Isua Kalhlên Kût hnuhnûng ber chu a pawimawh hle a. Nakin lawkah a thih tawh dâwn avângin a tirhkohte chu Kalhlên Kût chaw eipuia kum tina hman tûr Lalpa Zanriah Chaw hmêlhriattîr a tum a ni. Chuvângin, Petera leh Johana chu pindan peihfel tûrin a tîr a. (Lk. 22:7-13; a kâwma milem en rawh.) Hei hian March ni 27-a neih tûr hriatrengna inkhâwm atân inbuatsaih a ngai tih min hriatnawntîr a ni. Kohhrante chuan thusawitu tûr te, entîr nei chhang leh uain atân te, leh thil dang atânte an inbuatsaih a ngai a ni. Mahse, engtin nge hriatrengna inkhâwm atân a mi mal takin kan inpuahchah theih ang?

I thinlung buatsaih rawh. Hriatrengna Bible chhiar tûrte chu chhiarin chhût ngun rawh. Hun duan chu Nî Tina Pathian Lehkha Thu Belh Chiannaah kan hmu thei a. Hun duan chip chiar zâwk chu revised New World Translation of the Holy Scriptures Appendix B12-A leh B12-B-ah a hmuh thei bawk. (Nun leh Rawngbâwlna Inzirna Lehkhabu April 2020 chhuak chu en bawk rawh.) Chhûngkuate chuan an chhûngkua Pathian biaknaa an sawiho tûr tlanna a pawimawhnate chu Watch Tower Publications Index a nih loh leh Jehova Thuhretute Zirbingna Hmanruaahte an zawng hmu thei ang.

Mi dangte lo tel tûrin sâwm rawh. Sâwmna campaign-ah theih tâwp chhuahin tel rawh. I tlawhkîr te, i Bible zirpui hlui te, i ṭhian te, leh i chhûngte ang chi, i sâwm theih tûrte chu ngaihtuah rawh. Upate chuan rawngbâwlnaa tel tawh lote chu an sâwm ngei tûr a ni. Tuemaw chu i awmna hmunah a awm lo a nih chuan a awmna hmuna hman tûr hriatrengna hun leh hmun i hriat theih nân jw.org home page chung lama KAN CHANCHIN tihah lûtin “Hriatrengna” tiah i zawng thei tih chu hre reng rawh.

Kan inbuatsaihnaah thil dang engte nge kan tih theih?