Kristian Nun Atâna Bible Chângte tih lehkhabu hian i hmachhawn harsatnate chingfel tûra ṭanpuitu Bible chângte awlsam taka hmu tûrin a ṭanpui ang che. Chu bâkah, Jehova chawimawitu thu tlûknate siam tûra mi dangte fuih nân leh ṭanpui nâna i hman duh Bible chângte zawng hmu thei tûr pawhin a ṭanpui bawk ang che. I hriat duh thu pakhat thlang la, chutah chuan zawhna ṭangkai takte leh Bible thu hrilhfiahna tâwi tê i hmu thei ang. (“ He Lehkhabu Hman Dân,” tih bâwm chu en rawh.) I hriat duh thurâwn te, kaihhruaina te leh, thlamuannate târ lanna Bible chângte chu i zawng hmu thuai ang. Mi dangte fuih nân leh ṭanpui nâna i hman theih Bible aṭanga thu bul pawimawh tak takte pawh i hmu thei bawk ang.

He lehkhabu-ah hian thupui pakhat tâna hman theih Bible châng zawng zawng târ lan sên vek a ni lo va. Mahse, a ṭangkai ber tûrte chauh târ lan niin, a dangte chu mahnia zawn belh theih a ni. (Thuf. 2:1-6) Tam lehzuala hriat i duh chuan, Bible châng dang kawhhmuhtu (marginal references) leh New World Translation of the Holy Scriptures-a study note chu hmang ṭangkai ang che. Bible châng pakhat awmzia, a nih loh leh nunpui theih dân kimchang zâwka hriat nân, Jehova Thuhretute Tâna Zir Bingna Hmanrua, a nih loh leh Watch Tower Publications Index chu hmang ang che. Bible thutak chungchânga hriatthiamna thar ber i nei tih i chian theih nân, tûn hnaia tihchhuah chûng hmanruate chu râwn ṭhîn ang che.

Kristian Nun Atâna Bible Chângte tih lehkhabu hian Pathian Lehkhabu Thianghlima awm finna te, hriatna te leh, hriatthiamnate zawng hmu tûrin ṭanpui che rawh se. He lehkhabu i hman hunah “Pathian thu hi a nung a, thil a ti thei,” tih i ring nghet lehzual ngei ang.—Heb. 4:12.