Baptisma ka chang ang em?
BUNG 37
Baptisma ka chang ang em?
A hnuaia thuziakte hi a dik leh dik loh chhinchhiah rawh:
Kristiante chu baptisma chang tûra phût an ni.
□ Dik
□ Dik lo
Baptisma chanin a tum ber chu suala tlu lût lo tûra nangmah vênhim hi a ni.
□ Dik
□ Dik lo
Baptisma chuan chhandamna a hmuhtîr thei che a ni.
□ Dik
□ Dik lo
Baptisma i chan loh chuan, i thiltihte avângin Pathian lakah mawhphurhna i nei lo.
□ Dik
□ Dik lo
I ṭhiante’n baptisma an chan chuan, nang pawhin i chang ve thei tihna a ni.
□ Dik
□ Dik lo
PATHIAN tehnate i nunpui a, amah nên inṭhianna ṭha tak i neih a, mi dangte hnênah i rinna chungchâng i hrilh a nih chuan baptisma chan i ngaihtuah chu thil pângngai tak a ni. Mahse, baptisma chang tûrin i inpeih tawh leh tawh loh engtin nge i hriat? A chhânna hre tûr chuan a chunga târ lan dik—a nih loh leh—dik lo tih chu i lo ngaihtuah ang u.
● Kristiante chu baptisma chang tûra phût an ni.
Dik. Isua chuan a zirtîrte chu baptisma chang tûrin a hrilh a. (Matthaia 28:19, 20) Amah ngei pawhin baptisma a chang a ni. Krista hnungzui tûr chuan, baptisma chang tûra thu tlûkna siam thei khawpa puitlin leh chutianga tih duhna i neih a ngai a ni.
● Baptism chanin a tum ber chu suala tlu lût lo tûra nangmah vênhim hi a ni.
Dik lo. Baptisma chan chu Jehova hnêna i inpumpêkzia mite hmaa lantîrna a ni a. I inpumpêkna chu a rûka i thil tih duhte lak aṭanga dangtu che intiamkamna a ni lo. Chu aiin, Jehova hnênah a tehnate mila nun i duh avângin i inpumpêk zâwk a ni.
● Baptisma chuan chhandamna a hmuhtîr thei che a ni.
Dik. Bible chuan baptisma chu chhandam ni tûra rahbi pawimawh tak niin a sawi a. (1 Petera 3:21) Mahse, baptisma chan hi chhiatna tawh huna zângnadawmna hmuh theih nâna an neih ṭhin insurance ang a ni lo. Pathian Jehova i hmangaih avâng leh i thinlung zawng zawnga kumkhuaa a rawngbâwl i duh avângin i chang zâwk a ni.—Marka 12:29, 30.
● Baptisma i chan loh chuan, i thiltihte avângin Pathian lakah mawhphurhna i nei lo.
Dik lo. Baptisma kan chang tawh emaw, kan la chang lo emaw pawh ni se, Jakoba 4:17-na chuan: “Tu pawh thil ṭha tih tûr hriaa ti si lo chu a tân sual a ni,” tiin a sawi a. Chuvângin, thil dikte i hriat a, tih tak zeta mahni nun inenfiah tûra i puitling tawh a nih chuan i nu leh pate emaw, Kristian puitling dangte emaw chu baptisma chan chungchâng sawipui rawh. Chutiang kawng chuan baptisma chang thei tûra hmasâwn dân i hre thei ang.
● I ṭhiante’n baptisma an chan chuan, nang pawhin i chang ve thei tihna a ni.
Dik lo. Baptisma chang tûr chuan mahni duh thua thu tlûkna i siam a ngai a. (Sâm 110:3) Jehova Thuhretute zînga mi nihnain a ken tel mawhphurhnate i hriat chian a, chu mawhphurhna lâk i inpeih hunah leh i inhuam hunah chauh i chang tûr a ni.—Thuhriltu 5:4, 5.
Nun Thlâk Danglamtu Hma Lâkna
Baptisma chan chu malsâwmna tam tak thlentu hma lâkna a ni a. Chutih rualin, mawhphurhna lian tak pawh a keng tel a ni—Jehova hnêna mi mala i inpumpêkna mila nun chu.
Mi mala inpumpêk tûrin i inpeih tawh em? Chutiang a nih chuan hlim nachhan tûr ṭha tak i nei a ni. I hmaah hian chanvo azawnga ropui ber—thinlung zawng zawnga Pathian Jehova rawngbâwlna leh a hnêna i inpumpêk tak zetzia lantîr zâwnga nunna—a awm a ni.—Matthaia 22:35-37.
Fing taka i nun i hman theih nâna thiltumte insiam dân chu zir ang che.
BIBLE CHANG PAWIMAWH BER
“Inthawina nung leh thianghlim leh Pathian lawm tlâk ni tûrin in taksa chu inhlânah ka ngên a che u; chu chu in rawngbâwlna âwm rêng a ni.”—Rom 12:1.
THURAWN
I nu leh pate ṭanpuinain, kohhranah baptisma chang thei khawpa thlarau lama hmasâwn tûra ṭanpui theitu tûr che tu emaw chu zawng rawh.—Tirhkohte 16:1-3.
I LO HRE TAWH EM . . . ?
Baptisma chan chu chhandam ni tûra “chhinchhiahna” pawimawh tak zînga pakhat a ni.—Ezekiela 9:4-6.
TIH TURTE!
Baptisma chang thei khawpa hmasâwn tûrin, a hnuaia Bible zirtîrnate chungchânga ka hriatthiamna ka tipung ang: ․․․․․
Hemi chungchânga ka nu leh pate hnêna ka zawh duhte chu ․․․․․
ENGTIN NGE I NGAIH?
● Engvângin nge baptisma chan chu rahbi pawimawh tak a nih?
● Engin nge ṭhalai pakhat chu hmanhmawh taka baptisma chantîr mai thei?
● Engvângin nge ṭhalai pakhat chuan inpumpêk a, baptisma chan chu a hreh mai theih?
[Phêk 306-naa thu lâk chhuate]
‘‘Baptisma ka chang tawh tih ka hriatna chuan thil dik lote ti lo tûra thu tlûkna fing siam tûrin min ṭanpui a ni.’’—Holly-i
[Phêk 307-naa bâwm]
Baptisma chungchânga zawh ṭhin zawhnate
Baptisma chuan eng nge a entîr? Tuia inhnimpil a, lo chhuah lehna chu mahni duh zâwnga nun i bânsan tawh a, tûnah chuan Pathian Jehova duh zâwng ti tûrin i nun i hmang tawh dâwn tihna a ni.
Jehova hnênah i inpumpêk tih awmzia chu eng nge ni? Mahni ta i ni tawh lo tih leh Pathian duh zâwng chu thil dang zawng aiin i dah hmasa ber tawh dâwn tihna a ni. (Matthaia 16:24) Baptisma i chan hmain, Pathian Jehova hnênah ṭawngṭaiin i inpumpêk tûr a ni.
Baptisma i chan hmain eng nge i tih ang? Pathian Thu nêna inmila nungin, i rinna chungchâng chu mi dangte i hrilh tûr a ni. Ṭawngṭaina leh a Thu zirna hmangin Pathian nêna in inṭhianna chu i tinghet zêl tûr a ni. Mi dangte tihluihna vâng ni lovin, mahni duh thlanna ngeia Jehova rawngbâwl i ni tûr a ni.
Baptisma chang tûrin kum bithliah chin a awm em? Kum chu a pawimawh ber lo va. Mahse, inpumpêkna awmzia hre thiam khawpin rilru lamah i puitling tâwk tûr a ni.
Baptisma chan i duh tawh a; mahse, i nu leh pate’n la nghâk rih tûra an tih che chuan engtin nge ni ang? Anni chuan Kristian nun kawnga thiltawn i neih deuh an duh vâng a ni thei a. An thurâwn pêk che chu ngaihlu la, chu hun chu Pathian Jehova nêna in inṭhianna tihngheh lehzual nân hmang ang che.—1 Samuela 2:26.
[Phêk 308, 309-naa bâwm]
Worksheet
Baptisma chan i tum em?
A hnuaia zawhnate leh thuziakte ngaihtuahin, i hmasâwn dânte inenfiah rawh. Chhânnate i ziah chhuah hmain, Bible châng târ lante chu keuvin en ang che.
Jehova i rinchhanzia chu eng kawngtein tûnah i lantîr?—Sâm 71:5. ․․․․․
A chhia leh a ṭha thliar hrang thei khawpin i hriat theihna chu i sawizawi tawh tih engtin nge i lantîr?—Hebrai 5:14. ․․․․․
Eng anga zingin nge i ṭawngṭai? ․․․․․
I ṭawngṭainaahte chuan eng ang dîl bîknate nge i neih a, chu chuan Jehova i hmangaihna chu engtin nge a târ lan?—Sâm 17:6. ․․․․․
I ṭawngṭaina chungchânga thiltum i insiam duh eng pawh chu ziak chhuak rawh. ․․․․․
Mi mala Bible zirna chu a hun takah i nei ziah em?—Josua 1:8. ․․․․․
Mi mala inzirna i neihnaah engte nge i telh? ․․․․․
Mi mala inzirna chungchânga thiltum i insiam duh eng pawh chu ziak chhuak rawh. ․․․․․
I rawngbâwlna chu a hlawhtling em? (Entîr nân: Mi dangte hnênah Bible zirtîrna bulpuite chu i hrilhfiah thei em? Tuina neite chu i tlawhkîr leh em? In lama Bible zirna kaihruai thei tûrin hma i la em?)
□ Thei □ Thei lo
Rawngbâwlnaah i nu leh pate an tel loh hunah pawh i tel em?—Tirhkohte 5:42.
□ Tel □ Tel lo
Rawngbâwlna chungchânga thiltum i insiam duh eng pawh chu ziak chhuak rawh.—2 Timothea 2:15. ․․․․․
Kristian inkhâwmahte i tel ziah nge, i tel mumal lo zâwk?—Hebrai 10:25. ․․․․․
Eng kawngtein nge inkhâwmahte i tel? ․․․․․
I nu leh pate an inkhâwm theih loh hunah pawh (inkhâwm rem an tih chuan) i tel ṭhîn em?
□ Tel □ Tel lo
Pathian duh zâwng tih chu nuam i tak zet em?—Sâm 40:8.
□ Ti □ Ti lo
Ṭhiante nêksâwrna i lo do tawh dânte chu a indawtin i ziak chhuak thei em?—Rom 12:2. ․․․․․
Jehova i hmangaihna i tihngheh reng theih nân eng tih nge i tum?—Juda 20, 21. ․․․․․
I nu leh pate leh i ṭhiante’n Jehova rawngbâwl an bânsan a nih pawhin, i la bâwl zawm zêl ang em?—Matthaia 10:36, 37.
□ Bâwl ang □ Bâwl lo vang
[Phêk 310-naa thu lâk chhuate]
Inneihna ang bawkin, baptisma chan chu nun thlâk danglamtu hma lâkna pakhat a ni a, holam taka lâk tûr a ni lo