BIBLE-IN NUN A THLAK DANGLAM

ENGIN nge pawisa khêl ṭhîn leh rûkrû ṭhîn mi chu la nun thlâk danglam tûra chêttîr? A thusawite hi chhiar ang che.

“Sakawr Intlânsiak Lam Chu Ka Tui Zâwng Tak A Ni.”​—RICHARD STEWART-A

PIAN KUM: 1965

PIANNA RAM: JAMAICA

CHANCHIN: PAWISA KHELH CHING TAK LEH MI SUAL TAK

KA TUN HMA NUN: Mipui an bih êm êmna hmun Jamaica khawpui Kingston-a chhûngkaw rethei tak aṭanga seilian ka ni a. Chu hmunah chuan hna nei lo an tamin, dân bawhchhiatna a hluar hle. Mi sual pâwlte chuan mite chu an tithlabâr reng a. Nî tin deuhthaw silai puak ri ka hre ṭhîn.

Ka nu chu kan unau thum tân a thawkrim hle a. Zirna ṭha dawntîr min tum tlat a. Mahse, lehkha zir lam chu ka tui lo hle a; sakawr intlânsiak lam erawh ka tui hle thung. School kal lovin sakawr intlânsiakna hmunah chuan ka va kal ṭhîn a. Sakawrte chu ka khalh hial ṭhîn a ni.

Rei lo têah, sakawr intlânsiaknaa pawisa thâpnaah ka inhnamhnawih thûk ta hle a. Nungchang bawlhhlawhna lamah inhmang chhovin, hmeichhe hrang hrang ka kawp lâwr ṭhîn a. Ganja ka zu ṭhîn a, rûkrûk hial ka chîng ta a ni. Silai ka nei bawk a; mahse, rûk kan rûkna zawng zawngahte khân tual thahna vawi khat mah a thleng lo kha tûn hnuah hian ka lâwm hle.

A tâwpah, police-te chuan min manin, dân ka bawhchhiat avângin tân ina khung ka ni a. Tân in aṭanga ka chhuah hnuah pawh ka nun pângngai angin thil sual ka la ti a. Dik tak chuan, ka dinhmun chu tûn hma aiin a chhe zâwk mah a. Ka lan dânah pawi sawi lo hmêl tak ni mah ila, ka tum tawh chu tihlawhtlin ngei ngei duh mi, thinrim hma tak, leh nunrâwng tak ka ni.

BIBLE-IN KA NUN A THLAK DANGLAM DAN: Chutiang nun ka hman lai chuan, ka nu chu Jehova Thuhretute nên Bible zirin, an zînga pakhat a ni ta a. A miziaah a ṭha lama inthlâkthlengnate ka hmuh chuan ka ngaihven ve ta hle a. Ka nu thlâk danglamtu chu hriat tumin, Thuhretute nên Bible ka zir ve ta a ni.

Jehova Thuhretute zirtîrna chu kohhran dang zawng zawngte zirtîrna nên chuan a inang lo hle tih leh an thu zirtîrte chuan Bible a ṭanchhan vek tih ka hre ta a. Ka hriat chinah, anni hi Kristian hmasate tih anga in tina rawngbâwla kal chhuak ṭhîn awm chhun an ni. (Matthaia 28:19; Tirhkohte 20:20) An inhmangaih tawnnate ka hmuhna chuan sakhaw dik ka zawng hmu tih rinnghehna min neihtîr a ni.—Johana 13:35.

Bible ka zirna aṭangin ka nunah inthlâk danglamna lian tak ka siam a ngai tih ka hre ta. Pathian Jehova’n inngaih hi a hua tih leh nungchang bawlhhlawhna ka bânsan a ngai tih ka hre bawk. (2 Korinth 7:1; Hebrai 13:4) Jehova chuan rilru vei zâwng a neiin, ka thiltihte chuan ani chu a tilungngai emaw, a tihlim emaw thei tih ka hriatna chuan ka rilru a khawih hle. (Thufingte 27:11) Tichuan, ganja zûk leh silai kawl chu bânsanin, ka nungchang lamah hmasâwn tumin theih tâwp ka chhuah a. Inthlâkthlengna siam harsa ka tih ber chu nungchang bawlhhlawhna leh pawisa khelh bânsan hi a ni.

A tîr chuan, Jehova Thuhretute nên Bible ka zir tih ka ṭhiante’n an hriat ka hlau hle a. Mahse, Matthaia 10:33-naa chhinchhiah Isua thusawi: “Tu pawh mite hmaa mi phat apiang, ka Pa vâna mi hmaah ka phat ve ang,” tih ka chhiar hnu chuan, ka rilru put hmang chu a inthlâk danglam ta a. Chu Bible châng chuan Thuhretute nêna Bible ka zir thu kan ṭhiante hnêna hrilh tûrin min chêttîr a ni. Ka ṭhiante chuan mak an ti hle a. Kei ang miin Kristian nih ka duh chu an awih thei lo. Mahse, tûn hmaa ka lo nun ṭhin dân anga awm leh ka duh tawh loh thu ka hrilh a ni.

KA HLAWKPUI DAN: Bible tehnate milin ka nun ka hmang ṭan tih a hmuh chuan ka nu chu a hlim hle a. Tûnah chuan, ka chunga thil ṭha lo a thlen a hlauh avânga min ngaihtuah a ngai tawh lo. Kan inanna lai chu kan sawi dûn tawh zâwk a ni—Jehova kan hmangaihna chu. A châng chuan, tûn hmaa ka awm dânte chu ka thlîr lêt a, Pathian ṭanpuinaa inthlâk danglamna ka siam zo zaite hi rin harsa ka ti hial a ni. Tûnah chuan, nungchang bawlhhlawhna pawh tiamin, tûn hmaa ka lo nun ṭhin dân anga awm leh châkna ka nei tawh lo.

Bible thuchah chhâng lêt lo ila chuan, ka thi tawh emaw, tân ina khung mêk emaw ka ni ngei ang. Mahse, tûnah chuan chhûngkaw duhawm tak leh hlim tak ka nei tawh a. Min thlâwp êm êmtu ka nupui leh ka fanu nêna Jehova rawng ka bâwl theih avâng hian ka lâwm tak zet a ni. Hmangaihna nei tak Kristian unaute zînga tel min phalsak avângin Jehova chungah ka lâwm hle a. Ṭhahnemngai taka Bible thutak min zirpuitute chungah pawh ka lâwm tak zet a ni. Chu bâkah, mi dangte hnêna Bible chungchâng zirtîr theihna chanvo hlu ka neih hi ka ngaihlu hle bawk. A bîk takin, a lama min hîptu Pathian Jehova chungah a zahngaihna avângin ka lâwm tak zet a ni.

[Thu tâwi]

“Jehova chuan rilru vei zâwng a neiin, ka thiltihte chuan ani chu a tilungngai emaw, a tihlim emaw thei tih ka hria”

[Thu tâwi]

Ka nupui leh ka fanu nên

[Thu tâwi]

Ka nu miziaah a ṭha lama inthlâkthlengna ka hmu