Ukraine rama indona leh boruak inthlâk danglamna sawhkhâwkte chuan khawvêl pum huapah ei leh in harsatna nasa tak a thlen zawm zêl a. Hei hi a bîk takin, ei leh in kham khawp pawh nei mang lo mi tam tak chênna ram reitheiahte a dik lehzual a ni.

•   “Indona te, boruak inthlâk danglam te, electric man sâng chho te leh, thil dangte chuan ei leh in tihchhuah leh hmuh theih dân kawngah harsatna a thlen.”—António Guterres, UN secretary-general, July 17, 2023.

•   “Mithiamte chuan ei leh in thawn chhuahna thuthlung aṭanga Russia inhnuhdawhna chuan khawvêl ei leh in harsatna chu a tipung ang a, a bîk takin, North Africa leh Middle East ram ang, sum thawh chhuah tlêmna ramahte chuan sum hlutna a tikiam sawt ang tih an sawi lâwk a ni.”—Atalayar.com, July 23, 2023.

 Ei leh in harsatna leh hma lam hun chungchânga Bible sawite hi lo chhinchhiah teh.

•   Isua chuan: “Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah ṭâmte a tla ang,” tiin a sawi lâwk a ni.—Matthaia 24:7.

•   Bible-a Thu Puan bu chuan entîrnei sakawr chung chuang pali chungchâng a sawi a.Chûng zînga pakhat chuan indona a entîr a ni. A dawtah, ṭâmin a entîr sakawr dang pakhatin a rawn zui a, ei leh in tûrte a tlêmin, man to tak tak a ni ang. Heti hian kan chhiar a ni: “Sakawr dum ka hmu a; a chunga chuang chuanin bûkna a keng a. . . . aw ang reng hian, “‘Duliin buhpui tehkhâwng khat, duliin barli tehkhâwng thum; hriak leh uain erawh chu tichhe suh,’ a tih ka hria,” tiin.—Thu Puan 6:5, 6.

 Ei leh in chungchânga khâng Bible hrilh lâwknate kha Bible-in “ni hnuhnûngahte” tia a sawi tûn kan hunah hian a thleng mêk a. (2 Timothea 3:1) ‘Ni hnuhnûng’ chungchâng leh Thu Puan bua sakawr chung chuang palite chungchâng hriat belh nân, he video Kum 1914 Aṭangin Khawvêl A Inthlâk Danglam tih hi en la, he thuziak “Sakawr Chungchuang Palite—Tute Nge An Nih?” tih pawh hi chhiar ang che.

•   Thil mante a to a, ṭâm hial a tlâkna dinhmun pawh tiamin, dinhmun khirh tak tak hmachhawn thei tûrin, Bible-ah hian min ṭanpuitu thurâwn ṭangkai tak tak a chuang a ni. “Sum Tlêm Zâwk Neia Nun Dân,” tih thuziaka thurâwn ṭhenkhat hi lo chhiar ang che.

•   Chu bâkah, Bible hian thilte chu a ṭha zâwk tawh ang tih beiseina pawh min pe a. “Leiah, tlâng chungahte hian buh tam tak a awm ang,” tih min tiam a, mi tin hian ei tûr tam tak an nei tawh ang. (Sâm 72:16) Hma lam hun beiseina chungchâng leh chumi i rin theih chhan hriat belh nân, he thuziak “Nakin Hun Ṭha Zâwk Beiseina Dik Tak,” tih hi chhiar ang che.