Ka naupan lai aṭang hian leilung mawina hi ka ngaina a. Kan chhûngkua hian Central Finland-a ka pianna Jyväskylä khawpui hual vêla ram mawi tak leh dîl mawi tak tak awmna hmunah chuan kan intihlim ṭhîn a. Ramsate hi ka ngaina hle bawk. Ka naupan lai chuan, zawhtê leh ui ka hmuh apiang chu pawm ka duh ṭhîn! Ka rawn ṭhan chhoh chuan, mite ran sawisak dân ka hmuh hian hrehawm ka ti ṭhîn hle. A hnuah, ka rilru put hmang ang pu mite awmna, ramsa dikna humtu pâwl pakhat chu ka zawm ta a ni.

Ramsate dikna vênghim tûrin beihpui kan thlâk a. Thu hriattîrna lehkhate kan sem a, ramsa hmûl zawrhna dâwrte leh ramsate finfiahna laboratories dodâla kawng zawhnate kan kaihruai a ni. Ramsate vênghimtu pâwl thar pakhat kan din bawk. Ram dânte tihdanglam kan tum avângin rorêltute tihbuaina kan tâwk rêng a ni. Vawi tam tak man ka tâwkin court-ah hruai ka ni.

Ramsate ka ngaihtuah bâkah, khawvêl puma buaina dangte avângin ka rilru a hah hle a. A tâwpah chuan, Amnesty International leh Greenpeace pâwl pawh tiamin, pâwl tam tak ka zawm a. An thiltihte chu ka chakna zawng zawnga thlâwp ka tum a ni. Mi reithei te, ei tûr nei lo te, leh ṭanpui ngaite tâna inpein thil ka ti a ni.

Mahse, a tâwpah chuan, khawvêl hi thlâk danglam theih a ni lo tih ka hre ta a. Chûng pâwlte chuan buaina eng emaw chen chu chingfel thei mah se, buaina lian tak takte chu a zual zêl niin a lang. Sual thiltihtheihnain khawvêl a pum hmawm chu tu mahin an ngaihsak lo. Eng mah tihtheihna nei tawh lo ni hian ka inhria.

Beisei bo ngawih ngawiha ka awm avângin, ka lung a chhe hle a, Pathian leh Bible chungchâng ka ngaihtuah ṭan a. Tûn hmain Jehova Thuhretute nên Bible ka zir tawh ṭhîn a. Thuhretute chuan ka chungah ngilneihna leh mi mal ngaihsakna an lantîr avângin an chungah lâwm hle mah ila, ka nun dân inthlak danglam tûrin ka la inpeih lo a ni. Tûn ṭumah chuan thilte chu a danglam hle a ni.

Bible chu ka la a, ka chhiar ṭan a. Chu chuan nasa takin thlamuanna min neihtîr a. Bible châng tam takah chuan ramsate chu ngilnei taka cheibâwl tûrin a lo sawi reng tih ka hre ta a. Entîr nân, Thufingte 12:10 (C.L. Re-edited) ah chuan, “Mi dikte chuan an rante lam an khawngaih a,” tiin a sawi a. Khawvêl buainate hi Pathian thlentîr a ni lo tih ka hre thiam bawk a ni. Chu aiin, mi a tam zâwkin Pathian kaihhruaina an zawm loh avângin, kan buainate a zual tulh tulh a. Pathian Jehova hmangaihna leh dawhtheihna chungchâng ka hriat chuan ka rilru a khawih ta hle a ni.—Sâm 103:8-14.

Chutih chhûng chuan, Bible Zirtîrna Dik Tak Chu Eng Nge Ni? tih lehkhabu hmuh theihna coupon ka hmu a, chu chu ziak khatin ka thawn ta a. Rei lo têah, Thuhretu nupa tuak khat hian ka in kawngkâ an rawn kik a, Bible zir tûrin min sâwm a, ka pawm ta a ni. Kingdom Hall-a Kristian inkhâwmahte ka tel ṭan a. Bible aṭanga ka thu hriatte chu ka ngaina ta hle a ni.

Bible thutak avângin nasa takin ka inthlâk danglam a, ka lâwm tak zet a ni. Meizial zûk ka bânsan a, zu pawh ka in lutuk tawh lo. Ka lan dânte leh ka thusawi dânte chu ka siam ṭha a. Chu bâkah, khawvêl thuneitute chunga ka rilru put hmang pawh ka siamrem a ni. (Rom 13:1) Thunun loh ka nungchang bawlhhlawh tak chu ka bânsan bawk a ni.

Ka tâna inthlâk danglamna harsa ber chu mihringte leh ramsate dikna humtu pâwl chunga thlîr dân dik neih hi a ni. Chu chu zan khat thil thua inthlâk danglam theih a ni lo. A tîr chuan, chûng pâwlte aṭanga ka chhuah chuan anmahni phatsan niin ka inhria a. Mahse, kan khawvêl tâna beiseina dik awmchhun chu Pathian Ram hi a ni tih ka hre ta a. Tichuan, Pathian Ram thlâwp nân leh chumi chungchâng hre tûra mi dangte ṭanpui nân ka chakna zâwng zâwng hman ka tum ta a ni.—Matthaia 6:33.

Khawtlâng hmasâwn nâna hma latu ka nih angin, mite chu—mi ṭha leh ṭha lo tiin—pâwl hnihin ka ṭhen hrang a, mi ṭha lo nia ka ngaihte chu do ka inpeih reng a ni. Mahse, Bible thutak avângin, chutianga mi dangte huatna ka nei tawh lo. Chu aiin, mi zawng zawng chungah Kristian hmangaihna lantîr kan tum zâwk a ni. (Matthaia 5:44) Chu hmangaihna chu mi dangte hnêna Pathian Ram chanchin ṭha hrilhnain ka lantîr a. He hna pawimawh tak hian mite chu remna leh hlimna bâkah, beiseina dik tak a neihtîr dân ka hmuh hian ka hlim tak zet a ni.

Thilte chu Pathian Jehova kuta ka dah avângin rilru thlamuanna ka nei a. Siamtu a nih angin, ani chuan ramsate leh mihringte chu ṭha lo taka cheibâwl ni kumkhua tûrin a phal lo vang tih leh kan awmna leilung mawi tak hi tihchhiat chu a phal lo vang tih ka ring nghet tlat a. Chu aimahnin, rei lo têah a Lalram hmangin tihchhiata awm zawng zawngte chu a siam ṭha leh vek ang. (Isaia 11:1-9) Chûng thutakte ka hriat vâng chauh ni lovin, mi dangte pawh thutak hre tûra ka ṭanpui theih avângin ka hlim lehzual a. Khawvêl hi thlâk danglam ka tum tawh lo a ni.