“Pângngai taka nun leh kan duh ṭheuh a ni.”—Angela Merkel-i, German chancellor.

 COVID-19 hripuiin khawvêl puma mite a nghawng chhunzawm zêl avângin a thusawi hi i pawm ngei ang. Mahse, “pânngai” tih hian eng nge a kawh? Mite’n eng tih nge an beisei?

•   An nun dân pângngai anga nun leh. Mi ṭhenkhat chuan mi dangte nêna tam lehzuala hun hmanho theih te, inkuah te, leh inchibai te an duh a. Zin chhuah leh theih pawh an duh bawk. “Nun dân pângngai neih lêt lehnaah chuan restaurant te, ennawm chhuahna hmun te, [leh] chutiang chî hmuntea kal” a tel nia an ngaih thu Dr. Anthony Fauci-a’n a a sawi.

•   An nun tihhmasâwn. Mi ṭhenkhat chuan hei hi an nun dân hmasa zâwk aia ṭhaa an nun thlâk danglam theihna hun remchâng angin an thlîr a. Hun leh tha tam tak sên ngai hna te, hnam leh khawtlâng dinhmun avânga dik lo taka incheibâwlna te, leh rilru lam natna nei an pung zêl hi thlâk a ngai niin an hre bawk a ni. World Economic Forum dintu, Klaus Schwab-a chuan, “hripui lêng hian kan nun leh khawvêl hi eng ang nge nihtîr kan duh tih leh khawvêla inthlâk danglamna siam chungchâng ngaihtuah theihna hun remchâng danglam tak min pe a. He hun remchâng hi a awm reng lo vang,” tiin a sawi a ni.

 Ṭhenkhat chuan hripui lêng hian harsatna tam tak a thlen avângin nun hi a pângngai leh theih an ring lo va. Entîr nân, mi tam tak chuan an hna te, an chênna in te, an hrisêlnate an chân a, chu bâkah a aia nasa zâwk an hmangaih takte thihnaah an chân hial a ni.

 Tumahin hripui lên zawha nun awm dân tûr chiah chu an sawi lâwk thei lo va. (Thuhriltu 9:11) Mahse, Bible chuan nakin hun chungchânga a âwm tâwk beisei tûr leh thilthleng eng pawh hmachhawn tûrin min ṭanpui thei a ni. Chu bâkah, Bible chuan i beisei loh mai theih, mahse a thleng ngei dâwn tih kan chian theih nakin hun chungchâng a sawi bawk a ni.

 Hun rei tak kaltaah khân, Bible chuan “khawvêl tâwpna” hun chhûngin natna, a nih loh leh “hrite” a lêng dâwn tih a sawi lâwk a. (Luka 21:11; Matthaia 24:3) Chu chu rilrua dah reng chunga COVID-19 hripui hi kan thlîr a nih chuan indona, lîrnghîng nasa tak, leh ṭâmte pawh tiamin, Bible hrilh lâwkna thleng famkim tûr kan beisei theih chhinchhiah tlâk takte zînga pakhat angin kan hmu ang.

 Hemi hriatnain min ṭanpui dân : Tûna hrilêng mêk hian ziaawm lam pan angin lang mah se, Bible chuan “hun khirh” takahte kan nung tih min hrilh a. (2 Timothea 3:1) Hemi hriatna hian hêng hun harsa takahte hian nunah a âwm tâwk beisei tûrin min ṭanpui thei a ni.

 Bible-in thlîr dân dik min pe: Harsatna pun chhoh zêlna kan khawvêlah hian inthlâk danglamna lian tak kan hmachhawn thuai ang. Eng inthlâk danglamna maw?

 Bible chuan tûna kan tawh mêk harsatna khirh takte mai ni lovin, kan beisei theih nakin hun ṭha zâwk lo thleng thuai tûr chungchâng pawh a sawi lâwk a. Mihring sawrkârte’n tihlawhtling tûra an beisei theih aia ṭha zâwk, Pathian chauhvin a tihhlawhtlin tûr nakin hun chungchâng a sawi a ni. “An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.”—Thu Puan 21:4.

 Pathian Jehova b chuan: “Ngai teh, thil engkim ka siam thar e,” tiin a tiam a. (Thu Puan 21:5) Ani chuan hripui lêngin dinhmun a tihchhiat belhte pawh tiamin he khawvêla harsatnate hi a chingfel ang. Hêng thilte hi min pe ang:

•   Natna leh thihna awm tawh lohna, taksa leh rilru lama hrisêlna ṭha famkim.—Isaia 25:8; 33:24.

•   Beidawnna leh rilru hahna thlentu hna ni lovin, lungawina dik tak thlentu hna.—Isaia 65:22, 23.

•   Retheihna leh rilṭâmna awm tawh lohna mi tinte tâna nun nuam tak.—Sâm 72:12, 13; 145:16.

•   Rilru natna zawng zawng tihdam rualin, hmangaih tak thi tawhte an rawn nung leh ang tih beiseina.—Isaia 65:17; Tirhkohte 24:15.

 Hemi hriatnain min ṭanpui dân: Bible chuan: “Chu beiseina chu nunna thîrchakaiah kan nei,” tiin a sawi. (Hebrai 6:19) Chutiang thil ṭha zâwk beiseina chuan min tinghet thei a. Tûn laia dinhmun khirh tak tak hmachhawn tûr te, lungkhamna tikiam tûr te, leh rilru lama inbûktâwk taka awm reng tûrtein min ṭanpui thei bawk a ni.

 Mahse, Bible thutiamte chu i ring thei tak tak em? “Bible—Rinchhan Tlâk Thutak Lo Chhuahna Bul,” tih thuziak chu en rawh.

•   Nunna ngaihlu rawh

   Bible châng: “A neitu nun chu finnain a tiharh ṭhîn.”—Thuhriltu 7:12.

   I tâna a awmzia: Dam loh theihna dinhmun titlêm tûrin thu tlûkna fingte siam rawh. I chhehvêl dinhmun hria la. Hrisêlna leh himna chungchânga dân te, tualchhûnga hri kai zât te, leh hri danna damdawi chu mi zaah eng zâtin nge a kima la tawh tihte ngaihtuah rawh.

•   Fîmkhur reng rawh

   Bible châng: “Mi fing chuan a hlauthâwng a, sual a kalsan ṭhîn a; mi â erawh chu a intihuai a, mahni a inring ṭhîn.”—Thufingte 14:16.

   I tâna a awmzia: I hrisêlna vênghim tûra thil tih ngaite tizawm zêl rawh. Mi thiamte chuan coronavirus hian hun rei tak min la chên chilh zawm zêl an ring a ni.

•   Thu rin tlâkte chauh ring rawh

   Bible châng: “Mi mâwl chuan thu tin a ring a, mi remhria erawh chuan a kalna a en ṭha ṭhîn.”—Thufingte 14:15.

   I tâna a awmzia: Thurâwn i zawm tûr chu ngun takin thlang rawh. I duhthlanna a pawimawh—thu rin tlâk lo ṭanchhana thu tlûknate i siam chuan i hrisêlna dinhmun hlauhawmah i dah thei a ni.

•   A êng zâwngin thil thlîr rawh

   Bible châng: “Nang chuan zâwt suh, hmân lai nîte ṭhat zâwkzia, tûn lai aiin; hemi i zawh hi, fin vâng a ni si lo.”—Thuhriltu 7:10.

   I tâna a awmzia: Tûna i dinhmun hi a ṭha thei ang berin hman tum la. Hrilên hma nun chu a nihna aia ṭha zâwk anga ngaihtuah pumpelh la, hrilêngin a ken tel inkhuahkhirhna avânga i tih theih loh thilte chu ngaihtuah reng suh.

•   Mi dangte chungah zahna lantîr rawh

   Bible châng: “Mi zawng zawng zah ula.”—1 Petera 2:17, Mizo Common Bible.

   I tâna a awmzia: Mite chuan hrilêng leh a sawhkhâwkte chu chi hrang hrangin an chhâng lêt a. An ngaih dânte chu zahsak la, mahse i thu tlûkna ṭha siamte chu thlâk danglam kher suh. Hri danna la la lo te, kum upa te, leh hrisêlna ṭha lo zualte chu ngaihsak ang che.

•   Dawhthei tak ni rawh

   Bible châng: “Hmangaihnain a dawhthei a, ngil a nei bawk ṭhîn.”—1 Korinth 13:4.

   I tâna a awmzia: Mi dangte’n hrilên hmaa an thiltih ṭhin pângngaite tih hlauhna an neih hunah an chungah ngilneihna lantîr rawh. Hrilêng avânga inkhuahkhirhnate thlah dul a nih hunah pawh i tih tûrte ruahman la, dawhthei tak ni ang che.

 Jehova Thuhretute chuan nakin hun atâna Bible thutiamte hmangin an inthlamuan a, chu chuan anni chu hripui lêng ringawt ngaihtuah lo tûrin a ṭanpui a ni. Chu bâkah, inkhâwmho ziah tûra Bible thupêk zâwm tûrin an inṭanpui tawn bawk. (Hebrai 10:24, 25) Hripui lên chhûnga videoconference hmanga neih Jehova Thuhretute inkhâwma tel tûrin mi zawng zawng sâwm an ni.

 Mi dangte chuan hêng hun harsa tak chhûng hian Jehova Thuhretute inkhâwma tel chu an ṭangkaipui hle tih an pawm a. Entîr nân, COVID-19 hri kai hmeichhe pakhat chuan videoconference hmanga neih Jehova Thuhretute inkhâwma tel tûra sâwmna chu a pawm a. Ani chu hri a kai avângin dam lo mah se, chûng inkhâwmte chuan rilru lamah a ṭanpui a ni. A hnuah heti hian a sawi: “He chhûngkuaa tel ve ang mai hian ka inhria. Bible chhiarna chuan rilru thlamuanna leh chhûngrila hahdamna min pe a. Chu chuan ka harsatnate ni lovin, nakin hun beiseina ngaihtuah tlat tûrin min ṭanpui a ni. Ka dam chhûnga ka lo zawn ṭhin Pathian nêna inzawmna nei tûra min ṭanpui avângin ka lâwm e,” tiin.