BUNG 35

Engtin Nge Pathian Ṭhian Ka Nih Theih Ang?

A mi mal harsatna tawh avângin Jeremy-a chuan Pathian nêna inlaichînna ṭha neih a hlutzia a hria a. “Kum 12 mi ka nihin, ka pa chuan kan chhûngkua chu min chhuahsan a. Zan khat chu Pathian Jehova hnênah ka pa lo hawtîr leh tûrin ka ṭawngṭai a ni,” tiin a sawi.

A rilru a hah êm avângin, Jeremy-a chuan Bible a chhiar ṭan a. Sâm 10:14-na a chhiar chuan, a rilru a khawih hle a. Chu Bible châng chuan Jehova chungchângah: “Eng mah ti thei lo mi chu i hnênah a inkawltîr ṭhîn a: Pa nei lo ṭanpuitu i nih ṭhin kha,” tiin a sawi a. Jeremy-a chuan: “Jehova’n min rawn biain, ani chu min ṭanpuitu leh ka Pa a nih thu min rawn hrilh ang mai ni hian ka hria. Ani aia pa ṭha zâwk tu dang nge ka neih theih teh lul ang?” tiin a sawi.

JEREMY-A dinhmun ang i tawng emaw, tawng lo emaw pawh ni se, Bible chuan Pathian Jehova’n a ṭhian atân a duh che tih a târ lang a. Dik tak chuan, Bible-in: “Pathian hnaih rawh u; tichuan, anin a hnaih ang che u,” tiin a sawi a ni. (Jakoba 4:8) Chu Bible châng awmzia chu han ngaihtuah teh: Pathian Jehova chu i hmuh theih loh leh nang aia ropui zâwk daih ni mah se, ani chuan a ṭhian ni tûrin a sâwm che a nih chu!

Mahse, Pathian nêna inṭhian tûr chuan nangma lama theih tâwp i chhuah a ngai a. Entîr nân: Thingkûng tê i phun a nih chuan, amahin a rawn ṭhang mai lo vang. Rawn ṭhang chho tûr chuan, tui i pêk a, boruak inâwm tâwk i hmuhtîr a ngai dâwn a ni. Pathian nêna inṭhianna pawh chutiang bawk chu a ni a. A nih chuan, engtin nge chutiang inṭhianna chu ṭhang chho tûra i tih theih?

Inzirna A Pawimawh

Inṭhiannaah chuan inbiak pawhna—ngaihthlâk leh thusawi a tel a. Pathian nêna inṭhiannaah pawh chutiang bawk chu a ni. Bible chhiar leh zirna chu Pathianin kan hnêna a thusawite kan ngaihthlâk dân kawng a ni.—Sâm 1:2, 3.

Ni e, inzirna chu i thil nuam tih zâwng a ni lo thei a. Ṭhalai tam tak chuan TV en te, games khelh te, leh ṭhiante nêna len kual chu an duh zâwk ṭhîn a. Mahse, Pathian nêna inṭhianna neih i duh chuan, a awlsam zâwng a awm lo. A Thu, Bible zirna hmangin, a thusawi i ngaihthlâk a ngai a ni.

Mahse, thlaphâng mai suh. Bible zirna chu phurrit ang i nihtîr a ngai lo. Inzirna chu i thil nuam tih zâwng a nih loh pawhin, nuam tih dân i zir thei a ni. I tih tûr hmasa ber chu Bible zirna atâna hun pêk a ni a. Hmeichhe tleirâwl pakhat chuan: “Hun duan ka nei a. Zîng tin hian Bible bung khat ka chhiar hmasa phawt ṭhîn,” tiin a sawi. Kum 15 mi, Maria-i pawhin tih dân dang a nei a. Ani chuan: “Zan tin ka mut hmain Bible ka chhiar ṭhîn,” tiin a sawi.

Inzirna hun duan i neih ṭan theih nân,  phêk 292-a bâwm hi en rawh. Tichuan, Pathian Thu, Bible zirna atâna minute 30 vêl i hman theih hun tûr chu ziak ang che.

․․․․․

Hun duan siam chu bul ṭanna mai a ni a. Zirna i neih ṭan tak tak chuan, Bible chhiar chu a awlsam reng lo tih a takin i hre mai thei a ni. Kum 11 mi, Jezreel-a thusawi tlang tak hi i ṭâwmpui ngei a rinawm, “Bible châng ṭhenkhat chu rilru pêk a ngaiin, hriatthiam har tak a ni,” tiin a sawi. Chutianga i awm a nih chuan, beidawng mai suh. Bible zirna chu i ṭhian Pathian Jehova thusawi ngaithla tûrin hun i pe angin thlîr tlat ang che. A tâwpah chuan, Bible zirna chu a phûrawmin, manhla tak a ni tih i hmu ang!

Ṭawngṭaina A Pawimawh

Ṭawngṭaina chu Pathian hnêna thu kan sawi dân a ni a. Chu chu thilpêk ropui tak a nihzia han ngaihtuah teh! Pathian Jehova chu chhûnah emaw, zânah emaw eng hunah pawh i ko thei a ni. Ani chu englai pawhin ngaihthlâk a inpeih reng a ni. Chu mai bâkah, i thusawite chu ngaihthlâk a duh a. Chuvângin, Bible chuan: “Engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se,” tiin min fuih a ni.—Philippi 4:6.

Chu Bible chângin a târ lan angin, Pathian Jehova hnêna i sawi theih thil tam tak a awm a. Chûng zîngah chuan i harsatnate leh lungkhamnate a tel thei a. I lâwmnate pawh a tel thei bawk. Eng pawh ni se, i tâna thil ṭha an tihte avângin i ṭhiante chungah i lâwm a ni lâwm ni? I ṭhian dang zawngte aia i tâna thil tam tak tihsaktu che Pathian Jehova chungah chungtiang chuan lâwmthu i sawi thei a ni.—Sâm 106:1.

A hnuaiah hian, Jehova chunga i lâwmna tûr chhan ṭhenkhat ziak chhuak rawh.

․․․․․

A châng chuan hlauhna leh lungkhamnate i nei ngei ang. Sâm 55:22-na chuan: “I rit phurh chu LALPA chungah nghat la; tichuan, anin a tichak ang che; mi fel chu engtikah mah tihnghîn a phal lo vang,” tiin a sawi a ni.

A hnuaiah hian, ṭawngṭainaa i telh duh i mi mal harsatnate chu ziak chhuak rawh.

․․․․․

Mi Mal Thiltawn

Pathian nêna in inlaichînnaa i ngaihthah loh tûr thil dang pakhat a awm leh a. Fakna hla phuahtu Davida chuan: “LALPA ṭhatzia chu tem chhin teh rêng u,” tiin a ziak a. (Sâm 34:8) Davida’n Sâm 34-na hi thiltawn hlauhawm tak a tawh hnu lawka a phuah a ni. Ani chu amah tihhlum tumtu Lal Saula hnên aṭangin a tlânchhia a, chu chu thiltawn lungchhiatthlâk tak a ni. Mahse, a hnuah hmêlma Philistia mite zîngah inhumhimna a hmu a. Davida’n a thih ngeina tûr nia lang dinhmun a hmachhawn chuan, mite’n tu nge a ni tih an hriat loh nâna insiam danglamin, a dam khawchhuak thei a ni.—1 Samuela 21:10-15.

Davida chuan a fin avânga dam khawchhuak niin a inngai lo. Chu aiin, Pathian Jehova hnênah chawimawina a thlen zâwk a ni. Kan târ lan tâk Sâm ziakah khân, fakna hla phuahtuin: “LALPA chu ka zawng a; tin, ani chuan mi chhâng a, ka hlauh zâwng zawng zawng lakah chuan mi chhanhim ta a,” tiin a ziak a ni. (Sâm 34:4) Davida chuan a mi mal thiltawn aṭangin mi dangte chu “LALPA ṭhatzia chu tem chhin” tûrin a fuih thei a ni.

Pathian Jehova’n a ngaihsak che tih finfiahtu i thiltawn i hre chhuak thei em? I hre chhuak thei a nih chuan, a hnuaiah hian ziak ang che. Sihhmuhna: Thiltawn chu mak danglam tak a nih kher a ngai lo. Nî tina malsâwmna i dawnte chu ngaihtuah chhuah tum ang che, chûng zînga ṭhenkhat chu ho tham tak angin a lang mai thei.

․․․․․

I nu leh pain Bible an zirtîr che pawh a ni thei a. Chutiang a nih chuan, chu chu malsâwmna a ni. Mahse, nangmah ngein Pathian nêna mi mal inlaichînna ṭha i neih theih nân hma i lâk a ngai a. Chutianga hmalâkna i la nei lo a nih chuan, he bunga thuziak hi bul ṭan nân i hmang thei a ni. Pathian Jehova’n i thawhrimnate chu mal a sâwm ang. Bible chuan: “Dîl rawh u, tichuan, an pe ang che u; zawng rawh u, tichuan, in hmu ang,” tiin a sawi a ni.—Matthaia 7:7.

HEMI CHUNGCHANG HI VOLUME 1, BUNG 38 LEH 39-NAAH CHHIAR BELH RAWH

A DAWTA BUNG-AH CHUAN

Mite hnêna Pathian chanchin hrilh chu harsa i ti em? I thurinte i vênhim theih dân chu zir rawh.

BIBLE CHANG PAWIMAWH BER

“An thlarau lam mamawh hriate chu an eng a thâwl e.”—Matthaia 5:3, New World Translation.

THURAWN

Nî tin Bible phêk li i chhiar chuan kum khat chhûngin i chhiar chhuak ang.

I LO HRE TAWH EM . . . ?

lehkhabu i chhiarna leh Bible ṭanchhan fuihnate i chhân lêtna hian Jehova’n mi mal takin a ngaihsak che tih a târ lang a ni.—Johana 6:44.

TIH TURTE!

Mi mala Bible zirna hlâwkpui lehzual tûrin, ․․․․․

Ṭawngṭai ngun lehzual tûrin, ․․․․․

Hemi chungchânga ka nu leh pate hnêna ka zawh duhte chu, ․․․․․

ENGTIN NGE I NGAIH?

● Engtin nge mi mala Bible zirna chu nuam i tih lehzual theih?

● Engvângin nge Jehova’n mihring ṭha famkim lote ṭawngṭaina ngaihthlâk chu a duh?

● Engting nge i ṭawngṭai dân i tihhmasâwn theih?

[Phêk 291-naa thu tâwi]

Ka naupang laia ka ṭawngṭainaah chuan thu ngai ka chham nawn fo va. Mahse, tûnah chuan, nî tina ka tawn thil ṭhate leh thil ṭha lote chu ṭawngṭainaah ka telh ṭhîn a. Nimin leh vawiina ka thiltawnte a inan ṭhin loh avângin, chu chuan thu ngai ringawt sawi nawn lo tûrin min ṭanpui a ni.​—Eve-i

[Phêk 292-naa bâwm]

Bible-ah zawng rawh

1. I chhiar duh Bible thute chu thlang rawh. I thu chhiarte hre thiam tûrin finna dîlin ṭawngṭai rawh.

  2. A thu chu ngun takin chhiar rawh. Hmanhmawh suh. I chhiar pahin, chhût ngun la. I theih ang tâwka rilru pein, ngaihtuah ang che: An chêt dânte hmuh tumin, an thusawi rite chu hriat tum la, rimte bâkah, an ei leh in tui dânte leh thil dangte chu hriat tum ang che. I thu chhiarte chu mitthla theih tûrin tinung ang che!

3. I thu chhiarte chu ngaihtuah rawh. Hêng a hnuaia zawhnate hi inzâwt rawh:

● Engvângin nge Jehova’n a Thu, Bible-ah he thu hi a telh?

● Tute hi nge entawn tlâk ni a, tute hi nge ka tâna vaukhânna ni?

● Ka thu chhiarte aṭang hian zir tûr ṭangkai tak eng nge ka neih?

● Ka thu chhiar hian Jehova leh a thiltih dân chungchâng eng nge mi zirtîr?

4. Jehova hnênah tawi têin ṭawngṭai rawh. Bible i zirna aṭanga i thu hriatte leh nunpui i tum dânte chu hrilh la. A Thu, Bible Thianghlim a pêk che avângin Jehova hnênah lâwm thu sawi ṭhîn ang che!

[Thu lâk chhuate]

“I thu hi ka ke atânte hian khâwnvâr a ni a, ka kawng atân êng a ni.”—Sâm 119:105.

[Phêk 294-naa bâwm]

Thil pawimawhte chu dah hmasa rawh

Ṭawngṭai hman lo khawpin ka buai em? Bible zirna atân hun ka nei lo em? I ngaih pawimawh dânah a innghat tlângpui ṭhîn.

Hei hi tih tum rawh: Bucket pakhat la la, a chhûngah lung lian ve deuh hlek eng emaw zât thun rawh. Chumi hnuah, bucket chhûngah chuan a khatin ṭiau dah leh rawh. Bucket chu lung leh ṭiauvin a khat tih i hmu ang.

Tûnah bucket chu ti ruak la; tichuan, chûng lungte leh ṭiau vêk chu dah leh rawh. Mahse, i dah luh dân thlâk ang che: Bucket chhûngah chuan ṭiau thun hmasa la, chumi hnuah lungte chu thun khah tum ang che. A la leng vek em? A len loh chhan chu bucket chhûnga ṭiau i dah luh hmasak vâng a ni.

Zir tûr chu eng nge ni? Bible chuan: “Thil pawimawh zâwkte chu fiah rawh u,” tiin a sawi. (Philippi 1:10, New World Translation) I nunah intihhlimna ang chi thil pawimawh vak lote i dah hmasak chuan, thlarau lam thil ang chi thil pawimawh zâwkte tih nân hun i nei thei ngai lo vang. Mahse, Bible fuihnate i nunpui chuan, i nunah Lalram tihhmasâwn nân leh intihhlimna eng emaw chen neih nân hun i nei thei ang. Chu chu bucket chhûnga i thil dah luh hmasakah a innghat a ni.

[Phêk 290-naa thu lâk chhuate]

Thingkûng tê angin, Pathian nêna inlaichînna ṭhang chho tûr chuan enkawl a ngai