PATHIAN Jehova’n naupangte leh mahnia invênghim thei lote vênghim tûrin mak danglam taka thiltih châng a nei a. Khawpui pâwn lama i kal a nih chuan, chutianga Jehova’n a vênhim dân chu i hmu mai thei a ni. Mahse, a tîr chuan thilthleng chu i hre thiam tak tak lo pawh a ni thei.

Sava pakhat i bul hnaia rawn ṭum i hmu a. Hliam a tuar niin a lang. I va hnaih chuan a thla pakhat hnûk deuh pah hian a petek sawn zêl a. I han zui zêl chuan, i man phâk loh chin vêlah a petek sâwn ve zêl a. Tichuan, thâwk leh khatah a thlâwk bo ta daih a. A thla chu a hliam rêng rêng lo! Chutianga hliam tuar anga a awm chhan chu i hria em?—

Awle, a rawn ṭumna bul hnaia hnim buk kârah a no tê an awm vâng a ni. A no tête chu i hmuh leh i tihnat a hlau hle a. Chuvângin, hmun danga a hruai kawi theih nân che a intina der a ni. Sava puiin a no tête a vênhim anga min vênghim theitu chu i hria em?—Bible chuan, Jehova chu a no tête a thlazâr hnuaia vênghimtu mupui nên a tehkhin a ni.—Deuteronomy 32:11, 12.

Jehova’n a fate zînga a ngaihhlut ber chu a Fapa, Isua hi a ni a. Isua vâna a awm lai chuan, a Pa anga thlarau thiltithei tak a ni a. Mahni a invênghim thei a ni. Mahse, leia a rawn pian khân, ṭanpuina a mamawh a. Vênhimna a mamawh a ni.

Pathianin leia ti tûra a duhte a tihhlawhtlin theih nân, Isua chu mi ṭha famkim nia a puitlin chhoh a ngai a. Mahse, Setana chuan Isua chu a puitlin hmaa tihhlum a tum a. Nausên mai a nih laia Setana’n tihhlum a tum dân leh Pathian Jehova’n a vênhim dân chanchin chu a ngaihvenawm hle. Chumi chanchin chu hriat i châk êm?—

Isua a pian hnu lawkah, Setana chu Khawchhak lama arsi êng tak angin a inlantîr a. Arsi chanchin zirtu mi fingte chuan chu arsi chu zuiin, Jerusalem panin mêl za tam tak an kal a. Chutah chuan Judate lal la ni tûr pianna hmun tûr chu an zâwkan ni a. Chumi chungchânga Bible sawite hretute chuan: “Bethlehem khuaah,” tiin an chhâng a ni.—Matthaia 2:1-6.

Jerusalema lal sual tak Heroda’n an bul hnai lawk khua Bethlehema lal thar a lo pian thu a hriat veleh, chûng mi fingte hnênah chuan: ‘Naute chu zawng chhuak ula, in hmuh veleh mi rawn hrilh ve ang che u,’ tiin a hrilh a ni. Heroda’n Isua awmna hriat a duh chhan i hria em?—Isua chu a îtsîk a, thah a duh vâng a ni!

Engtin nge Pathianin a Fapa chu a vênhim?—Awle, mi fingte’n Isua an va hmuh chuan, thilpêkte an pe a. A hnuah, Pathianin mi fingte chu Heroda hnêna kîr tawh lo tûrin an mumang lamah a vaukhân a. Chuvângin, Jerusalem lama lêt tawh lovin, kawng dang aṭangin an haw ta a ni. Heroda’n mi fingte an haw tawh tih a hriat chuan a thinrim hle a. Isua tihhlum a duh vâng ringawtin, Bethlehem khuaa naupang kum hnih achin hnuai lam zawng zawng a tihlum vek a nih chu! Mahse, chu thil a thlen lai chuan Isua chu Bethlehemah a awm tawh lo.

Isua a him theih dân i hria em?—Mi fingte an haw hnu chuan, Pathian Jehova’n Mari pasal Josefa hnênah tho va, a nupui leh a fapa chu Aigupta rama tlân bopui tûrin a hrilh a. Chutah chuan Isua chu misual Heroda lakah a him a ni. Aigupta aṭanga an kîr leh lai chuan, Pathianin Josefa chu hmun danga kal tûrin a hrilh leh a. Isua himna hmun tûr Nazareth-a kal tûrin a mumangah a hrilh a ni.—Matthaia 2:7-23.

Jehova’n a Fapa a vênhim dân kha i lo hria em?—Savapuiin hnim buk kâra a thuhrûk sava no tête ang, nausên Isua ang chu tute nge an ni i tih ang? Anmahni ang chu i ni lâwm ni?—Nangmah tihnat duhtu che pawh an awm bawk. Chu chu tu nge i hria em?—

Bible chuan Setana chu min ei châk êm êmtu sakeibaknei rûm ṭhîn angin a sawi a. Sakeibakneiin ramsa tê zâwkte a bitum ṭhîn angin, Setana leh a ramhuaite pawhin naupangte chu an bitum bîk a ni. (1 Petera 5:8) Mahse, Jehova chuan Setana aiin thil a tithei zâwk a. A fate chu a vênghim theiin, an chunga Setana thlentîr thil ṭha lo zawng zawng pawh a sût lêt vek thei a ni.

Bung 10-naa târ lan Diabola leh a ramhuaite’n tihtîr min tum kha i la hria em?—Ni e, Pathianin thil dik lo nia a sawi mipat hmeichhiatna hmang sual tûrin min duh a ni. A nih leh, tute chauhvin nge mipat hmeichhiatna chu hmang thei?—Ni e, puitling tawh mipa leh hmeichhia innei tawhte chauhvin an hmang thei a ni.

Mahse, lungchhiatthlâk takin, puitling tawh mi ṭhenkhat chuan kum tling lote mipat hmeichhiatna hmanpui chu nuam an ti a. Chutianga an tihna chuan, anmahni entawntu naupang a hmei a pate chu thil sual a tihtîr thei a ni. An chi thlah theihna pawh a dik lo zâwngin a hmantîr thei bawk. Chutiang chiah chu hmân laia Sodom khawpuiah a thleng a. Bible chuan, ‘mipa a pui a pangten’ Lota rawn tlawhtu mipate chu mutpui an tum thu a sawi a ni.—Genesis 19:4, 5.

Chuvângin, Isua’n vênhim a mamawh ang bawkin, nang ngei pawh mipat hmeichhiatna hmanpui tum mai theitu che chûng puitlingte—leh naupangte—lak aṭang chuan vênhim i ngai a ni. A tlângpuiin, chûng mite chu i ṭhian ṭha takte angin an lang ang. I laka an thil tih duhte sawi chhuak lo tûra i intiam a nih phei chuan, thil eng emaw an pe che pawh a ni thei. Mahse, chûng mite chu Setana leh a ramhuaite anga mahni hmasial tak leh mahni nawmchenna zawngtute mai an ni a. Chu bâkah, naupangte mipat hmeichhiatna hmanpuina hmanga nawmchen chu an thiltum a ni. Chu chu a va ṭha lo tak êm!

Mahni nawmchenna atâna an tih duh mai theihte chu i hria em?—Awle, i serh chu an khalhsak che pawh a ni thei a. A nih loh leh, an serh leh i serh chu an indaitîr tawn pawh a ni thei. Mahse, i serh chu tu mah i khalhtîr tûr a ni lo. I pianpui unaute leh i nu leh pate ngei pawh i khalhtîr tûr a ni hek lo.

Chutiang thil ṭha lo ti ṭhîntute lak aṭang chuan engtin nge i taksa chu i vênhim theih?—A hmasa berah chuan, i serh chu mi dangte khalhtîr suh. Tu emawin chutianga khalhsak che a tum a nih chuan, ring takin: “Khawih suh! I thiltih hi mi dang hnênah ka hrilh dâwn!” tiin sawi ang che. Nangmah vânga chutianga ti nia a insawi chuan, awih suh ang che. Chu chu a dik lo. Chutianga titu che chu tu pawh ni se, mi dang hnênah hrilh ang che! A thiltih chu sawi chhuak lo tûra a tih che pawhin i sawi ngei ngei tûr a ni. Sawi chhuak lo tûra thlêm nân chea thilpêk ṭha tak a pe che, a nih loh leh a vau che a nih pawhin, ani chu hnîm hnai tawh lo la, a thiltih chu mi dang hnênah sawi chhuak ang che.

I hlauh a ngai lo; chutih rualin, i fîmkhur erawh a ngai a ni. I nu leh pate’n mi ṭhenkhat laka fîmkhur tûr, a nih loh leh hmun ṭhenkhata kal lo tûra an hrilh che chuan, an thusawi chu i zawm a ngai a ni. Chutianga i tih chuan, mi suaksualte’n i chunga thil ṭha lo an tih theihna hun remchâng chu i pumpelh tihna a ni ang.