“Sik leh sa inthlâkna hian chhiatna a thlen a. Leilung hi chênna tlâk a ni tawh lo.”—The Guardian.

 Mihringte hian anmahni thlentîr harsatna an hmachhawn ṭhîn a. Scientist tam zâwkte chuan khawvêl lum zêl chhan chu mihringte thiltih vâng a ni tih an pawm a ni. He khawvêl lum zêl hian sik leh sa a thlâk danglam a, chhiatna nasa tak a thlen a ni. Chûngah chuan a hnuaia mite hi a tel:

•   Zing leh nasa lehzuala khaw awm dân inthlâkna, thli lum tleh te, khaw khêng te, leh tui lian leh ram kâng thlentu thlipui ang chî te.

•   Tlâng panga vûr leh hmâr tâwp vûr tui ral te.

•   Tuipui chîm chin sâng zêlte.

 Sik leh sa avânga harsatna hian lei hmun tin a nghawng a. Ram 193-te dinhmun a sawi hnuah, New York Times chanchinbu chuan: “He lei hian ṭanpui tûrin min ngên a ni,” tiin a sawi a. Sik leh sa inthlâknain a thlen thihna leh hrehawm tawrhna avângin, World Health Organization chuan hei hi “mihring hrisêlna atâna dinhmun hlauhawm ber,” tiin a ko a ni.

 Mahse, nakin hun chu beiseina nêna thlîr chhan tûr kan nei. Bible chuan tûn laia kan hmuh thilthleng te, Pathianin hma a la ang tih kan beisei theih chhan te bâkah, kan nakin hun min humhimsak nâna a thiltih tûrte a sawi lâwk a ni.

 Thlen famkimtîr e. Khawvêl lum zêl avânga sik leh sa nasa taka inthlâkna hi Bible-in kan hun laia thilthleng tûr a sawi lâwk nên a inmil a ni.

 Hrilh lâwkna: “Ni hnuhnûngahte chuan hun khirh takte a lo awm ang. Mi, mahni inhmangaihtu te, tangka ngainatu te, . . . thianghlim lo te, . . . huaikawmbâwl te, . . . vervêk te, thuhnudâwn lo te.”—2 Timothea 3:1-4.

 Bible chuan sik leh sa avânga harsatna thlentu mihringte mizia leh nungchang a sawi lâwk a. Sawrkârte leh sumdâwngte chuan chhuan lo awm tûrte ṭhatna tûr aiin sum leh pai an dah hmasa a. Khawvêl lum zêl titâwp tûra thawhho an tum pawhin, an thiltih tûrah an inlungrual thei lo a ni.

 He hrilh lâwkna hian mi nâwlpuite’n an thiltihte an bânsan a, lei hi an vênhim kan beisei thei lo tih a târ lang. Chu aiin, Bible chuan mite’n mahni hmasialna an lantîr “zual deuh deuh ang” tiin a sawi lâwk a ni.—2 Timothea 3:13.

 Min Siamtu, Pathian Jehova a chuan he lei leh a chhûnga awmte hi a ngaihsak tih Bible-in a târ lang a. Pathianin hma a la ang tih târ langtu Bible châng pathum lek lo ngaihtuah ila.

1.  1. Pathian chuan “[leilung hi] engmah lovah a siam lo va, mihringte awm nân a din zâwk a ni.”—Isaia 45:18.

    Pathianin leilung atâna a thiltum chu a tifamkim ang. (Isaia 55:11) Tihchhiat emaw, chênna tlâk lohvin emaw a awmtîr lo vang.

2.  2. “Thuhnuairawlhte erawh chuan ram hi an luah ang a: remna chênin an hmuingîl ang. Mi felte chuan ram hi an luah ang a, a chhûngah hian kumkhuain an awm ang.”—Sâm 37:11, 29.

    Pathian chuan mihringte chu leiah hian inrem takin chatuanin an nung ang tih a tiam.

3.  3. “Mi suaksualte erawh chu leilung ata tihboral an ni ang.”—Thufingte 2:22.

    Pathian chuan lei tichhetute pawh tiamin, thil sual ti zawm zêltute chu a tiboral ang tih a tiam.

 Engtin nge Pathianin leilung atâna a thutiam a hlen ang? Pathian Ram tia hriat khawvêl pum awptu tûr sawrkâr hmangin a hlen chhuak ang. (Matthaia 6:10) Chu Lalram chuan vân aṭangin ro a rêl ang a. Lei leh a chhehvêl boruak chungchângah mihring sawrkârte nên inremna a siam lo vang. Chu aiin, Pathian Ram chuan mihring sawrkârte chu a tichhe vek zâwk ang.—Daniela 2:44.

 Pathian Ram chu mihring zawng zawngte leh leilung atâna chanchin ṭha a ni a. (Sâm 96:10-13) Pathian Jehova’n a Lalram hmanga a thil tih tûrte lo ngaihtuah ta ila.

•   Boruak thianghlim awmtîr leh

   Bible sawi dân: “Thlalêr leh ram pilril chu a lâwm ang a; ram ro chu a hlimin phûl pangpâr angin a pâr ang.”—Isaia 35:1.

   Kan nakin hun atâna a awmzia: Mihringte’n nasa taka an tihchhiat tawh hmunte pawh ni se, Jehova’n leilung hi a siam ṭha leh ang.

•   Khaw awm dân nasa taka inthlâk danglamna thunun

   Bible sawi dân: “[Jehova’n] thlipui chu a tibâng ṭhuap a, chutichuan a tuifâwnte a reh ṭhup ṭhîn.”—Sâm 107:29.

   Kan nakin hun atâna a awmzia: Jehova chuan thilte thunun tûrin chakna a nei a. Khaw awm dân nasa taka inthlâk danglam avângin mite’n hrehawm an tuar tawh lo vang.

•   Ṭha taka leilung enkawl dân mihringte zirtîr

   Bible sawi dân: “Fing taka awmtîr chein i kalna tûr kawng chu ka entîr ang che.”—Sâm 32:8.

   Kan nakin hun atâna a awmzia: Jehova’n mihringte chu leilung enkawl tûr hian mawhphurhna a pe a. (Genesis 1:28; 2:15) A thil siamte enkawl dân leh kan chhehvêla thil awmte tichhe lova he mawhphurhna hlen dân ṭha ber min zirtîr ang.