BUNG 25

Serh hrawt ka bânsan theih dân?

“Kum riat mi ka nih khân serh hrawt ka chîng ṭan a. A hnuah chuan, hemi chungchânga Pathian thlîr dân chu ke hrethiam ta a. Chutianga ka tih palh leh ṭhin châng chuan hrehawm ka ti thei hle. ‘Engtin nge kei ang mi hi Pathian hian a hmangaih theih tiin ka inzâwt ṭhîn a ni.—Luiz-a.

I HAN tleirawl chhuah hian tisa châkna a so sâng hle thei a. Chuvâng chuan, serh hrawt chu chîn ṭhanah i nei mai thei. a Mi tam tak chuan thil pawi vak pawh ni lovin an sawi thei. “Tu mah an na hlei nêm,” tiin an sawi a. Amaherawhchu, chutiang thil tih loh nachhan tûr ṭha tak a awm a. Tirhkoh Paula chuan heti hian a ziak a ni: “Chutichuan in taksa pêngte chu . . . tihlum rawh u. . . châkna sual te,” tiin. (Kolossa 3:5) Serh hrawtna chuan châkna sualte chu a tihlum lo va, a belhchhah zâwk a ni. Chu bâkah, a hnuaia mite hi han ngaihtuah teh:

● Serh hrawtna chuan mahni chauh inngaihtuahna rilru put hmang a awmtîra ni. Entîr nân, inhrawt laiin mi chuan a taksa nawmna chauh a ngaihtuah ṭhîn a ni.

● Serh hrawtna chuan mi chu a mipat hmeichhiat pui ni lote chu châkna hrîkthlâkna hmanraw pakhat ang maiin a ngaih phah a ni.

● Serh hrawtna chuan mahni hmasialna ngaihtuahna a neihtîr a, chu chuan nupa inkâra mipat hmeichhiatna lungawithlâk tak neih a tihharsat phah a ni.

Serh hrawtna hmanga tisa châkna tih reh tum ai chuan mahni inthunun tum zâwk rawh. (1 Thessalonika 4:4, 5) Chutianga ti thei tûr chuan, i tisa châkna tichhuak thei dinhmun chu pumpelh hmasa phawt tûrin Bible chuan min fuih a ni. (Thufingte 5:8, 9) Chuti chung pawhin, inhrawtna bâwihah i tâng a nih chuan engtin nge ni ang? Bânsan i tum a; mahse, i hlawhchham pawh a ni thei. Pathian tehnate mila i nun theih loh avângin beisei awm lo anga thu tlûkna siam chu a awlsam mai thei. Chutiang chuan Pedro-a chuan a inngai a ni. Ani chuan heti hian a sawi: “Ka han tlûk leh chuan, hrehawm ka ti hle a. Ka thil tihte ngaihdamna ka thawk chhuak zo lo vang tiin ka ngaihtuah a. Ṭawngṭai pawh harsa ka ti,” tiin a sawi.

Chutiang chuan i ngaihtuah a nih chuan, huaisenna nei ang che. I dinhmun chu beisei bo a ni lo. Ṭhalai leh puitling tam tak chuan an chîn ṭhan serh hrawtna chu an bânsan thei a. Nang pawhin i thei a ni!

Inthiam Lohna Hneh Thei Dân

Kan hmuh tawh angin, serh hrawt chîngte chuan mahni inthiam lohna an nei fo ṭhîn a. Rinhlelh rual lohvin, “Pathian duh zâwnga tihlungngaiha in awmna” chuan chutiang chîn dânte chu bânsan tûrin a ṭanpui ang che. (2 Korinth 7:11) Mahse, a lutuka mahni inthiam lohna neih chu a hlauhawm thei a. I lunghnual lutuk avângin chu thil chîn ṭha lo bânsan i tumna chu tâwpsan i duh thei a ni.—Thufingte 24:10.

Chuvângin, thil chu a nih dân tûr angin dah tum ang che. Serh hrawtna chu thil thianghlim lo a ni a. Chu chuan, ‘châkna leh lâwmna tinrêng rawng a bâwltîr’ thei chein, nungchang thianghlim lo a siam thei a ni. (Tita 3:3) Chutih rualin, inhrawtna chu uirêna ang chi inngaihna sual lian tak ang erawh a ni lo. (Juda 7) Serh hrawt i chîng a nih chuan ngaihdam theih loh sual i ti anga i inngaih a ngai lo. A pawimawh ber chu do tum tlat leh bânsan tum chhunzawm tlat hi a ni!

Bânsan tum hnua tlûk leh chu lunghnual a awl hle a. Chutiang a thleng a nih chuan Thufingte 24:16 thu: “Mi fel chu vawi sarih tlu mah sela, a tho leh zêl ṭhîn; mi suaksual erawh chu chhiatnain a tiboral ṭhîn thu hi thinlungah vawng tlat ang,” tih hi thinlungah vawng tlat ang che. Han hnungtawlh leh lawkna chuan mi suaksualah a chantîr lo che. Chuvângin, beidawng suh. Chu ai chuan, i thil bânsan tawh tihtîr lehtu che chu chhût la, a ngaia kîr leh ṭhîn chu pumpelh tum rawh.

Pathian hmangaihna leh khawngaihna chu chhût ngun nân hun insiam la. Mi mal chak lohna laka mikhual bîk lo, fakna hla phuahtu Davida chuan: “Pain a fate a khawngaih ang hian, LALPA chuan amah ṭihtute chu a khawngaih ṭhîn. Kan taksa siam dân hi a hriat a, vaivut mai kan ni tih a hriat reng avângin,” tiin a sawi a ni. (Sâm 103:13, 14) Ni e, Jehova chuan kan ṭhat famkim lohnate hriatthiamna a nei a, ‘ngaihdam a peih’ a ni. (Sâm 86:5) Kawng leh lamah, ani chuan hmasâwn nâna ṭan la tûrin min duh a. Chuti chu, i thil chîn ṭhante bânsan tûrin eng ang hma lâkna ṭhate nge i neih theih ang?

Intihhlim nâna i thil en ṭhin chu chhût ngun rawh. Châkna chawk tho thei film emaw, TV program emaw i enin, chutiang web site-te chu i tlawh ṭhîn em? Fakna hla phuahtu chu: “Thil eng mah lo mai mai en lo tûrin ka mit mi lâktîr la,” tiin fing takin Pathian hnênah a ṭawngṭai a ni. b—Sâm 119:36

I rilru chu thil dang ngaihtuah luihtîr tlat rawh. Kristian pakhat William-a chuan heti hian thurâwn a pe a ni: “Mut hmain thlarau lam thil engemaw chhiar rawh. Nî tina i rilrua thil awm hnuhnûng ber chu thlarau lam thil a nih a pawimawh hle,” tiin a sawi.—Philippi 4:8.

Tuemaw hnênah i harsatna chu sawipui rawh. Tuemaw i rin tak hnêna han hrilh chu thil zahthlâk tak niin i ngai mai thei a. Mahse, chutianga tihna chuan chu chîn dân chu bânsan tûrin a ṭanpui thei che a ni. Chu chu Kristian Pakhat David-a chuan a tawng a ni. “A fâlin ka pa ka sawipui a. A thil min hrilh chu ka theihnghilh leh tawh ngai lo vang. Min thlamuan nâna a nui chungin, ‘Ka chhuang tak zet che a ni,’ tiin min hrilh. Chutianga hrilh chu ka tân a harsa hle tih a hria a ni. Chutiang khawpa min tichak thei leh tumruhna min pe thei eng thu dang mah a awm thei lovang.”

“Tichuan, ka pa chuan ‘ka la kalbo thui lutuk’ lo tih hmu thiam tûrin Bible châng ṭhenkhat min hmuhtîr a, ka kawng dik lo zawh a pawizia ka hrethiam tih chian nân Bible châng dangte min hmuhtîr bawk. Hun engemaw chen thlenga ‘invawng thianghlim,’ tûr leh chumi hnua kan sawidun leh tûr thu min hrilh a. Bânsan tuma theih tâwp ka chhuah hnua ka lo ti leh palh a nih chuan keh chhe mai lova, ti nawn tawh lo tûra ṭan la rei lehzual sauh tûrin min hrilh a ni,” tiin a sawi. David-a thu tâwp siam chu eng nge? “Ka harsatna min hriatpuitu leh min ṭanpuitu neih chu ka tâna thil ṭangkai ber a ni,” tiin a sawi. c

[Footnote-te]

BIBLE CHANG PAWIMAWH LAI

“Nimahsela tleirâwl châknate chu tlânsan la, thinlung thianghlima Lalpa lam apiangte zîngah chuan felna te, rinna te, hmangaihna te, remna te ûm ve rawh.”—2 Timothea 2:22.

THURAWNTE

Châkna a so sân hmain ṭawngṭai rawh. Thlêmna do hneh tûra ‘thiltihtheihna nasat zâwk’ pe tûr chein Pathian Jehova hnênah dîl ang che.—2 Korinth 4:7.

I LO HRE TAWH EM . . . ?

Mi chak lote chuan tisa châkna a so sân thut hian an do thei lo va. Mahse, mipa emaw, hmeichhe emaw rilru nghet tak nei chuan mahni chauhva an awm hunah pawh an insûm thei a ni.

Tim tum rawh!

Thil thianghlimte chauh ka ngaihtuah tlat theih nâna ka tih tûr chu ․․․․․

Tisa châkna laka tlâwm mai aia ka tih zâwk tûr chu ․․․․․

Hemi chungchânga ka nu leh pa ka zawh duhte chu ․․․․․

ENGTIN NGE I NGAIH?

● Engvângin nge Jehova chu ‘ngaihdam peih’ tak a ni tih hriat a pawimawh?—Sâm 86:5.

● Mipat hmeichhiatna lam châkna neia min siamtu Pathianin insûmtheihna nei tûra min hrilh a nih chuan, eng nge kan ti thei tih a rin tlat?

[Thu tâwi]

Chu harsatna ka chinfel hnu aṭang chuan Jehova hmâah chhia leh ṭha hriatna thiang tak ka nei tawh a, chu chu eng nên mah ka thleng ngai loh tûr thil a ni!—Sara-

[Thu lâk chhuate]

I tlân laia i tlûk chuan i tlân ṭantirhna aṭangin i tlân ṭhat leh a ngai tihna a ni lova—serh inhrawtna bânsan tuma i beih hnua i tih leh palhna chuan ṭan i lo lâk tawhna chu a nawtreh chuang lo