Mi ṭha famkim a nih angin, Isua chuan mite tawh ang lungngaihna leh lungkhamna tam tak a tâwk ve lo va. Mahse, mite chungah khawngaihna a lantîr ṭhîn a. An mamawh aia tam tihsak duhna a nei a ni. Ni e, khawngaihna chuan mite ṭanpui tûrin a chêttîr a ni. Bung 32, 37, 57, 99-a entîrnate hi han ngaihtuah teh.

Isua chu buai lutuk leh mi pawimawh tak anga a lan ngai loh avângin a pui a pangte chuan ani chu pan theih niin an hria a. Mite chuan anmahni a ngaihsak tih an hriat avângin, a bula awm chu nuam an ti a ni. Chumi chungchâng hriat nân, Bung 25, 27, 95 chu en ang che.

Isua chu mi mal takin leh Pathian betute rualin a Pa hnênah tih tak zetin a ṭawngṭai ṭhîn a. Chaw ei dâwnah chauh ni lovin, vawi tam tak a ṭawngṭai a ni. A Pa hnêna lâwm thu sawi tûr te, chawimawi tûr te, leh thu tlûkna lian tak a siam hmaa a kaihhruaina zawng tûrtein a ṭawngṭai ṭhîn a ni. Bung 24, 34, 91, 122, 123-a kan hmuh entîrnate chu ngaihtuah ang che.

Chawlh hahdam a mamawh châng pawhin, mi dangte tân a inpe ṭhîn a. Mahni indah pawimawh hmasakna rilru put hmang a nei lo. Hemi chungchângah pawh hian, kan zui theih tûr entawn tûr ṭha a hnutchhiah a ni. Bung 19, 41, 52-a kan hmuh a entawn tûr siam chu zir ang che.

Isua chuan mite ngaihdam a ṭûlzia a zirtîr mai ni lovin, a zirtîrte leh mi dangte a cheibâwl dânah ngaihdamna a lantîr a ni. Bung 26, 40, 64, 85, 131-a kan hmuh a entawn tûr siamte chu chhût ngun rawh.

Juda mite zînga a tam zâwkin Messia an pawm dâwn lo tih leh a hmêlmate’n ani chu an tihlum dâwn tih hrilh lâwk a ni a. Chuvângin, Isua’n a duh chuan, mite tân a tlêm thei ang berin thil a tihsak thei a. Mahse, ani chuan biakna dik chawisân nân ṭhahnemngai takin a bei a. Mite ngaihthahna leh dodâlna tâwktu a hnungzuitute tân ṭhahnemngaihna kawngah entawn tûr a siam a ni. Bung 16, 72, 103-nate chu en rawh.

Isua chu ṭha famkim lo mihringte aiin hriatna leh finna ang chi kawng tam takah a chungnung zâwk a. Ṭha famkim a nih avângin a vêla mite aiin tisa lam leh rilru lamah theihna tam tak a nei zâwk ngei ang. Chuti chung pawhin, mi dangte tân inngaitlâwm takin rawng a bâwlsak a ni. Bung 10, 62, 66, 94, 116-ahte chuan chumi chungchânga zir tûrte i hmu ang.

Isua chuan a tirhkohte leh mi dangte’n a entawn tûr siam an zui loh hunah leh a thusawite an nunpui loh hunah pawh an chungah dawhtheihna a lantîr reng ṭhîn a. Pathian Jehova an hnaih theih nâna an zir ngai zir tûrte chu a hrilh nawn fo a ni. Bung 74, 98, 118, 135-naa Isua lantîr dawhtheihnate chu ngaihtuah ang che.