Chhiartute Zawhna

Bible-ah hian no dawm kânga duhsakna hlan chungchâng târ lanna a awm lo, chuti a nih chuan, engvângin nge Jehova Thuhretute hian chutianga duhsakna hlan chu an pumpelh?

Wine no (a nih loh leh zu no) dawm kânga duhsakna hlan hi a hmun a zîrin inang lo mah se, tûn hma aṭang tawha mite lo tih ṭhîn dân a ni a, tih dân lâr tak pawh a ni. A châng chuan, an no dawmte chu ri chheng tûrin an insuttîr a. No dawm kângtu chuan mi dang tu emaw chu hlim tûr te, hrisêl tûr te, leh dam rei tûrtein duhsakna a hlân ṭhîn. Mi dangte chuan an ṭâwmpuizia lantîr nân mahni zu no ṭheuh an dawm kâng hnuah zu chu an in ta ṭhîn a ni. Mi tam tak tân chuan chutianga tih chu eng mah a pawina awm lo, a nih loh leh tih dân satliah ve mai niin lang mah se, Jehova Thuhretute’n an tih ve loh chhan a awm a ni.

Kristian-te’n chutianga an tih loh chhan chu mi dangte chu hlim tûr leh hrisêl tûrin an duh ve lo tihna a ni lo. Kum zabi khatnaa governing body chuan kohhrante hnêna lehkha a thawn khân “dam takin awm rawh u,” tiin a ziak a ni. (Tirhkohte 15:29) Biakna dika awm mi ṭhenkhat pawhin lalte an biak hunah: “Ka pu . . . hi kumkhuain dam reng rawh se,” a nih loh leh “Lal chu kumkhuain dam reng rawh se,” tiin duhsakna an hlân ṭhîn a ni.—1 Lalte 1:31; Nehemia 2:3.

A nih chuan, zu no dawm kânga duhsakna inhlan, he tih dân hi khawi aṭanga lo chhuak nge a nih? Kum 1968, Vênnainsâng January 1 chhuak chuan The Encyclopædia Britannica (1910), Volume 13, phêk 121-a thu chu la chhuakin heti hian a sawi a ni: “Zu no dawm kânga “dam reng rawh se” tia duhsakna inhlan hi hmân lai sakhaw biak dân chi khat, milem pathiante leh mitthite tâna inthawina an hlan huna zu inna aṭanga lo chhuak a ni a. Girk leh Rom mite chuan chaw an ei hunah an biak pathiante tân zu an leih baw ṭhîn a, thil an tihho hunahte chuan milem pathiante leh mitthite tân zu no dawm kângin an ṭawngṭai ṭhîn a ni. Chutianga an inthawinaa zu an inho ṭhîn chu mi nung damte pawh hrisêl takin awm se tih an duh vâng pawh a ni bawk,” tiin.

Chutiang chuan an la ti zêl em? Kum 1995-a tihchhuah International Handbook on Alcohol and Culture tih lehkhabu chuan: “[Zu no dawm kânga duhsakna hlan] chu hmân laiin thisen, a nih loh leh wine chu milem pathiante hnêna an inthawi laiin ‘dam reng rawh se,’ a nih loh leh ‘hrisêlna ṭha nei rawh se,’ tia an ṭawngṭai ṭhin sakhaw chîn dân aṭanga lo chhuak, a hnua vântlâng chîn dân pakhata inlet a ni thei,” tiin a sawi.

Ni e, hmân laia biakna dik lo pakhat aṭanga lo chhuak, a nih loh leh chumi nêna inang thil pakhat, design emaw, hnam dân emaw pawh ni se, chutiang thilte chu betu dikte’n an pumpleh ngei ngei tûr a ni tihna a ni reng hran lo. Engtîr nân, pawmgranet hi han ngaihtuah teh. Bible encyclopedia pakhat chuan heti hian a sawi: “Pawmgranet hi hnam dang sakhaw biaknaah chuan thil thianghlim atân an hmang niin a lang,” tiin. Mahse, Pathianin puithiam lalte kawrfual fêmah chuan pawmgranet lem vuah tûrin a hrilh a, Salomona sak biak ina dâr ban chhîp bâwkah chuan dâr pomgranet a chuang a ni. (Exodus 28:33; 2 Lalte 25:17) Chu bâkah, inneihna zungbun pawh hi sakhaw chhinchhiahna anga ngaih a lo ni ṭhîn tawh a. Chuti chung pawhin, tûn laia mi tam tak chuan chûngte chu hre lo vin, inneihna chhinchhiahna atâna an ngai tawh a ni.

Sakhaw thiltiha wine hman chungchâng hi eng nge ni ve? Entîr nân, Baal betute awmna Sekem khuaa mite chuan “an pathian inah an lût a, an eiin an in a,” Gideona fapa “Abimeleka chu ânchhia an lawh a.” (Rorêltute 9:22-28) Jehova chunga mi rinawm tuemaw chuan milem pathiante hnênah ṭanpuina dîlin Abimeleka chu ânchhia lawh tûrin chu an ei leh inhonaa a tel i ring em? Israelte zînga mi tam tak Jehova chunga an hel lai hun chungchângah Amosa chuan: “Maichâm awmna apiangah puan dahkham chungah an mu ṭhîn a, an Pathian inah chuan mi an chawitîr, mante chuan uain an in ṭhîn a,” tiin a sawi. (Amosa 2:8) Biakna dika telte chu milem pathiante tâna wine leihbuakna, a nih loh leh wine inhonaah an tel ang em? (Jeremia 7:18) A nih loh leh, zu no dawm kângin mi dangte chu ânchhia an lawh, a nih loh leh duhsakna an hlân ang em?

Ngaihvenawm tak chu, Jehova betute pawh a châng chuan bân pharin an ṭawngṭai ṭhîn a. Pathian dik tak hmaah an bân an phar a ni. Heti hian kan chhiar a ni: ‘Slomona chu LALPA maichâm hmaah a ding a, vân lam banin a kut a phar a; Aw LALPA, Israelte Pathian, nangmah ang hi Pathian dang rêng rêng an awm lo ve: . . .I chênna hmun vânan lo ngaithla langin; tin, lo ngaithlain ngaidam ang che,’ tiin. (1 Lalte 8:22, 23, 30) Chutiang bawkin, “Ezra chuan LALPA, Pathian ropui tak chu a fak a. Tin, mipui zawng zawng chuan an bân pharin, “Amen, Amen,” tiin an lo chhâwn a; tin, an kûn a, an hmaia lei siin LALPA chu chibai an bûk a.” (Nehemia 8:6; 1 Timothea 2:8) Chûng mi rinawmte chuan kut phara malsâwmna dîla an ṭawngṭai chu vânneihna pathiante hnênah a ni lo ti a chiang hle.—Isaia 65:11.

Tûn laiah, zu no dawm kânga duhsakna hlântu mi tam tak chuan pathian pakhat khat hnêna malsâwmna dîl niin an inngai lo ang bawkin, zu no an dawm kân chhan pawh an hrilhfiah hek lo. Mahse, a chhan dik tak an hriat loh avângin an tih angin a tih ve theih niin Kristiante chuan an ngai lo a ni.

Jehova Thuhretute chuan mi tam takin an tih ṭhin zaizir (taksa awm dân) ṭhenkhat chu tih ve tûr a ni lo tih an hria a. Entîr nân, mi tam tak chuan ram hla sak a nih laiin, leh ram flag hmaa kûn ang chi zaizirte (taksa awm dân) chu biakna angin an ngai lo tlângpui a. Kristian dikte chuan mi dangin chutianga an zaizirna (taksa awm dân) chu sawisêl lo mah se, anni chuan an ti ve lo. Thuhretu tam takte chuan chutiang hunahte chuan mi dangte tibuai lovin hriatthiamna nei takin thil an ti a ni. Engpawh chu nise, anni chuan Bible nêna inmil lo hnam chawimawina ang zaizirnaa tel loh chu an tum tlat a ni. (Exodus 20:4, 5; 1 Johana 5:21) Tûn laiah, mite chuan zu no dawm kânga duhsakna hlan chu sakhuana nêna inkûngkaih angin an ngai lo pawh a ni mai thei. Mahse, sakhuana nêna inkûngkaihna nei, mihring chakna piah lam thil aṭanga malsâwmna dawn duh vânga an tih ṭhin zu no dawm kânga duhsakna hlan chu, Kristiante chuan pumpelhna tûr chhan ṭha an nei a ni.—Exodus 23:2.