Khawvêl puma mi tam tak chuan tui lian avânga chhiatnate chu an hmachhawn mêk a. Hêng report-te hi lo chhinchhiah ang che:

•   “China khawpui chuan tûn hnai maiahte khân, kum 140 chhûnga ruah tui tla nasa ber chu a tuar a, Inrinni aṭanga Nilaini thlengin ruah tui avânga tui lianin . . . 744.8 millimeters (29.3 inches) a chîm a ni.”—AP News, August 2, 2023.

•   “Typhoon thlipui Khanun chuan Japan ram chhim lamah ruah tui tam tak leh thli na tak a thlen a, Nilaithawhṭan hi a ni hnihna a ni a, a lo berah mi pahnihin an thi. . . . Chu thlipui avângin central Taiwan rama tlâng ram lamte pawh ruah tui 0.6 meters (2 feet)-a tamin a sûr a ni.”—Deutsche Welle, August 3, 2023.

•   “[Nova Scotia] biala chawlhkâr chhûnga tui lian chu kum 50 chhûnga Atlantic Canada biala ruah sûr nasat ber avânga thleng a ni.”—BBC News, July 24, 2023.

 Chûng thilthlengte chungchângah Bible-in eng nge a sawi?

 Bible-in ‘ni hnuhnûngte,’ tia a sawi hunah kan awm tawh a. (2 Timothea 3:1) Isua chuan tûn kan hunah hian “thil hlauhawmte,” a nih loh leh “thilthleng râpthlâk tak takte” kan hmu dâwn tih a sawi lâwk. (Luka 21:11) Sik Leh Sa Inthlâkna avângin thilthleng râpthlâk tak takte chu sawi lâwk theih loh, leh nasa zâwk leh tûn hma aia zing zâwkin a thleng a ni.

 Bible chuan tûn laia thilthleng râpthlâk tam takte hi dik tak chuan beiseina min neihtîrtu a ni tih a sawi a. Engvângin nge? Isua chuan: “Chûng chu a lo thleng in hmuh hun chuan Pathian ram a lo hnai tawh tih hria ang che u,” tiin a sawi a ni.—Luka 21:31; Matthaia 24:3.

 Thilthleng kan hmuhte hian Pathian Ramin nakin lawkah chuan tui kal kual dânte pawh tiamin, leilunga thilthleng engkim hi a thunun vek tawh dâwn tih a târ lang a ni.—Joba 36:27, 28; Sâm 107:29.

 Pathian Ramin leilunga harsatna zawng zawng a siam ṭha dâwn tih chungchâng hriat belh nân, “Tuin Nge Leilung Hi Chhanhim Ang?” tih thuziak hi chhiar ang che.