United Nations report dân chuan:

•   Kum 2023, October 7 aṭanga October 23 thlengin, Gaza-Israel buaina avângin mi 6,400 aia tam an thi tawh a, mi 15,200-in hliam an tuar a, an zînga a tam zâwk chu mipuite an ni. Chu bâkah, mi sâng tam tak chu râl tlânin an awm bawk.

•   Kum 2023, September 24 khân, Russia leh Ukraine indona avângin Ukraine ramah, mipui 9,701 an thi a; 17,748-in hliam an tuar bawk.

 Bible-in indona avânga hrehawm tuartute tân eng beiseina nge a pêk?

 Bible chuan Pathianin “indonate chu kâwlkil thlengin a tireh” dâwn tih a sawi lâwk a. (Sâm 46:9) Ani chuan mihring sawrkâr zawng zawng thlâk tûrin a vân lam sawrkâr, a nih loh leh lalram chu a hmang ang. (Daniela 2:44) Pathian Lalram chuan mihringte chungah thlamuanna a thlen tawh ang.

 Pathian Lalrama Lalber Isua Krista tih tûrte hi lo chhinchhiah ang che:

•   “Pachhiain a auhvin ani chuan a chhanhim ang a, mi rethei, ṭanpuitu nei lo pawh chu, a chhanhim ang a. Mi rethei leh pachhiate chu a khawngaih ang a, pachhiate nunna chu a chhandam ang. An nunna chu hnehchhiahna leh nunrâwnna lak ata a tlan ang.”—Sâm 72:12-14.

 Pathianin a Lalram hmangin, indona leh tharum thawhna avânga awm chhiatna leh hrehawm tawrhnate chu a nuai bo vek ang.

•   “An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta.”—Thu Puan 21:4.

 Nakin lawkah, Pathian Lalram chuan he leiah inthlâk danglamna lian tak a rawn thlen thuai ang. Bible chuan vawiina kan hmuh mêk “indo thu leh indo thuthang” chungchâng a sawi lâwk a. (Matthaia 24:6) Hêngte leh thil thleng dangte hian mihringte rorêl hun “ni hnuhnûngahte” kan awm mêk tih a târ lang a ni.—2 Timothea 3:1.