BUNG 8

Engtin Nge Ṭhian Ṭha Ka Siam Theih Ang?

“Ka thin a rim hian rilrua ka veite tu emaw hnêna hrilh ka duh ṭhîn a. Ka lungchhiat lai chuan min thlamuantu tûr tu emaw ka mamawh ṭhîn. Ka hlim lai chuan tu emaw hnêna ka hlimna chungchâng hrilh ka duh bawk. Ka tân chuan ṭhian hi ka mamawh tak zet a ni.”—Brittany-i.

Naupangte chuan infiampui an mamawh a, tleirâwlte chuan ṭhian an mamawh tia sawi a ni. A danglamna chu eng nge ni?

Infiampui tih chu i ṭhian atân i hman tu emaw a ni.

Ṭhian tih chu i ngaih hlut tak tehnate ṭâwmpuitu tu emaw a ni.

Chu bâkah, Bible chuan “ṭhian chuan englai pawhin a hmangaih reng a, mangan nî atâna unauva piang a ni,” tiin a sawi a. (Thufingte 17:17) Chu chuan naupang laia infiamna hmuna i ṭhian neih aia nghet zâwk ṭhian siamna chu a târ lang!

Thu dik: Zawi zawiin i rawn puitling chhova, i ṭhian mamawhte chu

1. Mize duhawm tak takte

2. Fak tlâka nung

3. A ṭha zâwnga thunun theitu che

Zawhna: Engtin nge chutiang ṭhiante chu i hmuh theih? A hmuh theih dân i bih chiang ang u.

Inṭhianna Awmtîrtu #1—Mize Duhawm Tak Takte

I hriat ngaite. Ṭhiana inchhâl apiangte hi ṭhian ṭha an ni vek kher lo. Bible chuan “ṭhian tam tak siam chuan mahni intihchhiatna a siam a ni,” tiin a sawi hial a ni. (Thufingte 18:24) Chu chu a lutuk i mai thei. Mahse, heti hian ngaihtuah ang che: I chunga hun remchâng latu “ṭhian” i nei ngai tawh em? I hnung lama i chanchin sawitu ṭhian, a nih loh leh i chungchâng dik lo taka thehdarhtu ṭhian i nei ngai tawh em? Chutiang ṭhian chu i ring thei lo ngei ang. a Ṭhian siam hunah ṭhian neih tam lam aiin an mizia chu a pawimawh zâwk tih hre reng ang che!

I tih theihte. Entawn tlâk mizia neitute chu ṭhian atân thlang rawh.

“Mi tin hian ka ṭhian Fiona-i chu a ṭha zâwngin an thlîr a. Kei pawh amah anga mite’n a ṭha zâwng min sawi chu ka duh a. Amah ang bawka hming ṭha neih ka duh ve a ni. Ka tân chuan chu chu thil duhawm tak a ni.”—Yvette, 17.

He inzirna hi ti chhin rawh.

1. Galatia 5:22, 23 chhiar rawh.

2. Heti hian inzâwt rawh, ‘Ka ṭhiante chuan “thlarau rahte” pawh telin mize ṭhate an lantîr em?

3. I ṭhian ṭha berte hming chu a hnuaiah hian ziak rawh. An hming bulah an mize ṭhate ziak ang che.

Hming

․․․․․

Mizia

․․․․․

Sih hmuhna: Rilruah an mize ṭha lote chauh a lo lan chuan ṭhian ṭha zâwk zawn hun a ni thei!

Inṭhianna Awmtîrtu #2—Fak Tlâka Nung

I hriat ngaite. Ṭhian kawm i ngainat poh leh ṭhian ṭha lo i nei tam lehzual ngei ang. Bible chuan: “Mi fing pâwl la, i lo fing ang a, mi â pawl erawh chu hrehawm tuar phahna a ni,” tiin a sawi a. (Thufingte 13:20) “Mi â” tih thu mal hian school-a mark hmu ṭha lote emaw, mi ang lote emaw sawina a ni lo. Chu aiin, thil chhût dân dik tak hrilh pawha pawm duh lotute leh nungchang lama tehna zâwm duh lotute an ni a. Chutiang ṭhian chu i kâwm duh lo ngei ang!

I tih theihte. Mi eng ang pawh ṭhiana siam aiin, thliar hrang thiam rawh. (Sâm 26:4) Mahse, chu chu thlei bîk i nei tûr tihna a ni lo. A sawi tum tak chu, thliar hrang thiam tih chu ‘mi fel leh mi suaksual, Pathian rawngbâwltu leh bâwl lotu thliar thei’ tûrin hriatna i nei tâwk tihna a ni.—Malakia 3:18.

“Ka nu leh pate chuan ṭhian ṭha—Pathian tehnate nunpuitu ka rualpuite hmu tûra min ṭanpui avângin ka lâwm tak zet a ni.”—Christopher-a, 13.

A hnuaia zawhnate chhâng rawh:

Ṭhiante nêna awm hunah, dik lo nia ka hriat thil engemaw ti tûrin min tihluih ka hlau em?

□ Aw

□ Ai

Ka ṭhiante chu an pawm loh hlauh vângin ka nu leh pate chu ka hmêlhriattîr lo vem?

□ Aw

□ Ai

Si hmuhna: Zawhnate chu ‘aw’ tia i chhâng a nih chuan tehna sâng tak neitu—Kristian nun kawnga entawn tûr ṭha siamtute chu ṭhian atân zawng rawh.

Inṭhianna Awmtîrtu #3—A Ṭha Zâwnga Thunun Theitu Che

I hriat ngaite. Bible chuan: “Ṭhian sualte chuan nungchang ṭha an tikhawlo ṭhîn,” tiin a sawi a. (1 Korinth 15:33) Ṭhalai pakhat Lauren-i chuan: “Ka school kalpuite chuan ti tûra min hrilhte ka tih chhûng chuan min kâwm a. Ṭhian kawm tûr ka neih loh avângin an tih anga tih ve ka tum ta a ni,” tiin a sawi. Lauren-i chuan mi dangte tehna mila nun i tum chuan, chess inkhelhanaa a sate angin, an duhna lam lamah an tawlhsawn tih a hmu chhuak a. Chutiang mi nih chu tum suh!

I tih theihte. An nun dân anga nung ve tûra thlâk danglam tum tlattute nêna in inlaichînna chu titâwp rawh. Chutianga hma i lâk chuan, ṭhian i nei tlêm mai thei; mahse, hlimna i nei lehzual ang a, a ṭha lama thununtu tûr che ṭhian ṭhate nei thei tûrin kawng i hawng a ni ang.—Rom 12:2.

“Ka ṭhian ṭha Clint-a chu zaidam tak leh khawngaihna ngah tak a ni a, ṭhiana ka neih neih avângn min tichak hle a ni.”—Jason-a, 21.

A hnuaia zawhnate hi inzâwk rawh:

Ka ṭhiante tihlâwm duh vâng maiin ka inthuam dân te, ṭawngkam te, leh thiltihte chu a ṭha lo zâwngin ka thlâk danglam ang em?

□ Aw

□ Ai

Nungchang lama rinhlelh kaihna hmunah mahni chuan kal ṭhîn lo mah ila, ṭhiante nên ka kal ṭhîn em?

□ Aw

□ Ai

Sih hmuhna: Kan târ lan tâk zawhnate hi ‘aw’ tia i chhâng a nih chuan i nu leh pate emaw, puitling dangte emaw hnênah thurâwn dîl ang che. Jehova Thuhretute zînga mi i nih chuan, kohhran upate hnênah a ṭha zâwnga thunun theitu tûr che ṭhian ṭha thlannaah ṭanpuina i mamawh thu i hrilh thei bawk a ni.

[Footnote-te]

BIBLE CHANG PAWIMAWH LAI

“Unau aia nghet zâwk ṭhian an awm ṭhîn.”—Thufingte 18:24.

THURAWNTE

Tehna sâng tak milin nung la; tichuan, chutianga nun tum tlattu mi dangte hmuh chu i tân a awlsam lehzual ang a. Anni chu ṭhian ṭha berte an ni ngei ang!

I LO HRE TAWH EM . . . ?

Pathianin mi thlei bîk a nei lova; mahse, ‘a puan ina mikhual’ anga thleng tûrte chu fîmkhur taka thlangin a pawm a ni.—Sâm 15:1-5.

Hmalâk dân tûr!

Ṭhian ṭha nei tûra, ka tih theihte ․․․․․

Ṭhian ni tûra ka duh, kei aia upa ṭhenkhatte chu ․․․․․

Hemi chungchânga ka nu leh pate ka zawh duhte ․․․․․

ENGTIN NGE I NGAIH?

● Ṭhian i siamnaah i ngaihhlut ber miziate chu eng nge ni a, engvângin nge?

● Ṭhian ṭha tak ni tûra i neih ngai miziate chu eng nge ni?

[Thu tâwi]

“Ka nu leh pate chuan ṭhian zaho khat chu kâwm tawh lo tûra min hrilh chuan, anni lo chu kawm duh ka nei si lo tiin mahniin ka inhrilh a. Ka nu leh pate thurâwn pêk chu a ṭha a ni, an thurâwn pêkte a hnua ka’n ngaihtuah lêt hian ṭhian ṭha zâwk tam tak an awm tih ka hre chhuak a ni.”—Cole-A

[Phêk]

Hêng rawtnate hi tih tum rawh

I nu leh pate chu inṭhian ṭhatna chungchâng sawipui rawh. I kum rual an nih laia an ṭhian neihte chungchâng chu zâwt la. Ṭhian an thlanna kawngah inchhîrna an nei em? An nei a nih chuan, engvângin nge an neih? Buaina an lo tawh ṭhenkhatte i pumpelh theih dân zâwt ang che.

I ṭhiante chu i nu leh pate hmêlhriattîr rawh. Chutianga tih chu i hreh a nih chuan, ‘Engvângin nge hrilh ka hreh?’ tiin inzâwt ang che. I ṭhiante chungchângah i nu leh pate pawm loh zâwng thil eng emaw awm niin i hria em? Chutiang a nih chuan, ṭhian i thlan hunah i fîmkhur lehzual a ngai thei a ni.

Ṭha taka ngaithlatu ni rawh. I ṭhian tâna ṭha tûr leh a lungkhamnate chungah ngaihsakna lantîr rawh.—Philippi 2:4.

Ngaidam rawh. Ṭha famkim tûrin beisei suh. “Kan zain thil tam tak kan tisual fo ṭhin a ni.”—Jakoba 3:2.

I ṭhian tân i hun ṭhenkhat chauh hmang rawh. I hun neih zawng zawng pêk a ngai lo. Ṭhian dik tak chuan i mamawh hunah an awmpui ang che.—Thuhriltu 4:9, 10.

[Thu lâk chhuate]

Mi dangte tehna mila nun i tum chuan, chess inkhelhanaa a sate angin, an duhna lam lamah an tawlhsawn