Mi tam takin ṭawngṭai dân an zir hmasak berte zînga pakhat chu Isua’n a hnungzuitute hnêna a zirtîr Lal Ṭawngṭaina hi a ni a. He ṭawngṭai dân hi mi nâwlpuiin Thuthlung Thar tia kan hriat Bible-ah târ lan a ni. Chu ṭawngṭaina chu: “Kan Pa, vâna mi, i hming zahawm [a nih loh leh “thianghlim” ) rawh se,” tia ṭan a ni a. (Matthaia 6:9) Mahse, Sâpṭawnga Pathian hming sawina “Jehovah,” a nih loh leh “Yahweh,” tih chu Sâpṭawnga lehlin Thuthlung Tharah hmuh tûr a vâng hle. Chutih laiin, hêng lehlin Bible-ahte hian pathian dik lo hming Jupita te, Zeus te, Merkuria te, leh Diani te hming chu târ lan a ni thung. Chutiang a nih chuan, Bible Ziaktu Pathian dik hming chu an târ lang ngei tûr a ni dâwn lâwm ni?—Tirhkohte 14:12; 19:35; 2 Timothea 3:16.

 Sâpṭawnga Bible letlingtu Lancelot Shadwell-a leh Frederick Parker-a te chuan Pathian hming chu Thuthlung Thar Bible-ah dah luh leh ngei a ngai niin an hria a ni. Engvângin nge “dah luh leh” tih ṭawngkam hi kan hman? A chhan chu, Pathian hming chu a tîra ziak Bible-ah chuang mah se, a hnuah paih bo a ni, tia thu tâwp an siam vâng a ni. Engvângin nge chutianga thu tâwp an siam?

 Shadwell-a leh Parker-a te chuan Thuthlung Hlui tia hriat a tîra Hebrai ṭawnga ziah kutziak lehkhaah chuan Pathian hming chu vawi sâng tam tak a chuang tih an hria a. Chuvângin, tûna hmuh theih kutziak lehkha dang Thuthlung Thara Pathian hming pum a chuan loh chhan chu hriat an tum a ni. a Chu bâkah, Shadwell-a chuan Thuthlung Hluia chuang “Jehova vântirhkoh,” tih ang chi ṭawngkamte Thuthlung Thar kutziak lehkhaa hman nawn a nih hian, Grik ṭawnga lehkha ziak chhâwngtute chuan Pathian hming chu “Lalpa” tih awmze nei Kyʹri·os tih thu malin an thlâk tih a hmu chhuak bawk.—2 Lalte 1:3, 15; Tirhkohte 12:23, NWT.

 Shadwell-a leh Parker-a te’n Sâpṭawnga an Bible lehlin an tlângzarh hma pawhin, Sâpṭawnga Thuthlung Thar letlingtu dangte chuan Pathian hming chu an dah lût leh tawh a; mahse, hmun tlêm têah chauh an dah lût leh a ni. b Parker-a’n Sâpṭawnga a lehlin A Literal Translation of the New Testament a tlângzarh hma, kum 1863 hma lama Sâpṭawnga Thutlung Thar letlingtute zîngah, Parker-a anga hmun tam taka Pathian hming dah lût lehtu an awm lo. A nih leh, Lancelot Shadwell-a leh Frederick Parker-a te hi tute nge an nih?

 Lancelot Shadwell-a (1808-1861) chu ukil leh England rama vice-chancellor Sir Lancelot Shadwell-a fapa a ni a. Ani chu Church of England member a ni. Trinity ringtu ni mah se, Pathian hming zahna thûk tak a nei a, “JEHOVA hming ropui tak,” tiin a sawi kher ṭhîn. A Bible lehlin Chanchin Ṭha Matthaia leh Marka-ah chuan Pathian hming “Jehova” chu vawi 28 a hmang a, chumi nêna inkûngkaih chhinchhiahna a ziahahte chuan vawi 465 lai a hmang bawk.

 Shadwell-a chuan Pathian hming chungchâng chu a tîra Hebrai ṭawnga ziah Thuthlung Hlui aṭangin a hria a nih ngei a rinawm. Ani chuan, Grik ṭawnga lehlin Thuthlung Hluia Pathian hming aia Kyʹri·os hmangtute chu “ṭawng letlingtu rinawm lote,” tiin a sawi.

 Shadwell-a’n a Bible lehlina Pathian hming “Jehova” a hmanna hmasa ber chu Matthaia 1:20-naah a ni a. Chu châng nêna inkûngkaiha a chhinchhiahna thuziakah: “Thuthlung Thar Bible-a helai châng leh châng dang tam taka hman [Kyʹri·os] tih thu mal hian Pathian hming JEHOVA a kâwk a, Sâpṭawnga lehlin Bible-a Pathian hming dah luh leh hi thil pawimawh ber a ni,” tiin a sawi. Chu bâkah: “Pathian kan chawimawi theih nân chutianga kan tih chu a ngai a ni. Pathian chuan a hming chu JEHOVA a nih thu a sawi a; chuvângin, a chungchâng kan sawi huna a hming kan lam aia ṭha a awm thei lo,” tiin a sawi belh a. Chumi hnuah: “Kan E.V. [Established, Authorized, a nih loh leh King James Version] Bible-ah hian JEHOVA hming hi a chuang tlêm hle a . . . Pathian hming bil aiah Lalpa tiin kan chhiar mai ṭhîn,” tiin a sawi bawk. Shadwell-a chuan: “Lalpa” tih chu Pathian hming aiawhtua hman atân chuan “nihna inâwm lo ber a ni” tih sawiin, a mah ngei pawh an ramah chuan “Lalpa” tia koh a nih thu a sawi tel a ni.

 Shadwell-a chuan Matthaia bu a lehlin chu kum 1859-ah a tlângzarh a, Matthaia leh Marka inkawp chu kum 1861-ah a tlângzarh a ni. Mahse, bu dangte chu a let chhunzawm thei ta lo. Kum 1861, January 11-ah kum 52 mi niin a thi a. Amaherawhchu, a thawhrimnate chu a thlâwn lo a ni.

 Shadwell-a lehlin Matthaia bu chu London-a sumdâwng hausa tak Frederick Parker-a (1804-1888)—kum 20 vêl a nih aṭanga Thuthlung Thar letling ṭantu—chuan a ngaihven hle a. Shadwell-a ang lo takin, Parker-a chuan Trinity zirtîrna chu a pawm lo va. Ani chuan: “Church zawng zawng hian [Pathian] Fapa duh tak . . . chungchânga thudik hi pawmin . . . Engkimtithei Jehova chauh be [ṭheuh] rawh se,” tiin a ziak a ni. Parker-a chuan Thuthlung Thar kutziak lehkhaa Kyʹri·os tih thu mal hi Lalpa Pathian leh Lal Isua sawi nâna hman kawp a nih avângin, Pathian leh Isua inan lohna chu hriat hran harsa a ti a. Chuvângin, Shadwell-a’n hmun ṭhenkhata Kyʹri·os tih thumal hi “Jehova” sawina a ni tih a chhinchhiahnate a han hmuh chuan a rilru a la hle a ni.

 Engtin nge chûng thute chu Parker-a’n a hriatthiam? Grik ṭawng a zir bâkah, Grik ṭawng vêkin lehkhabu tam tak leh grammar bute a tichhuak a. A hnuah, Sâpṭawng Bible ṭha zâwk tihchhuah a nih theih nâna kutziak Bible-te zir chianna lama theih tâwp chhuahtu pâwl Anglo-Biblical Institute-ah member a ni bawk. Tichuan, kum 1842 aṭangin Parker-a chuan Thuthlung Thar a lehlin hmasak ber chu a hran ṭheuhvin a tlângzarh ṭan ta a ni. c

 Kum eng emaw zât chhûng chu, Parker-a chuan: “Engtik aṭang khân nge Kyʹri os·tih thumal hi Lal Isua sawi nân leh Lapa Pathian sawi nâna hman ṭan a nih?” “Engvângin nge Kyʹri·os tih thu mal hi nihna lam sawina ni lova hming sawi nâna hman fo a nih?” tih ang chi zawhnate chungchânga a ngaih dânte chu a ziak ṭhîn a ni.

 Parker-a’n kum 1859-a Shadwell-a lehlin Matthaia bu-a Kyʹri·os thu mal awmzia hrilhfiahna a han hmuh chuan, Bible châng tam taka Kyʹri·os tih thu mal hi “Jehova tia lehlin tûr a ni,” tih a ring nghet ta tlat a. Chuvângin, Thuthlung Thar a lehlin tawh zawng zawng chu siam ṭhain, Pathian hming “Jehova” chu Grik Pathian Lekhathua a chung leh hnuai thute leh grammar azira a dahna tûr hmun nia a hriatna lai apiangah a dah lût leh vek a ni. Kum 1863-a Parker-a tihchhuah A Literal Translation of the New Testament Bible-ah chuan Pathian hming vawi 187 lai a chuang a. Hriat theih chinah, chu chu Sâpṭawnga tihchhhuah Kristian Grik Pathian Lehkhabu puma Pathian hming chuanna hmasa ber nia hriat a ni. d

 Kum 1864-ah, Parker-a chuan A Collation of an English Version of the New Testament . . . With the Authorized English Version tih chu a tlângzarh leh a. Chûng Thuthlung Thar bu hnihte a belhbawm chhan chu, mi dang lehlinte laka a Bible lehlin danglamna lai leh a danglam dân târ lan a duh vâng a ni. e

 Pathian hming dah luh leh a pawimawhzia târ lan nân, Parker-a chuan Authorized Version Bible aṭangin Rom 10:13: “Tu pawh Lalpa hming lam apiangte chu chhandamin an awm ang,” tih thu pawh tiamin, châng tam tak a la chhuak a. Tichuan: “Authorized English Version chhiartute zîngah hêng Bible Chângte hian Pathian Fapa kan Lal Isua Krista ni lovin Jehova a kâwk tih hre thiam [tu nge] awm?” tiin zawhna a siam a ni.

 Parker-a chuan a thuziak hrang hrangte tihchhuah nân pound sâng tam tak a hmang a. Kum khat chhûng lekin pound 800 , tûn laia British pound 1,00,000 ($1,32,000 U.S.) aia tam nêna inhen vêl chu a hmang hial a. Chu bâkah, a thuziak copy tam tak chu ṭawng letlingtu dangte leh nihna sâng tak chelh sakhaw hruaitute hnênah an lo chhiar ve atân a thlâwnin a thawn a ni.

 Parker-a thuziakte leh Thuthlung Thar a lehlinte chu tam tak chhut chhuah a ni lo chung pawhin, Bible lama mi thiam ṭhenkhat chuan an ngainêp hle a. Anni chuan Sâpṭawnga tihchhuah Thuthlung Thara Pathian hming bil dah lût leh tûra theih tâwp chhuahtu Parker-a chauh ni lovin, Shadwell-a leh mi dangte thawhrimna pawh an ngaihlu lo a ni.

 Minute sâwm awh chanchin tam tak târ langtu video hi en i duh ngei ang: Warwick Museum Fanna: “Bible leh Pathian Hming.”