Khawvêl puma mi tam tak chuan thlai hnah leh rahte chauh ringa nun chu an ngaihven hle a.

•   “Thlai hnah leh rahte chauh ringa nun tih chu ei leh in, silh leh fên leh, thil dang mamawhte atâna ramsate nunna thah loh dân ngaihtuah leh chutianga nun sawina a ni.”—The Vegan Society.

 Mi ṭhenkhatin thlai hnah leh rahte chauh ringa nun an duh chhan chu ramsate nunna an ngaih pawimawh vâng a nih bâkah, chhehvêl leh hrisêlna tihhmasâwn an duh vâng te, a nih loh leh sakhaw lam thil avângte pawh a ni bawk.

•   “Mi tam tak chuan ei leh in lama fîmkhur vâng ni lêm lova, thlai hnah leh rahte chauh ringtute chu an sakhaw thurin te, nungchang lama a thu thlûkna siam te, leh leilung ṭha zâwk siam an tum avângtea chutianga nung niin an thlîr a ni.”—Britannica Academic.

 Thlai hnah leh rahte chauh ringa nun chu kan leilung chhiatna siam ṭhat theih dân kawng ṭha zâwk a ni em? Bible-in eng nge a sawi?

 Bible-in min Siamtu Pathian Jehova a chuan mihringte chu ramsate aia chungnung zâwka thlîrin, an chunga thu nei tûrin thu a pe a. (Genesis 1:27, 28) A hnuah, Pathianin mihirngte hnênah ramsate chu ei tûr atân hman a phal a ni. (Genesis 9:3) Mahse, ramsate râwng taka cheibâwl erawh a phal lo.—Thufingte 12:10.

 Bible sawi dân chuan, sa kan ei dâwn leh dâwn loh chu mi mal thu tlûkna siam tûr a ni a. b Chumi chungchânga kan duh thlanna siamin Pathian mithmuhah mi ṭha zâwkah min siam chuang lo. (1 Korinth 8:8) Miin sa a ei dâwn leh dâwn lohva duh thlanna a siam chu tu mahin an sawisêl tûr a ni lo.—Rom 14:3.

 Bible chuan kan nun dânin khawvêla buainate a chingfel dâwn lo tih a târ lang a. Buaina tam tak chu he khawvêla politic te, khawtlâng te leh, sumdâwnna avângte a ni a, chûngte chu mihringte siam ṭhat theih rual a ni lo. Bible chuan heti hian a sawi:

•   “A kawi tawh kha chu tihngîl theih a ni lo.”—Thuhriltu 1:15.

 Min Siamtu chuan kan hmachhawn buainate chu a chingfel ang. Bible chuan a chinfel dân tûr chu entîr nei ṭawngkamin a sawi a.

•   “Vân thar leh lei thar ka hmu a; vân hmasa leh lei hmasa chu an boral tawh a, tuifinriat pawh a awm tawh lo a ni.”—Thu Puna 21:1.

 Pathian chuan mihring sawrkârte, a nih loh leh “vân hmasa” chu “vân thar,” a vân lam Lalram sawrkâr chuan a thlâk ang. A Lalram chuan “lei hmasa” chhe tak chu a tiboral ang a; tichuan, “lei thar,” a nih loh leh a thuneihna hnuaia inhuam taka intulûtte chungah ro a rêl tawh ang.

 Chu bâkah, Pathian Ram rorêlna hnuaia kan awm hunah chauh, mihringte chuan ramsate leh chhehvêl nêna inmil taka awm theih dân chu kan zir ang.—Isaia 11:6-9.