•   “China chuan an ram chanchina khaw lum ‘ber’ ṭum leh khawro lam chhinchhiahnaa a sâng ber pathumna an hmachhawn mêk thu a puang.”—The Guardian, September 7, 2022.

•   “Africa khawmuala ram ṭhenkhat chuan a zâwnin kum nga chhûng khawkhêng nasa tak an tuar mêk.”—UN News, August 26, 2022.

•   “Europe hmun thum aṭhena hmun hnihah nasa takin khua a khêng a, kum 500 chhûnga a nasat ber ṭum a ni.”—BBC News, August 23, 2022.

 Mi thiam tam tak chuan khua a khên zawm zêl an rin thu leh a nasat chhoh zêl an rin thu an sawi. Hma lam hun ṭha zâwk beisei tûr a awm em? Bible-in eng nge a sawi?

 Bible chuan kan tûn hun chungchâng a sawi lâwk:

•   “Hmun hrang hrangah ṭâmte a tla ang.”—Luka 21:11.

 Khawkhêng avângin ṭâm a tla fo ṭhîn. Ṭâmte leh chumiin a thlen retheihna leh thihnate chuan Bible hrilhlâwkna a tithleng famkim.—Thu Puan 6:6, 8.

 Bible chuan khawkhêng a nasat chhoh zêl chhan chiang takin min hrilh a. Heti hian a sawi a ni:

•   “Tungchhova kal mihringah hian, a pheikhai hruai tûr a awm lo.”—Jeremia 10:23.

 Chumi awmzia chu, mihringte zîngah hlawhtling taka mahni “pheikhai hruai” thei, a nih loh leh inkaihruai thei kan awm lo tihna a ni. An ruahmanna ṭha lote chuan khawkhêngte leh tui tlâkchhamnate a thlen fo ṭhîn.

•   Scientist zawng zawng deuhthawin mihringte thiltih hian boruak a tilum lehzual a, chu chuan khawvêl pumah khawkhêng a thlen nasa lehzual tih an pawm.

•   Duhâmna leh a sawhkhâwk tûr ngaihtuah lohna chuan ramngaw tihchereuna te, tui leh boruak tihbawlhhlawhna te, leilung pian ken thilte hman sualnate a thlen a, chu chuan tuihnate chu nasa takin a tikang chat a ni.

 Mahse, Bible chuan beisei tûr min pe.

 Bible chuan tûna kan hmachhawn mêk tui tlâkchhamna hi Pathianin a chinfel tûr thu min tiam. Engtin nge?

1.  1. Pathianin “lei tichhetute tihchhiat ve thung hun” a thlentîr ang. (Thu Puan 11:18) Ani chuan tui tlâkchhamna thlentute—mi suaksual, an duhâm avânga kan chhehvêl boruak tichhetute—chu a tiboral vek ang.—2 Timothea 3:1, 2.

2.  2. “Ṭiau dip sa tak hmun chu dîlah a chang ang.” (Isaia 35:1, 6, 7) Pathian chuan khawkhêngin a thlen chhiatnate chu a sût lêtin, leilung hi tui tam tak awmnaah a chantîr ang.

3.  3. “Lei hi i kan a, tuiin i châwm a, nasa takin i tiṭha ṭhîn.” (Sâm 65:9) Pathian malsâwmnain, leilung hi mi zawng zawng tân chaw hrisêl tak leh tui thianghlim khahna hmunah a chang ang.