Kum 2022, July thla chhûngin, khawvêl pumpuiah silai chelekna râpthlâk tak tak a thleng a ni:

•   “Japan rama politician hriat hlawh ber [Prime Minister lo ni tawh Shinzo Abe-a] tihhlumna chuan ram a tihbuai mai bâkah, khawvêla mite chu a tithlabâr hle a ni, a chhan chu Japan ramah chuan tharum thawhna a tlêmin, silai chungchânga dân khauh tak a awm vâng a ni.”—July 10, 2022, The Japan Times.

•   “Denmark rama mite chu silai chelektu pakhatin Copenhagen shopping mall-a mi pathum a kah hlum avângin an thlabâr hle.”—July 4, 2022, Reuters.

•   “South Africa: silai chelektute’n Soweto khawpuia zu dâwr pakhatah mite an kah hnu chuan mi 15 an thi.”—July 10, 2022, The Guardian.

•   “U.S. ramah silai chelekna avângin July ni 4 holiday chawlhkâr chhûngin mi 220 aia tam kah hlum an ni.”—July 5, 2022, CBS News.

 Chutiang tharum thawhnate chuan tâwp hun a nei ang tih beisei tûr a awm em? Bible-in eng nge a sawi?

 Bible chuan kan hun hi ‘ni hnuhnûngte’ tiin a sawi a, mite chu mi kawlhsen te, leh râwng tak taka thil titute an ni ang. (2 Timothea 3:1, 3) Chutiang tharum thawhnate chuan mite chu thlabâr takin a awmtîr a ni. (Luka 21:11) Mahse, Bible chuan tharum thawhna tihtâwp a ni thuai ang a, “mite chu râlmuanga awmnaah leh, in nghet takahte leh chawlhna hmun muanawm takahte chuan an awm tawh ang,” tih a tiam a ni. (Isaia 32:18) A nih chuan, engtin nge tharum thawhna chu tihtâwp a nih ang?

 Pathianin mi suaksualte leh râlthuam zawng zawng a nuaibo vang.

•   “Mi suaksualte erawh chu leilung ata tihboral an ni ang.”—Thufingte 2:22.

•   “[Pathian] chuan indonate chu kâwlkil thlengin a tireh ṭhîn a; thal ngul chu a titliak a, fei chu a sât bung ṭhîn a; tawlailîrte chu meiah a rawh ral ṭhîn.”—Sâm 46:9.

 Pathian chuan mite chu inrem taka awm dân zirtîrin tharum thawhna thiltihte awmtîrtu chu a nuaibo vang.

•   “Ka tlâng thianghlimah rêng rêng chuan intihnat a awm tawh lo vang a, intihchhiat a awm tawh hek lo vang: tuite hian tuifinriat a khuh reng angin, leilung hi LALPA hriatnain a khat zo vek dâwn a ni.”—Isaia 11:9.

•   Tûnah ngei pawh, Pathian chuan khawvêl pumpuia mite chu tharum thawhna bânsana râlthuamte hmang tawh lo tûr leh ‘an khandaihte chu leilehna hmâwr zumahte chher a, an feite chu thei kûng ahchhumna chem kawmahte chher’ tûrin a zirtîr mêk a ni.—Mika 4:3.

 Bible tiam hlauhna awm lohna khawvêl chungchâng hriat belh nân, “Hlauhna Awm Tawh Lohna—A Awm Thei Ang Em?” tih thuziak chu chhiar rawh.

 Tharum thawhna nuaibo hlenna chungchâng hriat belh nân, “A Tâwpah Leiah Remna A Awm Ta!” tih thuziak chu chhiar rawh.