Kum 2023, January 24 khân scientist-te chuan Khawvêl Tâwp Hun Tûr Hriltu Sanapui a chu khawvêl tâwpna a hnai tih entîr nân zanlai hnaih takah an herhsawn!

•   “Thawhlehnî khân Ukraine indona te, nuclear râlthuam hman tumna te leh sik leh sâ nasa taka inthlâknate avângin mihringte tâwpna tûr entîrtu ‘Khawvêl Tâwp Hun Tûr Hriltu Sanapui’ chu zanlai hnaih thei ang bera herhsawn a ni.”—AFP International Text Wire.

•   “Scientist-te chuan Thawhlehnî khân ‘Khawvêl Tâwp Hun Tûr Hriltu Sanapui’ chu zanlai a kawhna tûra second 90 chauh duha herhsawn a nih thu an puang—mihringte’n tûn hma zawng aiin armageddon kan hnaih tihna a ni.”—ABC News.

•   “Khawvêl pum huapa scientist ṭangrual chuan mihringte hi kan intichhe zo takngial dâwn tih vaukhânna thu an chhuah.”—The Guardian.

 Mihringte tâwpna leh khawvêl tâwpna chu kan hnaih tawh tak zet em? Hma lam huna thil thleng tûrte chu kan hlauh a ngai em? Engtin nge Bible-in a sawi?

 Bible chuan, “lei hi erawh chu a awm reng” ang tih leh mihringte chu “a chhûngah hian kumkhuain an awm ang,” tih a sawi a. (Thuhriltu 1:4; Sâm 37:29) Chuvângin, mihringte’n lei hi tichhiain chên tlâk lovah an chhuah ngai lo vang.

 Amaherawhchu, Bible-in tâwpna chungchâng sawi a nei a. Entîr nân, “khawvêl hi . . . a boral mêk a ni,” tiin a sawi.—1 Johana 2:17.

•   Bible-in a sawi khawvêl tâwp awmzia hre tûrin, “Khawvêl Hi A Tâwp Thuai Ang Em? Apocalypse Chu Eng Nge Ni?” tih thuziak chu chhiar ang che.

•   Khawvêla thil lo thleng turte leh a thlen hun tûr chungchânga Bible sawi hre tûrin “When Will the World End?” tih thuziak chu chhiar ang che.

 Bible chuan khawvêl buainte karah pawh a êng zâwnga thil thlîr tlat tûrin min ṭanpui thei a ni. Engtin nge?

•   Bible chuan thurâwn ṭangkai takte min pe a. (2 Timothea 3:16, 17) Entîr nân, nuna harsatnate tâwk chung pawha a êng zâwnga thil thlîr thei tûra Bible-in a ṭanpui theih dân che hre tûrin “How to Control Worry” tih thuziak chu chhiar rawh.

•   Bible chuan hma lam hun beiseina rintlâk tak min pe a. (Rom 15:4) Tûna kan tawh theih thilte leh hma lam huna kan hmachhawn theih thilte chu chiang taka min hrilh avângin, khawvêla thilthlengte chu inrintâwkna neiin kan hmachhawn thei a ni.

 Bible hi hlâwkpui lehzual tûrin, a thlâwna kaihruaitu nêna Bible sawihona nei chhin tûrin kan sâwm a che.