Khawvêl hmun hrang hranga mite chuan tûn hma zawng aia khaw lum ber leh chumi sawhkhâwk chhiatna dangte chu an tuar mêk a. A hnuaia report-te hi lo chhinchhiah ang che:

•   “Kum 174 kal ta aṭanga khawvêl pum huap khaw lum chhinchhiah tawh azawngah kumin June thla hi a la lum ber.”—National Oceanic and Atmospheric Administration, U.S. Department of Commerce, July 13, 2023.

•   “Italy, Spain, France, Germany leh Poland ramte chuan hlauhawm khawpa khaw lum an tuar mêk a, Sicily leh Sardinia thliarkârahte chuan khaw lum lam chu 48°C [118°F] a thlen rin a ni – chu chu Europe khawmuala chhinchhiah tawh azawnga khaw lum ber a ni.”—European Space Agency, July 13, 2023.

•   “Khawvêl a lum chhoh zêl rualin, ruahte chu nasa zâwkin a sûr zing lehzual a, chumi avângin, tui liante a thleng zing hle bawk.”—Stefan Uhlenbrook, director of hydrology, water and cryosphere at the World Meteorological Organization, July 17, 2023.

 Khawchin chhe lutuk chanchin pung zêlte avângin lungkhamna i nei em? Chûng chanchin pawimawh takte chungchânga Bible sawi hi lo chhinchhiah ang che.

 Ni e. Khawvêl pum huap khaw lum lutuk leh khawchin chhe lutuk dangte chu kan huna thleng tûr Bible sawi lâwkte nên a inmil hle. Entîr nân, Isua chuan “thil hlauhawmte,” kan hmu dâwn tih a sawi lâwk a. (Luka 21:11) Khawvêl pum huapa khawchin chhe zual zêl chuan mi tam tak chu kan chênna leilung hi chên theih lohvah a siam mai ang tih hlauhna a neihtîr a ni.

 Awm lo vang. Pathian chuan leilung hi kan chatuan in atân a siam a; mihringte tihchhiat a phal lo vang. (Sâm 115:16; Thuhriltu 1:4) Dik tak chuan, ani chuan “lei tichhetute tihchhiat ve thung hun chu a lo thleng bawk a,” tih a tiam a ni.—Thu Puan 11:18.

 Bible chuan Pathianin leilung chu boruak chhiatna lak ata a humhim theiin a humhim ang tih a târ lang.

•   “[Pathianin] thlipui chu a tibâng ṭhuap a, chutichuan, a tuifâwnte a reh ṭhup ṭhîn.” (Sâm 107:29) Pathian chuan leilung chhiatnate thunun tûrin thiltihtheihna a nei a. Ani chuan khawchin chhe lutuk avânga harsatna min thlentu boruak chhiate chu a siam ṭha thei a ni.

•   “Lei hi i kan a, tuiin i châwm a, nasa takin i tiṭha ṭhîn.” (Sâm 65:9) Pathian malsâwmnain kan leilung hi paradis-ah a chang leh ang.

 Boruak siam ṭhat leh a nih tûr chungchânga Bible thutiamte hriat belh nân, “Tuin Nge Leilung Hi Chhanhim Ang?” tih thuziak chu en rawh.