Kum 2022, November 20, Chawlhni khân COP27 United Nations Climate Change Conference chu zawh fel a ni a. Sik leh sa nasa taka inthlâk danglamnain a thlen chhiatnate avânga ram rethei zâwkte ṭanpui nân inlungrual takin thu tlûknate siam ni ṭhîn mah se, mi ṭhenkhat chuan harsatna lo chhuah chhan bul ber chu an chinfel theih tak tak an ring lo.

•   Kum 2022, November 19 khân United Nations secretary-general António Guterres-a chuan, “Harsatna tâwkte ṭanpui nâna sum thawh khâwm tûra kan thu tlûkna siam avâng hian ka lâwm tak zet a. Chutih rualin, hei hi a tâwk lo tih erawh a chiang hle . . . Kan leilung hi chhanchhuah ngai dinhmun hlauhawmah a la awm reng a ni,” tiin a sawi.

•   “Khawvêl hi sik leh sa nasa taka inthlâk danglamna hmachhawn thut thei dinhmunah a la ding reng.”—Mary Robinson, Ireland president hlui leh UN High Commissioner for Human Rights hlui, November 20, 2022.

 Ṭhalaite hian, a bîk takin kan leilung awm zêl dân tûr hi an ngaihtuah hle. A nih leh, ram hrang hrangte hian ṭang rualin, sik leh sa inthlâk danglamna titâwp tûra an thutiamte chu an hlen thei ang em? Bible-in eng nge a sawi?

 Bible chuan ram hrang hrangte hian sik leh sa inthlâk danglamna titâwp tûra theih tâwp an chhuahnaah hmasâwnna eng emaw chen nei mah se, an tihtâwp pumhlûm theih ngai loh tûr thu a sawi a ni. A chhan pahnih hi lo chhinchhiah ang che:

•   “A kawi tawh kha chu tihngîl theih a ni lo.”—Thuhriltu 1:15.

   A awmzia: Mihringte hi mahnia ro inrêl tûra siam kan nih loh avângin, sawrkârte hian tih theih chin tâwk an nei a. (Jeremia 10:23) Chuvângin, ram hrang hrangte hian ṭangrualin theih tâwp chhuah mah se, khawvêla buainate hi an chingfel thei ngai lo vang.

•   “Mi, mahni inhmangaihtu te, tangka ngainatu te, . . . huaikawm bâwl te.”—2 Timothea 3:2, 3.

   A awmzia: Bible chuan kan tûn lai hunah hian, mi tam tak chu mahni hmasial takte leh thil ṭha zâwk thlen tûra mi dangte thawhpui duh lote an nih tûr thu dik takin a sawi lâwk a ni.

 Kan leilung awm zêl dân tûr hi mihring sawrkârte thutiamah a innghat lo va. Pathianin Rorêltu tling tak, Isua Krista min pe a ni. Isua chungchângah Bible chuan heti hian a sawi:

•   “Rorêlna chu a kokiah a chuang ang a: a hmingah chuan Remruattu Maka, Pathian Chaka, Chatuan Pa, Remna Lal, an ti dâwn si a.”—Isaia 9:6.

 Isua chu Pathian Ram, a nih loh leh vân sawrkâra Lal ber a ni a. (Matthaia 6:10) Ani chuan thiltihtheihna leh finna a neih bâkah, leilung leh a chhûnga chêngte ṭha taka enkawl duhna a nei bawk a ni. (Sâm 72:12, 16) A rorêlna hnuaiah vân sawrkâr chuan “lei tichhetute” chu a tiboral ang a, leilung boruak pawh hi a siam ṭha leh vek ang.—Thu Puan 11:18; Isaia 35:1, 7.

 Sik leh sa nasa taka inthlâk danglamna tihtâwp pumhlûm a nih dân tûr chungchâng hriat belh nân, “Sik Leh Sa Inthlâkna leh Kan Nakin Hun Chungchângah Bible-in Eng Nge A Sawi?” tih thuziak chu chhiar ang che.