Ukraine rama sakhaw hruaitu langsâr takte leh indona chungchânga a hnuaia târ lante hi han ngaihtuah teh:

•   “Russian Orthodox Church hruaitu ber, Patriarch Kirill-a chuan Russia rûnna hi a dik loh thu ṭawngkam khat pawh a sawi chhuak lo . . . . Ukraine chungchânga Church-in thu thehdarhna campaign a neih chu indonaa Putin-a thiam chantîr nâna hman a ni.”—EUobserver, March 7, 2022.

•   “Patriarch Kirill-a chuan . . . he indona hi sual dona tia sawiin, Russia-in Ukraine a rûn chu thil dik a nih thu a sawi.”—AP News, March 8, 2022.

•   “Kyiv khawpuia chêng, Ukrainian Orthodox Church hruaitu, Metropolitan Epiphanius I-na chuan Thawhṭannî khân, a mite chu ‘rûntu Russia-te chu do lêt’ tûrin mal a sâwm a’ . . . [Ani] chuan Russia sipaite thah chu sual a ni lo tih thu a sawi bawk.”—Jerusalem Post, March 16, 2022.

•   “Keini [the Ukrainian Council of Churches and Religious Organizations (UCCRO)] hian Râlthuam Keng Ukraine mi leh sate leh kan ram vênghimtu zawng zawng chu kan thlâwp a, rûntu laka Ukraine an vênhimna chu mal kan sâwmin, an tân kan ṭawngṭaisak a ni.”—UCCRO a Statement, February 24, 2022.

 Engtin nge i ngaih? Isua Krista zuitu nia inchhâl sakhaw mite chuan an mi leh sate chu indonaa tel tûrin an fuih tûr em ni? Bible-in eng nge a sawi?

Indonaa sakhuate chanchin

 Sakhaw mite chuan remna atân hma la angin insawi mah se, indonaa tel chu thil ṭha a ni tih an sawi fo thu thilthleng chanchin chuan a târ lang. Jehova Thuhretute chuan chûng sakhaw mite vêkveknate chu kum sâwmbi têl an lo hai lang tawh a. Kan thu leh hla chhuaha târ lan entîrna ṭhenkhat hi lo ngaihtuah teh.

•   “Crusades—‘Inbumna Lungchhiatthlâk,’” tih thuziak chuan Roman Catholic Church chu Pathian leh Krista hminga mihring insuatnaa sual mawhphurtu a nih thu a târ lang.

•   “Africa Khawmuala Catholic Church,” tih thuziak chuan sakhuain hnam insuatna a tihtâwp theih loh dân chu entîrna hmangin a târ lang.

•   “Sakhua Chu Dem Tûr A Ni Em?,” “Mihringte Indonaa Sakhaw Mawhphurhna,” tih leh “Sakhuain Ṭan Lam A Nei,” tih thuziakte chuan Catholic te, Orthodox te, leh Protestant sakhaw hruaitute’n indona tam taka lehlam lehlama mite an thlâwp thu a hrilhfiah a ni.

Kristiante’n indona chu an thlâwp tûr a ni em?

 Isua zirtîrna: “Nangmah i inhmangaih angin i vêngte pawh i hmangaih tûr a ni.” (Matthaia 22:39) “In hmêlmate chu hmangaih ula.”—Matthaia 5:44-47.

 Isua sawi: ‘Ka ram chu he khawvêla mi hi a ni lo; ka ram chu he khawvêla mi hi ni sela, ka ṭhuihhruaiten an bei ang, mana ka awm loh nân.’ (Johana 18:36) “Khandaih ruaitu zawng zawng chu khandaih vêkah an thi dâwn si a.”—Matthaia 26:47-52.

 Ngaihtuah rawh: Kristiante’n Isua humhim nân pawha khandaih an ruai lo a nih chuan, anni chu eng chhan dang vâng pawhin, indonaah an tel tûr a ni em? Kristian hmasate’n Isua entawn tûr siam leh zirtîrnate an zui dân hriat nân, “Indona Chu Kristianna Nên A Inmil Em?” tih thuziak chu chhiar rawh.

Indona thlâwptu sakhuate chungah eng thil nge thleng ang?

 Bible chuan Isua aiawhtu nia inchhâl a, a zirtîrnate zâwm lotu sakhuate chu Pathianin a hnâwl tih a zirtîr a ni.—Matthaia 7:21-23; Tita 1:16.

•   Thu Puan bu chuan chûng sakhuate chu “leia thah zawng zawngte thisen” mawhphurtu niin a ngai tih a târ lang. (Thu Puan 18:21, 24) Chutiang a nih chhan hriat nân, “Babulon Khaw Ropui Chu Eng Nge Ni?” tih thuziak chu chhiar rawh.

•   Isua chuan rah ṭha lo chhuahtu thing chhia chu “an kit a, meiah an paih ṭhin” angin, Pathianin a hnâwl sakhua zawng zawng chu tihboral vek a ni ang tih a sawi. (Matthaia 7:15-20) Chutianga a thlen dân tûr hriat nân, “Sakhaw Dik Lo Tâwpna A Hnai!” tih thuziak chu chhiar rawh.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images