MILEMTE hi en teh. Aigupta chunga Jehova hri thlentir an lantir theuh va. Milem hmasa berah hian, Aronan a tianga Nile Luipui a vaw lai i hmu thei a. A vuak veleh luipuia tui chu thisenah a chang a. Sangha an thi a, luipui chu a uih tan ta a.

A dawtah, Nile Luipui atangin Jehovan chungu a chhuahtir a. Hmun tinah an awm-thukah, chhang hmehna thlengah, mi khumah-hmun tinah. Chungute an thih chuan Aiguptamite chuan an dah vum ther thur a, ram chu a uih hluah hluah mai a.

Tin Aronan a tiangin lei a vua a, vaivut chu thosiah a chang ta a. Chung chu mi seh thei te tak te thlawk thei chu an ni. Thosite chu Aigupta ram chunga hri pathumna a ni.

Hri dangte chuan Aigupta-mite chauh an tina, Israel-mite tina ve lovin. Palina chu Aigupta zawng zawng ina thlawk lut tho lian pui pui chu a ni. Hri pangana chu ran chungah a ni a. Aigupta-mite ran malte leh beram leh kel tam tak an thi a.

A dawtah, Mosia leh Aronan vut an la a, boruakah an paih a. Mite leh ran chungah panchhia an awmtir a. Chu chu hri parukna a ni.

Chumi hnuah chuan Mosian van lamah a kut a phar a, Jehovan rial leh khawpui ri a tir a. Aigupta-a rial tla nasa ber a la ni.

Hri pariatna chu khaukhuap puang tam deuh a ni a. Englai mahin chumi hma chuan emaw a hnuah emaw chuti khawpa khaukhuap tam a la awm ngai lo. Rialin a tihboral loh thil tinreng an ei zo ta a.

Hri pakuana chu thimna a ni a. Ni thum chhung chu thim chhah deuhvin ram a tuam a, mahse Israel-mite chuan an chennaah eng an nei a.

A tawpah Pathianin a mite chu an kawngka bianga kel tuai emaw beram tuai emaw thisen tat turin a hrilh a. Tin Pathian vantirhkohvin Aigupta a rawn kal hlen a. Vantirhkohvin thisen a hmuh chuan chu inah chuan tumah a tihlum lo va. Mahse kawngkabianga thisen awm lohna in zawng zawngah chuan, Pathian vantirhkoh chuan mihring leh ran fa tir a tihlum zel a. Chu chu hri 10-na a ni.

Chu hri hnuhnung ber hnuah chuan Pharaoan kal chhuak turin Israel-mite a hrilh a. Pathian mite chu kal tura inpeih sa an ni a, chumi zan ngei chuan Aigupta atangin an chhuak tan ta a.