuai ang tih rin nachhan tûr Bible-in min pe a. Amaherawhchu, heti hian i ngaihtuah mai thei, ‘Engvângin nge Pathianin firfiaka chêtna a la tihtâwp loh?’ tiin. A chhânna hriat nân, Engvângin Nge Pathianin Hrehawm Tawrhna Awm A Phal? tih video chu en ang che.