New South Wales hmuna khawpui lian vak lo, Warialda, hmunah ka seilian a. Walrialda chu berâm leh rante vulhna hmun leh buh leh thlaite thlenga chînna, kawng hrang hranga lo neihna hmun a ni. He khua hi a faiin, thil sual lian tham tihna a tlêm hle.

Fa sawm zînga upa ber ka nih angin, kum 13 ka nih chuan ka chhûngkaw châwmnaa pui tûrin hna ka thawk ṭan a. Lehkha ka zir sân loh avângin farm-ahte hna ka thawk a. Kum 15 ka nih chuan ran enkawltu, sakawr sawizawitu angin ka thawk a ni.

Farm-a thawh chu malsâwmna a nih rualin, harsatna pawh a awm bawk a. Kawng khatah chuan, ka hna thawh leh ka thawhna hmun chu nuam ka ti a. Zânah tual zâwlah thing ka han tuah a, thla leh arsite ka thlîr laia tlai lam thlifîm tlehin a bul vêla thing a han chhêm ruala rim tui rawn lêng chem chemte chu nuam ka ti thei hle. Hêng thil duhawm takte siamtu hi Tuemaw a awm ngei ang tia ka ngaihtuah lai chu ka la hre reng. Kawng dangah chuan, farm-ah chuan ka tâna thil hlauhawm ṭhenkhat tih a awlsam phah thung a. Chhechhamte ka hre fova, meizial zûk maite pawh a awlsam hle. Zial zûk leh chhecham chu ka nuna thil tel a lo ni ta thuai a ni.

Kum 18 ka tlin chuan, Sydney-ah ka insawn a. Sipai-a ṭan ka tum a; mahse, lehkha ka zir san loh avângin hnâwl ka ni a. Hna ka hmu ta a, Sydney-ah kum khat ka awm a. Chutih hun lai chuan a hmasa ber atân Jehova Thuhretute nên kan intawng a. An inkhâwm pakhata tel tûra min sâwmna chu ka pawm a, an zirtîrnate chu thutak a ni tih ka hre ta thuai a ni.

Amaherawhchu, chumi hnu lawkah chuan ram hnuai lama kîr leh chu ka titlu ta a. Goondiwindi, Queensland hmunah ka inbengbel ta a. Hna ka hmu a, nupui ka nei ta a, vânduaithlâktakin zu ka in ṭan ta bawk a ni.

Ka nupui nên fa pahnih kan nei a. Ka fapate an pian hnu chuan, ka nunin a pan lam chu ngun takin ka ngaihtuah ṭan ta a. Sydney-a Thuhretute inkhâwmna hmuna ka thu ngaihthlâk chu ka hre reng a, chutiang deuh chu tih ka tum ta a ni.

Vênnainsâng chhuak hlui pakhat, Australia rama Jehova Thuhretute branch office inziahna ka hmu chhuak a. Min ṭanpui tûrin dîlna lehkha ka thawn ta a. Chumi chhân lêt nân Thuhretu ngilnei leh hmangaihna ngah takin min rawn tlawh ta a. Bible min zirpui ta thuai a ni.

Bible ka han zir ṭan chuan ka nunah inthlâk danglamna nasa tak ka siam a ngai tih ka hmu ta a. Bible châng pakhat ka rilru khawihtu chu 2 Korinth 7:1 hi a ni. Chumi châng chuan ‘tisa leh thlarau bawlhhlawhna zawng zawngah intifai’ tûrin min fuih a ni.

Zial zûk leh zu ngawlveina chu bânsan ka tum ta a. Chûng thil chîn ṭhante chu rei tak chhûng ka nun pêng pakhat a lo nih tawh avângin inthlâk danglam chu a awlsam lo. Mahse, Pathian tilâwm zâwnga nun ka tum tlat a. Ṭanpuina ka dawn ṭhat ber chu Rom 12:2-a chhinchhiah thu bul: “He khawvêl dân ang hian awm suh ula; . . . in rilru a thara awmin lo danglam zâwk tawh rawh u,” tih hi a ni. Ka thil chin ṭhante thlâk tûr chuan ka ngaihtuahna ka thlâk a ngai tih ka hria a, ka thil chin ṭhante chu Jehova thlîr dân ang—hlauhawm anga ka thlîr a ngai tih ka hria. A ṭanpuinain zial zûk leh zu ngawlveina chu ka bânsan thei ta a ni.

Thil harsa ber mai erawh chu chhechham bânsan ka tumna chu a ni. Ephesi 4:29-a Bible fuihna: “Thu ṭha lo rêng in kâan chhuak suh se,” tih chu ka hria a. Chuti chung pawhin, ka ṭawngkam bawlhhlawh bânsan ka tumna chu hlawhtling nghâl mai lo. Isaia 40:26 thu chhût ngunna chu ṭangkai ka ti a. Vâna arsite chungchângah, chu Bible châng chuan: “Chung lamah khian in mitte lên chho ula, khîngte khi tu siam nge ni en rawh u; ani chuan sipaihote khi indawt zêlin a hruai chhuak ṭhîn a, an hmingin a ko ṭheuh ṭhîn a; a chakna nasatna a avâng leh, thiltihtheihna lama a chak avângin pakhat mah kim lo an awm ngai lo,” tiin a sawi. Pathian chuan vân botuak zau tak—en nuam ka tih tak khi—siam tûrin thil tihtheihna a nei a nih chuan, amah tihlâwm nâna inthlâk danglamna siam tûrin chakna min pe thei ngei ang tih ka ngaihtuah a. Nasa taka ṭawngṭai leh ṭan lain, zawi zawiin ka ṭawngkamte chu ka thunun thei ta a ni.

Ran enkawltu ka nih angin, ka hna thawhna hmunah chuan mite an tlêm avângin mite biakna hun remchâng ka nei vak lova. Chuti chung pawhin, Jehova Thuhretute inkhâwmnatea zirtîrna pêkte aṭangin ka rilru sawi chhuah dân ka zir a. Thil dangte zîngah, chu zirtîrna chuan Pathian Ram chanchin ṭha mi dangte hnêna sawi thei tûrin min ṭanpui a ni.—Matthaia 6:9, 10; 24:14.

Kum tam tak tak chhûng chu kohhrana upa angin nuam titakin rawng ka bâwl a. Ka Kristian unaute ṭanpui nâna ka tih theih apiang tih chu chanvo hlu angin ka ngai a ni.

Kei lehkha zir sâng lo hian a zirtîrna ka dawn min phalsak avângin Jehova hnênah lâwmthu ka hrilh a. (Isaia 54:13) Thufingte 10:22 thu: “LALPA malsâwmna chuan a tihausa ṭhîn,” tih hi ka pawm thlap a ni.