Hna chânna chuan sum leh pai lama harsatna mai bâkah, i chhûngkaw nun, i ngaihtuahna, leh rilru lamah nghawng nasa tak a nei thei a. Engtik lai pawha hman tlâk Bible thu bulte ṭanchhan, a hnuaia rawtnate ngaihtuahna chuan hmachhawn tûrin a ṭanpui thei che.

•   Mi dang hnênah i rilrua awmte hrilh rawh.

   Bible sawi dân: “Ṭhian chuan englai pawhin a hmangaih reng.”—Thufingte 17:17.

   Hna i chân hnu chuan i lungngaiin, i thin a rimin, a nih loh leh a ngaihna hre lo takin i awm mai thei a, hlawhchham niin i inhre hial thei bawk. I rilrua awmte i chhûngte leh i ṭhian hnai takte hnêna i hrilh a nih chuan i rilru hahna an chhâwksak thei che a. Hna thar zawng hmu leh thei tûrin thurâwn ṭangkai tak an pe thei bawk che.

•   A lutuka lungkhamna pumpelh rawh.

   Bible sawi dân: “Atûk atân lungkham suh u, atûk chuan ama tân a lungkham chawp dâwn si a.”—Matthaia 6:34.

   Bible chuan ruahmanna nei lâwk tûrin min fuih a. (Thufingte 21:5) Chutih rualin, nakin hun chungchâng a lutuka lungkham lo tûrin thurâwn min pe tel bawk. Thil thleng ngai miah lo tûrte ngaihtuahin kan rilru a hah fo ṭhîn a. Ni khat atân chauh ngaihtuah hi a ṭha zâwk a ni.

   Tûna rilru hahna i neih mai theihte i hmachhawn theih dân chungchângah Bible chuan thurâwn ṭangkai tak dang pawh a pe bawk a ni. Hriat belh nân “Rilru Hahna Hmachhawn Dân” tih thuziak chu chhiar rawh.

•   Sum leh pai hman dân a ṭûl angin siamrem rawh.

   Bible sawi dân: “Hausa leh tlachhama awm dân . . . ka hre chhuak tawh.”—Philippi 4:12.

   Tûna i dinhmun milin insiamrem rawh. Hetah hian i neih aia tam i hman loh nân i sum hman dân siamrem a tel ang. Ṭûl lo taka leibâ nei lo tûrin fîmkhur ang che.—Thufingte 22:7.

   Tûna i sum dinhmun siamrem dân chungchânga rawtna tam zâwk hriat belh nân, “Sum Tlêm Zâwk Neia Nun Dân” tih thuziak chu en rawh.

•   I hun fing takin hmang rawh.

   Bible sawi dân: “Fing takin awm ula, in hun chu hmang ṭha rawh u.”—Kolossa 4:5, Mizo Common Bible.

   Hnathawk tûra hun duan i nei lo a nih pawhin, i hun i hman dânah hun duan ṭha tak nei reng ang che. Chutianga tihna chuan i nun dân pângngai hloh lo tûr leh mahni inhlutna nei tûrin a ṭanpui ang che.

•   Insiamrem thei tak ni rawh.

   Bible sawi dân: “Thawhrimna zawng zawngah hian hlâwkna a awm.”—Thufingte 14:23.

   Tûn hmaa i thawh ngai loh hna thawh inhuam rawh. Hna hniam anga lang, a nih loh leh tûn hmaa i hlawh aia tlêm zâwk hna thawh chu i ngaihtuah thei bawk.

•   Beidawng suh.

   Bible sawi dân: “Zîngah i chi tuh la, tlaiah i kut sûm suh;i hre si lo, a ṭhang ṭha tûr.”—Thuhriltu 11:6.

   Hnathawh tûr zawng zawm zêl la. Hna i zawng tih mi dangte hrilh rawh. I chhûng te, i ṭhian te, tûn hmaa i hnathawhpuite, leh i ṭhenawmte hrilh ang che. Hnathawh tûr zawnsaktute bia la, chanchin bua hnathawktu tûr zawng te, leh company-te’n an website-a hnathawh tûr an târ chhuahte chu en la. Interview tam tak hmachhawn tûr leh hna i hmuh hmaa dîlna tam tak theh lût tûrin lo inbuatsaih lâwk bawk ang che.