Kum 2022, May ni 24 khân, U.S.A., Texas biala Uvalde khawpui lian vak lo pakhatah chhiatna râpthlâk tak a thleng a. The New York Times chuan, “a kâptu chuan Robb Elementary School-a naupang 19 leh zirtîrtu pahnih chu a kâp hlum,” tiin a sawi.

 Chutiang thilthleng râpthlâk takte a thleng nawn fo chu a lungchhiatthlâk hle. USA Today chuan United States-ah ringawt pawh, “ni kum khân school-a inkahna vawi 249 a thleng a—chu chu a lo berah pawh kum 1970 aṭanga kum dang zawng aiin a nasa zâwk,” tiin a sawi.

 Engvângin nge chutiang thil râpthlâk takte chu a thlen ṭhin? Engtin nge chûng thil sual tihte chu kan hmachhawn theih? Tharum thawhnate a tâwp ang tih beiseina tûr chhan a awm em? Bible chuan a chhânna a pe a ni.

•   Bible chuan kan tûn hun hi ‘ni hnuhnûngte’ tiin a sawi a, hemi hunah hian mi tam tak chuan tharum thawhin leh râwng taka thil tiin “hmangaihna pianpui nei lo te,” leh “mi kawlhsen te,” an nihzia an lantîr a. Chutiang mite chu “an sual zual deuh deuh ang.” (2 Timothea 3:1-5, 13) Hriat belh nân, “Bible-in Tûn Laia Mite Ngaihtuah Dân leh Thiltih Dân A Sawi Lâwk Em?” tih thuziak chu chhiar rawh.

 Mi tam tak chuan, ‘Engvângin nge Pathian hian school-a inkahna ang chi thil râpthlâk takte thleng lo tûra a dan loh?’ tiin an ngaihtuah mai thei. Bible chhânna hriat nân, “Engah Nge Mi Ṭhate Chungah Thil Ṭha Lo A Thlen Ṭhin?” tih thuziak chu chhiar rawh.

•   “Pathian Lehkha Thua . . . thlamuanna hmua beiseina kan neih theihna tûrin, hmânlaia ziak apiangte chu keimahni min zirtîrna tûrin ziak a ni si a.”—Rom 15:4.

 Bible thu bulte chuan tharum thawhnaa khat he khawvêl hmachhawn thei tûrin a ṭanpui thei che a ni. Hriat belh nân, Tharum Thawhna A Tâwp Ngai Ang Em?” tih thupui nei Awake! Magazine chu chhiar rawh.

 Nu leh pate’n chanchina an hmuh leh an hriat thilthleng râpthlâk tak takte hmachhawn thei tûra an fate an ṭanpui theih dân chungchânga rawtnate hriat nân, “Chanchin Râpthlâk Tak Takte leh I Fate,” tih thuziak chu chhiar rawh.

•   “An nunna chu hnehchhiahna leh nunrâwnna lak ata a tlan ang.”—Sâm 72:14.

•   “An khandaihte chu leilehna hmâwr zumahte an chher ang a, an feite chu thei kûng ahchhumna chem kawmahte an chher ang: hnam dangin hnam dang chungah khandaih a lek tawh lo vang a, indo dân pawh an zir tawh hek lo vang.”—Mika 4:3.

 Pathian chuan mihringte tih theih lo chu a ti ang. A vân lam Lalram sawrkâr chuan râlthuam zawng zawng leh tharum thawhna zawng zawng chu a nuai bo vang. Pathian Lalramin a hlen chhuah tûrte chungchâng hriat belh nân, “Pathian Ram Hnuaiah ‘Thlamuanna Nasa Tak Chu A Duah Hlauh Hluah Ang,’” tih thuziak chu chhiar rawh.