U.S.A. ram, California state-a Los Angeles khawpuiah, khawlaia mi sual pâwlte leh ruih theih thil avânga hmingchhe tak vêng pakhatah ka seilian a. Kan unau hi paruk kan ni a, a upa ber dawttu ka ni.

Evangelical kohhran niin ka nuin min enkawl seilian a. Mahse, ka tleirâwl chhoh chuan nun chi hnihin ka nung chho ṭan a. Chawlhniah chuan kohhran zaipâwlah ka tel ṭhîn a. Ni dang zawngah chuan party-naahte kalin, damdawite ka khawih a, nungchang bawlhhlawhnaahte ka inhmang ṭhîn a ni.

Ka thinchhiain, mi dang kut thlâk ka chîng hle a. Ka hmuh remchân apiang chu mi dangte kut thlâk nân ka hmang mai ṭhîn. Kohhrana ka thu zirte chuan min ṭanpui lo hle. “Phuba lâk hi Pathian tih tûr a ni a—kei hi a hmanrua ka ni!” tiin ka sawi ṭhîn. Kum 1960 tâwp lama high school ka kal laiin, Black Panthers an tih vântlâng mite dikna humhalhtu pâwl pakhat chuan ka rilru a hneh hle a. Tichuan, vântlâng mite dikna humhalhna lama inhmang zirlai insuihkhâwm pâwl chu ka zawm a. Vawi eng emaw zât lungawi lohna kan lantîr a; chutianga kan tih apiangin hun eng emawti chhûng school khâr a ngai hial ṭhîn.

Mahse, tharum thawh ka châkna avângin, lungawi lohna lantîr mai chu ka duhtâwk lo. Chuvângin, dân bawhchhiatna thiltihahte chuan ka tel ṭan a ni. Entîr nân, ṭum khat chu ka ṭhiante nên tûn hmaa United States-a Africa salte hrehawmzia târ langtu film kan en a. Chu film-a kan thil hmuhte chuan min tihthinrim êm avângin, film enna hmuna mingo ṭhalaite chu kan tibuai ta chiam a. A hnuah, kan chhehvêla mingoho chênnaahte va kalin kut kan thlâk chhunzawm a ni.

Kum 20 ka tlin dâwn hnaih lam chuan, kei leh ka unau mipate chu mi tawrawt tia hriat kan ni dêr tawh a. Kan unau chu police-te nên intihthiam lohna kan nei a. Ka nau mipa pakhat chu mi sual pâwl hmingthang tak pakhat zînga mi a ni a, kei pawhin chu pâwl chu ka zawm ve nghe nghe. Ka nun chu a chhe zual telh telh a ni ber.

Ka ṭhiante zînga pakhat nu leh pate chu Jehova Thuhretute an ni a. An inkhâwmnaa tel ve tûra min sâwm chuan ka va tel ve a. Ka va thlen phat aṭangin Thuhretute danglam bîkzia chu ka hmu nghâl a ni. Mi tinin Bible an ken ṭheuh bâkah, inkhâwm chhûng zawng Bible chu an hmang reng a. Ṭhalaite ngei pawhin inkhâwmah chuan thu an sawi a nih chu! Pathian hming chu Jehova a ni tih leh mite’n a hming an lam hriatna chuan ka rilru a khawih hle a. (Sâm 83:18) Kohhrana mite chu hnam chi hrang hrang an ni a; mahse, hnam inthliar hranna a awm lo tih chiang takin ka hmu a ni.

A tîr chuan, Thuhretute nêna Bible zir chu ka duh lo va; mahse, an inkhâwmnaa tel erawh nuam ka ti hle. Zan khat chu, Thuhretute inkhâwmnaa ka tel laiin, ka ṭhiante chu concert-naah an kal a. Chutah chuan, a jacket lâksak an tum ṭhalai pakhat chuan a lo phal loh avângin an sawisa hlum a ni. A tûkah chuan, an thiltih chu an uanpui zâwk mah a. Court hmaa an thu buai ngaihtuah a nih lai pawhin, an thil sual tih chu an ngai ho lam hle a. An vai deuhthaw chuan dam chhûng lung in tâng tûra tih an ni. Chumi zâna an bula ka awm lo chu ka lâwm khawp mai. Ka nun dân chu thlâk danglam ka tum ta a; tichuan, Bible ka zir ṭan ta a ni.

Hnam dang pâwng huatna ka neih nasat ṭhin êm avângin, Thuhretute zîngah chuan mak ka tih ngawih ngawih thilte ka hmu a. Entîr nân, mingo pa pakhat chu ram danga a zin chhûng chuan, mihâng chhûngkaw khatin a fate an lo enkawlsak a. Chu bâkah, mingo chhûngkaw khat chuan chênna tûr nei lo mihâng ṭhalai pakhat chu an inah an chêntîr bawk. Chûngte ka hmuh hnu chuan, Jehova Thuhretute hi Johana 13:35-a Isua thusawi: “In inhmangaih chuan mi zawng zawngin ka zirtîrte in ni tih chumiah chuan hria ang,” tih nunpuitu Kristian dikte an ni tih ka ring nghet ta a. Inunauna dik tak ka hmu ta a ni.

Bible ka zirna aṭangin ka thil ngaihtuah dân chu ka thlâk a ngai tih ka hre ṭan a. Remna siamtu anga lan mai ni lo va, chu chu nun kawng ṭha ber a ni tih ring tûrin ka rilru ka siam fel a ngai a ni. (Rom 12:2) Zawi zawiin hma ka sâwn chho va. Kum 1974, January thlaah Jehova Thuhretu niin baptisma ka chang ta a ni.

Baptisma ka chan hnuah pawh ka thin chhiatna chu ka thunun zawm zêl a la ngai a. Entîr nân, ṭum khat chu in tin kal rawngbâwlnaa ka chhuah laiin, ka motor-a radio rutu rûkru pakhat ka ûm a. Ka ûm phâk ṭêp tihah chuan ka radio chu paihin a tlan bo ta a ni. Unaute hnêna ka radio ka hmuh leh dân ka han hrilh chuan, kohhran upa pakhat chuan, “Stephen, rûkru chu ûm phâin man ta la, engtin nge i tih ang?” tiin min zâwt a. Chu zawhna chuan remnna siamtu ni tûra theih tâwp chhuah zawm zêl tûrin min chêttîr a ni.

Kum 1974, October thla aṭangin hunbi kimin rawng ka bâwl ṭan a, mi dangte Bible zirpui nân thla tin dârkâr 100 kan hmang ṭhîn a ni. A hnuah, New York khawpui Brooklyn-a awm Jehova Thuhretute world headquaters-ah rawngbâwl theihna chanvo hlu tak ka nei a. Kum 1978-ah ka nu dam lo enkawl tûrin Los Angeles-ah ka kîr leh a. Kum hnih hnuah ka nupui duh tak Aarhonda-i nên kan innei a. Ka nupui hian ka nu thih nî thlengin kan enkawlna kawngah min ṭanpui nasa hle a ni. A hnuah, kan nupain Watchtower Bible School of Gilead kan kal a, Panama-ah missionary nia rawngbâwl tûra tih kan ni.

Baptisma ka chan aṭangin thinrim theihna dinhmun tam tak ka hmachhawn a. Min tihthinrim tumtute pumpelh dân leh kawng danga chutiang dinhmunte chinfel dân ka zir a ni. Ka nupui pawh tiamin, mi tam tak chuan chutiang dinhmunte ka hmachhawn dân avângin min fak ṭhîn a. Keimah ngei pawhin mak ka inti hial ṭhîn! Ka miziaa chûng inthlâk danglamnate chu keima theihna avâng a ni lo tih ka hria. Chu aiin, Bible-in mite nun a thlâk danglam theihzia finfiahna a ni tih ka ring tlat zawk a ni.—Hebrai 4:12.

Bible chuan nun awmze nei tak min pêk bâkah, remnna siamtu dik tak ni tûrin min zirtîr a. Mite kut thlâk ka chîng tawh lo va; chu aiin, thlarau lama tihdama an awm theih nân ka ṭanpui tawh zâwk a ni. High school ka kal laia ka mi huat êm êm ṭhin chu Bible ka zirpui hial bawk! Baptisma a chan hnu chuan, room khata kan awm tlân chângte a awm a. Vawiin nî thlengin ṭhian ṭha tak kan ni. Kan nupain kan Bible zirpuite zînga mi 80 aia tamte chu Jehova Thuhretute ni tûrin kan ṭanpui tawh a ni.

Nun awmze nei tak min pêk avâng leh inunauna dik tak hmanga hlimna min pêk avângin Jehova chungah ka lâwm tak zet a ni.