Ṭawng Tam Lutukna: Engkim i hrilhfiah vek tûrah ngai suh. Isua chuan mite chu an ngaihtuahna hmanga thu tlûkna dik siam tûra ṭanpui nân zawhnate a hmang a. (Mt. 17:24-27) Zawhna chuan zirna nung tak a nihtîr bâkah, zirlai hriatthiam dân leh rin dânte hre tûrin a ṭanpui che a ni. (be-E 253 ¶3-4) Zawhna i zawh hian, dawhthei takin a chhânna nghâk rawh. Zirlaiin chhânna dik lo a pêk chuan, a dik hrilh mai aiin zawhna dangte hmanga chhânna dik hre tûrin ṭanpui ang che. (be-E 238 ¶1-2) Zirlaiin ngaih dân tharte a hriatthiam theih nân muang deuh dapin sawi rawh.—be 230 ¶4.

A Thu Tihhnawkna: In thu zirlai chungchânga i hriat zawng zawng sawi chhuah duhna chu pumpelh rawh. (Joh. 16:12) Paragraph chhûnga thu pawimawh ber chauh ngaihsak rawh. (be-E 226 ¶4-5) Thu ngaihven awm tak pawh ni se, thu chipchiar lutuka sawina chuan a pawimawh laite a khuh bo thei a ni. (be-E 235 ¶3) Zirlaiin a thu pawimawh lai a hriatthiam tawh chuan a dawta paragraph-ah kal rawh.

Zir Zawh Mai Tumna: Kan tum chu a thu zir zawh mai ni lovin, zirlai thinlung thleng tûra zirtîr hi a ni. (Lk. 24:32) Zirlaia tel Bible châng pawimawh takte ngai pawimawhin, Pathian Thu thiltihtheihna chu hmang ṭangkai la. (2 Kor. 10:4; Heb. 4:12; be-E 144 ¶1-3) Hriatthiam awlsam tak tehkhinthute hmang ang che. (be-E 245 ¶2-4) Zirlai harsatna tawh leh thurinte ngaihtuahin, zir tûr chu a ṭûl ang angin siam rem rawh. Hetiang zawhna: “I thu zir hi engtin nge i ngaih?” “Hei hian Jehova chungchâng eng nge min zirtîr?” “Hetiang fuihna thute i zawm chuan eng hlâwkna nge i neih ang?” tih ang chite hi zâwt ang che.—be-E 238 ¶3-5; 259 ¶1.