THAWNTHU 11
Chhimbâl Hmasa Ber Chu
LAWNG atanga amah leh a chhungte an chhuahn laia Nova thiltih hmasak ber i hria em? Pathian hnenah thil hlan emaw thilpek emaw a siam a ni. A hnuaia milemah hian chumi a ti lai mek chu i hmu thei. Tuilet ropui atanga a chhungte a chhandam avangin Nova chuan he ran thilpek hi Pathian hnenah a hlan a ni.
Jehovan thilpek chu a lawm i ring em? Aw, lawm e. Chuvangin tuiletin khawvel a tiboral leh tawh ngai lovang tih a tiam a ni.
Ram chu a hui thuai a, Nova leh a chhungte chuan lawng pawnah nun thar an tan ta a. Pathianin mal a sawm a an hnenah: ‘Fate tam tak in nei tur a ni. Lei chung zawng zawnga mite an awm vek thlengin in pung tur a ni,’ tiin a hrilh a.
Mahse a hnuah, miten tuilet ropui chanchin an hriat hunah, chutiang tuilet chu a thleng leh ang tih an hlau thei ang a. Chuvangin Pathianin lei pum puiah tui a tilet ngai tawh lovang tih a tiam chu mite hriat nawntirna turin engemaw a pe a. Anmahni hriat nawntir nan chuan enge a pek i hria em? Chhimbal a ni.
Ruah sur hnua ni a satin vanah chhimbal hmuh a ni fo. Chhimbal chuan rawng mawi tam tak a nei thei. Pakhat tal i hmu ngai em? Milema pakhat hi i hmu em?
‘Mipui leh ramsate zawng zawng hi tuileta tihboral an ni leh ngai lovang tih ka tiam e. Chhumahte ka chhimbal ka dah dawn a. Tin chhimbal chu a Jan hunah, ka en ang a, he ka thutiam hi ka hrereng ang,’ tih hi Pathian sawi chu a ni.
Chuvangin chhimbal i hmuh hunah enge a hriat nawntir ang che? Tuilet ropuiin khawvel a tiboral leh ngai lovang tih Pathian thutiam hi a ni.
Genesis 8:18-22; 9:9-17.