Khawvêl hruaitute’n indona pumpelh tûra theih tâwp an chhuah chung pawhin, Russia chuan kum 2022, February ni 22 zîng hma takah Ukraine chu sipai chaknain a rûn a. Engtin nge sipai hmanga he indona hian khawvêl a nghawng theih? United Nations secretary-general, António Guterres-a chuan ni rei lotê kalta mai khân heti hian a sawi a ni: “He buaina avânga hrehawm tawrhna leh chhiatna lo awm tûrte leh Europe khawmual leh khawvêl ram hrang hrangte himna a tihchhiat dân tûr chu ngaihtuah phâk bâk a ni,” tiin.

•   Isua Krista chuan ‘hnam hrang leh hnam hrang, ram hrang leh ram hrang an indo’ hun tûr a lo sawi lâwk a. (Matthaia 24:7) Tûn laia indonate hi Isua hrilh lâwkna thlen famkimna a nihzia Bible-in a târ lan dân hre tûrin, “‘Ni Hnuhnûng,’ A Nih Loh Leh ‘Tâwpna Hun’ Chhinchhiahna Chu Eng Nge Ni?” tih thuziak chu chhiar ang che.

•   Bible-a Thu Puan bu chuan indona chu “sakawr dang, a sen mi” chunga chuang, leh “lei ata inremna” lâksaktu angin a târ lang a. (Thu Puan 6:4) Chu hrilh lâwkna chuan tûn laia indonate hi a kâwk a ni tih târ lan dân hre tûrin, “Sakawr Chungchuang Palite—Tute Nge An Nih?” tih thuziak chu chhiar rawh.

•   Daniela bu chuan “hmâr lam lal” leh “chhim lam lal” inkâra inbeihna awm tûr chu a sawi lâwk a. (Daniela 11:25-45) Russia leh a ṭanrualpuite chu hmâr lam lal an ni tia kan sawi theih chhan hre tûrin, “Hrilhlâwkna Thleng Famkim—Daniela Bung 11” tih video chu en rawh. a

•   Thu Puan bu chuan ‘Pathian Engkimtitheia ni ropuia indona’ chungchâng pawh a târ lang a. (Thu Puan 16:14, 16) Mahse, hei hi tûn laia kan hmuh ram leh ram inkâra indona a ni lo. Chu thil lo thleng tûr chungchâng hriat belh nân, “Armageddon Indona Chu Eng Nge?” tih thuziak chu chhiar rawh.

•   Bible chuan Pathianin “indonate chu kâwlkil thlengin a tireh” dâwn tih a sawi a. (Sâm 46:9) Pathian tiam nakin hun chungchâng hriat belh nân, “Nakin Hun Ṭha Zâwk Beiseina Dik Tak,” tih thuziak chu chhiar rawh.

•   Isua chuan a hnungzuitute chu Pathian Ram lo thleng tûra ṭawngṭai tûrin a zirtîr a. (Matthaia 6:9, 10) Chu Lalram chu leilung atâna Pathian duh zâwng thlentîrtu tûr vân sâwrkâr a ni a, Pathian duh zâwngah chuan khawvêla remna awmtîr pawh a tel a ni. Chu Lalram i hlâwkpui theih dân hriat belh nân, Pathian Ram Chu Eng Nge Ni? tih video chu en rawh.

 Ukraine ramah hian Jehova Thuhretu mi 129,000 aia tam an awm a. Ram danga awm Thuhretute ang bawkin, Isua entawnin politics-ah an tualdâwih a, indonaah an tel lo bawk. (Joh. 18:36) Khawvêl pumpuiah, Jehova Thuhretute chuan indona pawh tiamin, mihringte buaina chingfeltu tûr “Ram chanchin ṭha” chu an puang zawm zêl a ni. (Matthaia 24:14) Beiseina chungchânga Bible thuchah hriat belh nân, min rawn be pawh tûrin kan sâwm a che.