Hausa-Rethei Intluktlânna A Awm Thei Ang Em?
Ram tam takah mite chuan hausa leh rethei dinhmun a inthlau lutuk nia an hriat avângin kawng zawhin lungawi lohna an lantîr a. Chûng harsatnate chu COVID-19 hripui lêng avânga inkhârkhipna te, ei leh in tûr vâng te, leh mi rethei leh hausa inkâra damdawi lama inenkawlna inthlau lutukte avângin a zual a ni.
Mite hrehawm tawrhna nasa tak thlentu hausa leh rethei inthlauhna hi a tâwp ngai ang em? Tâwp ang. Bible-in kan harsatna tawhte Pathianin a chinfel dân tûr a târ lang a ni.
Pathian chinfel tûr hausak-retheihna lama buainate
Buaina: Mihringte hian mi zawng zawng mamawh phuhru thei tûr hausa-rethei intluktlânna an siam chhuak thei lo.
A chinfelna: Pathianin mihring sawrkârte chu Pathian Ram tia koh ama sawrkârnain a thlâk ang a. Vân aṭangin he lei pumpuiah hian ro a rêl ang.—Daniela 2:44; Matthaia 6:10.
A rah chhuah: Pathian Ram chuan khawvêl pum huap sawrkâr a nih angin leia buainate hi ṭha famkimin a chingfel ang. Mite chu retheihna, a nih loh leh hausa leh rethei inthlauhna thangah an âwk leh tawh ngai lo vang. (Sâm 9:7-9, 18) Chu aiin, an thawh chhuah chungah an lâwm ang a, an thawh rah eiin an chhûngte nên hlim takin an chêng ang. Bible chuan: “Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a, mi dang eiah grêp huan an siam tawh lo vang,” tiin min tiam a ni.—Isaia 65:21, 22.
Buaina: Mite chuan hrehawm tawrhna leh an thil mamawh tlâk chhamna dinhmunte an pumpelh thei lo.
A chinfelna: Pathian chuan a Lalram hmangin hlauhna leh him lohna awmtîrtu zawng zawng a nuai bo vang.
A rah chhuah: Pathian ngaihsakna hnuaiah mite chu an dam khaw chhuah nâna an mamawh lâksak an ni tawh ngai lo vang. Entîr nân, indona te, ei leh bâr tlâk chhamna te, leh hri lêngte chu a awm leh tawh ngai lo vang. (Sâm 46:9; 72:16; Isaia 33:24) Pathian chuan: “Ka mite chu râlmuanga awmnaah leh, in nghet takahte leh chawlhna hmun muanawm takahte chuan an awm tawh ang,” tiin a sawi.—Isaia 32:18.
Buaina: Mahni hma sialte leh mi duhâmte chuan mi dangte dik lo takin an cheibâwl ṭhîn.
A chinfelna: Pathian Ram khua leh tuite chuan mahni hmakhua dah hmasa lovin, mi dangte chunga hmangaihna dik tak lantîr dân an zir ang.—Matthaia 22:37-39.
A rah chhuah: Pathian Ram hnuaiah mi tinte chuan ‘mahni hma sial lo’ Pathian hmangaihna an lantîr ang. (1 Korinth 13:4, 5) Bible chuan: “Ka tlâng thianghlimah rêng rêng chuan intihnat a awm tawh lo vang a, intihchhiat a awm tawh hek lo vang: tuite hian tuifinriat a khuh reng angin, leilung hi LALPA hriatnain a khat zo vek dâwn a ni,” tiin a sawi a ni.—Isaia 11:9.
Bible chuan tûn lai khawvêl kal hmang tâwpna hun hnuhnûngah kan nung tih leh hausa leh rethei inthlauhna zawng zawng titâwp tûra a thutiam chu Pathianin a thlen famkimtîr thuai ang tih a sawi a. a (Sâm 12:5) Chumi hun a lo thlen hma chuan Bible thu bulte’n tûna i tawh mêk hausa leh rethei inthlauhna hmachhawn tûrin a ṭanpui thei che a ni. Entîr nân, “Sum Tlêm Zâwk Neia Nun Dân” tih leh “Sum Thlîr Dân Dik Tak Neih,” tih thuziakte chu en rawh.
a Bible i rin theih chhan hriat nân, “Bible—Rinchhan Tlâk Thutak Lo Chhuahna Bul,” tih thuziak en rawh.
You May Also Like
VENNAINSANG
Pathian Ramin Eng Nge A Hlen Chhuah Ang?
Isua chuan Pathian Ram chu leia buaina zawng zawng chingfel thei sawrkâr awmchhun a ni tih a hria. Kan rinchhan theih nân chu Ram chuan eng thilte nge a tih tawh?
