Kum 2022, November 20 aṭanga December 18 thleng awh FIFA World Cup hi mi maktaduai nga vêlin en tûra beisei a ni a. Mi tam tak chuan, hetiang ang chi infiamna hun pawimawhte hian mite inpumkhattîr mai aia tam a tithei niin an ngai a ni.

•    “Infiamna hian khawvêl thlâk danglam theihna a nei a. Mite a chawk phûr theiin, kawng danglam takin a inpumkhattîr thei.”—Nelson Mandela, South Africa president hlui.

•    “Football . . . hian hnam hrang hrangte chu beiseinaah, hlimnaah, tumruhnaah, leh hmangaihnaah a inpumkhattîr.”—Gianni Infantino, FIFA president. a

 World Cup, a nih loh leh infiamna hun pawimawh dangte hian chutiang chu a thlen thei tak tak em? Remna leh inpumkhatna hi a thlen theih a beiseiawm em?

 Kumin World Cup hian football khelh mai aia tam a keng tel a. Mihring dikna chanvo te, hnam inthliarna te, leh sum leh pai dinhmun intluk tlân lonate pawh telin, vântlâng mipuite leh politics chungchângah inhnialnate a chawk chhuak a ni.

 Chuti chung pawhin, mi tam tak chuan World Cup ang chi khawvêl pum huap infiamna hun pawimawhte chu ennawm an la ti hle a. Amaherawhchu, hêng hun pawimawhte hian mite beisei angin inpumkhatna tluantling a thlen thei lo. Chu ai mahin, Bible-in ‘ni hnuhnûng’ chhinchhiahna tûr nia a sawi inṭhen darhna rilru put hmang leh thiltihte chu kan hmu fo zawk a ni.—2 Timothea 3:1-5.

 Bible-ah hian khawvêl pum huap inpumkhatna atâna beisei tûr dik tak a chuang a. Chu beiseina chuan, vân sawrkâr, “Pathian Ram” rorêlna hnuaiah he leia mi tinte chu an inpumkhat tûr thu a tiam a ni.”—Luka 4:43; Matthaia 6:10.

 Chu Lalrama Lalber Isua Krista chuan khawvêl pumah remna a awmtîr ang. Bible chuan heti hian a sawi a ni:

•    “Mi felte chu an duah hluah hluah ang a, thlamuanna [remna] nasa tak chu a duah hluah hluah bawk ang.”—Sâm 72:7.

•    “Pachhiain a auhvin ani chuan a chhanhim ang a . . . An nunna chu hnehchhiahna leh nunrâwnna lak ata a tlan ang.”—Sâm 72:12, 14.

 Tûn laiah ngei pawh, Isua zirtîrnate chuan ram 239-a mi maktaduai tam takte chu a inpumkhattîr tawh a. Anni chuan huatna paih bo dân an zir a ni. Hriat belh nân, “Inhuatna Thleng Leh Ṭhîn Chu Titâwp Rawh,” tih thuziak inzawm chu chhiar ang che.