KAINA leh Abela hi en teh. An puitling tawh a. Kaina chu lo nei mi a ni. Buh leh thei rah leh thlai te a ching thin.

Abela chu beram vengtu a ni a. Beram no te tak tete ven a duh a. Beram lian an lo ni a, tichuan Abela chuan ven tur beram ruai tam pui a nei ta thuai a.

Ni khat chu Kaina leh Abela chuan Pathian hnenah thilpek an rawn keng a. Kaina chuan a thil chin chaw thenkhat a rawn keng a. Abela chuan a beram neih tha ber a rawn keng a. Jehova chuan Abela leh a thilpek chu a lawm a. Mahse Kaina leh a thilpek chu a lawm lo. A chhan i hria em?

Abela thilpek chu Kaina thilpek aiin a tha zawk chauh a ni lo va. Abela chu mi tha a nih vang a ni. Jehova leh a unaupa a hmangaih a. Mahse Kaina chu a tha lo. A unaupa a hmangaih lo.

Chuvangin Pathianin Kaina chu a kawngte thlak turin a hrilh a. Mahse Kaina chuan a ngaithla lo. Pathianin Abela a duhsak vangin a thinur em em a. Tichuan Kaina chuan Abela hnenah, ‘Lovah i kal ang,’ a ti a. Chutah chuan anmahni chauhva an awm laiin, Kaina chuan a unaupa Abela chu a vua. A vaw na khawp a, a tihlum ta a. Kainan chutia a ti chu thil rapthlak a m awm ni?

Abela chu a thi na a, Pathianin amah a hrereng a. Abela chu a tha a, Jehovan chutiang mi chu a theihnghilh ngai lo. Chuvangin eng niah emaw Pathian Jehovan Abela chu a tinung leh ang. Chutih hunah chuan Abela chu a thi leh ngai tawh lovang. He leilungah hian chatuanin a nung ang. Abela ang mite hriat chu a tha lawm ni?

Mahse Pathianin Kaina ang mite chu a lawm lo. Chuvangin Kainan a unaupa a tihhlum hnuah a chhungte dang hnen atanga hla deuhva kalbotirin Pathianin a hrem ta a. Leilung hmun danga cheng tura Kaina kalbo chuan a farnute zinga pakhat a kalpui a, a nupui a ni ta a.

A hunah Kaina leh a nupui chuan fate an nei a. Adama leh Evi fapa leh fanu dangte pawh an innei a, anni pawhin fate an nei a. Leilungah mipui tam deuh an awm thuai a. An zinga thenkhat chanchin i zir ang u.